¹ Hanyuma ha bibyo, Paulo gukumine Atene guhuile Ubakolinto. ² Gumanine Myahudi gumwechi, china lyage akile, mpuswa gwa Pontok nage guhuile uhuma ibaloo ya Italia masugu ma alibu hamwechi na Pilisila mma chage, yulu kalaudi gubasambile Bayahudi bose bahume ubaloma, nage guhitililile wabo. ³ Ha yulu ya mgulo gwabo gwa wino gubele gumwechi, Paulo gushamine wabo, bagilile mkilo gumwechi yulu babele beno ba ushoma hema. ⁴ Gubasambile malanga mage msinagogi masugu ma ulitucha, gutandile ubakita Bayahudi na Bayunani. ⁵ Biya Sila na Timoteo basilile uhuma Makedonia, Paulo guudilwe abisa na iya inywa, gubasambile Bayahudi ugana Yesu noo Kelesitu. ⁶ Bayahudi bahaminye byake na utuwa Abeca, gwakumine bilaba binge, gubasambile, mashi manyu na mabe hegulu ha miswe gyenyu nene nili taa, utula manamengo niigia ubatu ba mioga. ⁷ Guhumine uya ugile undu gya gumwe mtu china lyake Tito Yusto, gusina Abeca, na ndu gyage gibele ulugumba na Sinagoge. ⁸ Na Kilispo, mmata gwa Sinagoge, guwashiche mlume hamwechi na ndu giake gyose. Bakolinto bengi habahuiliche, bawashiche, bachundilwe. ⁹ Mlume gusambile Paulo umaloma busugu ushimone boba, dogoma tu, ushishisame pli. ¹⁰ Yulu nene nilihamwechi noobe, na hoshi mtu gwiuhula na usapa, yulu nene nili na batu bengi ii gino mbuga. ¹¹ Gushamine ubakolinto Musa gumwechi na miechi mtuba, gulihugigia inyia ya Abeca hawingi habo. ¹² Na Galio hebeleliwali gwa Akaya, Bayahudi baliganine uli lPaulo wa langa limwechi, bammieche witi ya uononua. ¹³ Baganine guno mtu gulihubahul batu bamtambilile Abeca inyume ya mibindo. ¹⁴ Paulo helibendiche udogoma, Galio gubasambile Bayahudi, ugana nambo ino Yisuba ya basapi na ya babi, benywe Bayahudi, biesuba bya biine nene ulungane nenyu. ¹⁵ Nambu hali langa lya machina mibindo gienyu lilo lwe benywe bene, yulo nene nishihubenja uba mmachi gwa milandu gienyu. ¹⁶ Gubachingile bahume umbele gya yage ya uonona. ¹⁷ Nabo bose bampuatile Sostene, mmata gwa Sinagogi, bammulile umbele wa iti ya uonona. Ata Gayo gushimonine iyo uba iyitu. ¹⁸ Hanyuma ha bibyo Paulo gugililile ushama uya masugu mengi, bino gulagene na babuswa gugile na bwato shamu, na Pilisila ahila bagile hamwechi nage, halihuile ubega njuli uya Kakenlea, yulu gubele na buhango. ¹⁹ Bahule Ubaefeso gubashigile uya. Gee buchima gugingile msinagogi udogoma na Bayahudi. ²⁰ Babendiche gashame nabo mengo mengi abisa, gushaninye. ²¹ Haho gulagene nabo, gubasambile nigiwila lwamli iyaka Abeca abeunda gugile ndila gya bwato uhuma Ubaefeso. ²² Na helihuile usla Kaisalia, guselile Yelusalemu ugya ulutanya lubunga, hanyuma gusalile Antiokia. ²³ Na hehuile ushama uya lusugu wa lusugu guchuile, guhitile hawingi ha sii gya Galatia na Filigia, mbuga wa mbuga, ubaomenenya bagigiwa. ²⁴ Haho Myahudi gumwechi china lyage Apolo, mpuswa gwa Isikandelia, mtu gwa lwenyi, guhiile Efeso, nage gubele mmane migolo abisa. ²⁵ Gugo mtu gubele mgigiwe ndila gya mlume, na yulu mtima gwake gubele guginyuile Abeca, na ugigya wa wiinene mwano gwa Yesu,nage gubele mmane uchunda wa Yohana ka. ²⁶ Gutulile udogoma nangu na booba msinagogi, Pilisil na Akila habammuliche bamguhile wabo, bamsambile ndila gya mlume wa winene abisa. ²⁷ Nalibendiche udabu ichiba gagie Akaya, babuswa bam'biile mtima, babagalele baya bagigiwa bamgae; nage helihuile gubawatiliche abisa baya bene bahuile uwasha wa kene ch'Abeca. ²⁸ Bululi gubahemine Bayahudi abisa umbele wa batu bose,na ubamonya binywa mmigolo ugana Yesu noo Kelesitu.