¹ Musa guselile uhuma mgala gwa Moabu ndaa na u loono lwa Nebo, ndaa na songo gya loono wa Pisga lunge luubi lwa Yeliko. Mlume gummoninye sii gyose gya Gileadi ndaa na Dani. ² na Naftali gyose, na sii gya Eflaimu na Manase, na sii gyose gya Yuda, ndaa na bahali lya igolo; ³ na Negebu, na lagala lya ibetabeta ya Yeliko, mbuga gya tusugwe, ndaa na Soali. ⁴ Mlume gumsambile Musa gino noo sii byandibalahile pa Iblahimu, na Isaka, na Yakobo, niganine, nigiha ibushi yobe. Bino nuumonya wa meeso mobe, alakini ushudabuya uya. ⁵ Bibyo Musa, mgichi gwa Mlume, nuuwa uya, mnda sii ga Moabu, wa inywa ya Mlume. ⁶ Gumchiile mmibetabeta ya Moabu, lunge luubi lwa Beth-peoli; alakini hashi mtu gugidi hene hali sinda lyage na liino. ⁷ Musa gubele mtu ga myaa sambi na maumi mabili hene haliwile; liiso lyage lishibeleye; na ata uoa wa m'bili gwage ushihungwile. ⁸ Baana ba Isilaeli bamlilile Musa mnda mgala gwa Moabu masugu maumi matatu; bino, masugu ma malilo na lilo lya Musa hamahwile. ⁹ Yoshua mwaana gw Nuni, gubele mgiluchu luhuda lwa lwengu; bululi Musa gubele gwahuhwa ubiila mabuu hegulu hage; baana na Isilaeli bammuliche, baitile nahi Mlume byelimsambile Musa. ¹⁰ Na hashinaginyuwa iyaka mnda Isilaeli gunge mbuwa nahi Musa, mine gummanine Mlume yenyi wa yenyi; ¹¹ wa bisaga byose na bigagicha byose, Mlume byelimtumine ubyiita mnda sii ya Misili, wa Falao, na ubagichi bage bose, na mnda sii yage gyose. ¹² na wa uya uboo wa uoma ose, iyaka wa luya luteshi lwata, weligilile Musa u meeso ma Isilaeli yose.