¹ Na habahuile uhita hawingi ha Ampipoli na Apolonia bahiile u Batesalonika, habele Sinagogi lya Bayahudi. ² Paulo,nahi hibele mishaminyi gyake gugingile iya mwabali, gubuchenye nabo binywa bya makolo masuku na ulitucha matatu. ³ Gukiununile na ubasambila ugana bibendile Kelesitu ususulwam na uchuwa uhuma ubabu, na ugana, Yesu gugo guandihumsambila benywe mwano gwake noo Kelesitu. ⁴ Bamwe hawingi habo bawashiche, balilungile na Paulo na Sila, na Bayunani babele humsina Abeca, bengi abisa na baachana bawa milimba bengi. ⁵ Bayahudi bamonine buwa, baliguhile batu babi beengi bene bina punda gibi na basumbiche sumbilo, balitile alugi mmbuga, bagilile batu mndu gya Yasoni habendiche ubahjila umbele wa batu ba mmbuga. ⁶ Hababahuilile bambulile Yasoni na bamwe babuswa umbele wa baata ba mmbuga, balihuita ndodo, baganine, bano batu bagalulile ibaloo bahuhia uno noo. ⁷ Yasoni gubagaa wage, na bano bose balihugila inyume ya mmano gwa Kaisalil balihugana hali linge olo lihugiswa Yesu. ⁸ Banogile sumbilo mtima na bata bose ba mguga habahulichi bibyo binywa. ⁹ Nabo habahule amlipisha Yasoni bumona bwa uhambwa ba beenage baba lediche baligile. ¹⁰ haho baya babusu babahilile Paulo na Sila busugu-busugu mpaka Beloya. Nabo habahiile ubo bagingile msinagogi lya bayahudi. ¹¹ Bano batu babele na buenge ulibaya ba Tesalonika, yulu bagaile iya inywa wa mitima hululu, babele hugalulanya migolo masugu mose, bamone ugano bibyo noo byabili. ¹² Batu bengi hawingi habo bawashiche, na baachana Bayunani bawa milimba, na balumiana bengi. ¹³ Bibyo Bayahudi ba Tesalonika hubahuliche mwano ugana inywa y'Abeca ilihulisambwa na Paulo ata uya Beloya, bagile ubo nao ubasubulila na ulinoga mtima sumbilo. ¹⁴ Haho baya babusuwa bamilile Paulo galigile lwake mpaga um'bega, Sila na Timoteo bashigele uya. ¹⁵ Na baya bene bamshindiche Paulo bahiile mpaga Atene, nabo habahuile uhewa alago auhilila Sila na Timoteo, ubasambila bashisinge umlana, bagile lwabo. ¹⁶ Paulo hebele hubahemba haya Atene na umona bibele bigiluchu miishi mgiya mbuga, mtima gwake guchigililwe abisa. ¹⁷ Mnda Sinagogi gubuchenye na Bayahudi nababele husina Abeca, na baya babele husambana nage usogo kila chuba. ¹⁸ haho bamwe ba Baepikuleo na Bastoiko, bene bina lwenyi, babuchenye nage. Bange baganine, guina lubedo gugu gulihubenja udogoma ii? Bange baganine, gulihumonea mlisambi gwa bya tubeca tugenyi, yulu gubele hulisamba mwano gwa Yesu na uchwa. ¹⁹ Bam'buatile, na umila Aleopago, baganine, m'bihitunaosha umana lugigio lulo luhia loli hulisamba? ²⁰ Yulu wachwa na bitu bigenyi mmatu metu, tulihubenja umana, bino, tusambile hululu bilihudogoma wii. ²¹ Bululi Baatena na bagenyi babele hushama ubo bashibele na inana wa inywa yoyose ubele usamba mwano na uhulicha mwano gwa bya bihia. ²² Paulo gugimene hawingi ha Aleopago, kuganine, benywe batu ba Atene, u byose namona ugana benywe mulibatu ba ucheelecha bya binyumbia. ²³ Bululi hambele hugia ubo na ubo umona utambikila wenyu ni monine ubutambikilo bwenyu ibugolwe bino binywa: WA ABECA ASHIAMANYIE. Mndi nene nihumsambila mwano gwa gugo mine gwanlihutambikila nangu ummana. ²⁴ Abeca abumbile sii na bitu byose biene bilimo, gee, yulu noo mlume gwa gulu na sii, gushibashama m'ihuilo igubailwe na maboo. ²⁵ Gushibagililwa na maboo ma batu nahi ugana gulihubenja itu ya yose, yulu gee noo gubahele bose mwego na luhuda na bibya byose. ²⁶ Nage guitile mioga gyose gya batu uhuma wa gumwechi, bashamo hegulu ha yenyi ya ibaloo yose, hehuile ubahiile mengo melilagile utula ala, na ng'umba cha bushamo bwabo. ²⁷ Yulu bammenge Abeca, inangwa ii wa ubabata-babata, bammone, inangwa gushi koo na kila gumwechi gwetu. ²⁸ Bululu mnda mwage gee tulipoo, tulihugiata na uba na mwego gweta, Nahi gumwe mtungi gwa binanwene guganine, yulu beswe bose tulibaana bage. ²⁹ Bino, yulu beswe tuli baana b'Abeca, tushilingie ulanga ugana bw' Abeca ii mlingilisho gwa nolo ao bumona au liwe, au byose bibandilwe wabwino na lwenyi lwa batu. ³⁰ Bibyo, hala ha buhugi Abeca aliitile nahi gushihumona, bino guabalaga batu bose sii gyose balibeche. ³¹ Yulu gwabiya lusugu lwelibaonona balangamsenge wa kiine, wa guya mtu gwesobolile nage guabaha batu bose uba na wiinene wa biya bieli chulile mwanage ³² haho habahuliche mwana gwa uchua wa babu bange basebulule, bange baganine, tuiuhulicha iyaka yulu ya gugo mwano. ³³ Bibyo, Paulo kugile na ubashika. ³⁴ Bamwe batu galungene nage, bawashiche, n'babo gubelemo Dio ni sisio,mma leopago, na mmachana gumwechi china lyake Damali, na bange batu hamwechi na babo.