¹ Bibele uya Ikonia bagingile hamwechi msinagogi lya Bayahudi naBayunani bawashiche, ² Bibyo Bayahudi bashibabawashe babasongamanye batu bamioga na ubabiya mitima gibaya hegulu ha babusua. ³ Haho bashamine mengo mengi uya, balisambile nangu na hoba wa uomawamlume, gushuhudie inywa ya keene gyake, gubahele uita bisaga na biloya ugilia u maboo mabo. ⁴ Bibyo bilongo bya batu bambuga bisambwene, bamwe lubi lwa Bayahudi na bange lubi lwa Bahilwa. ⁵ Haha hachuile mpulano gwa batu ba mioga na Bayahudi hamwechi na bata babo yulu yebo, ubakila bya bahulihuli na ubata mawe. ⁶ Bahuliche mwano basinine Listla na Delbe, mabuga Likaonia, na ibaloo ya mibamba. ⁷ Bashamine uya ulisamba mwano gubenju. ⁸ Na uya Listla ubele mtu gumwechi, msumwa magulu, itende tangu mnda mwamnake, gushinagyata abisa. ⁹ Gugo mtu gumtendelele Paulo hebele huduoma, Paulo gumlolile meso na umona gwina buwasha bwa uhona. ¹⁰ Gudogomine waLidi liata, Gimana wa magulu mobe bibenju. Gukimene abilo na ukyata. ¹¹ Sumbilo halimonine bigilile Paulo wa madi tala mabo, baganine mlidi lya bakilikaonia, (noo ugana) Tubeca tuatusalila ulilingilisha na batu. ¹² Bamtile Balanaba, Zeu na Paulo, Helme, yulu gee noo gubele ndogomi. ¹³ Ibuli Zeu mineihuilo yake ibele umbele wa mbuga, guletile ng'ombe na sala gya buluba mpaga hamchango, gubendiche utambikila hamwechi na sumbilo. ¹⁴ haho bahilwa Balanaba naPaulo, habahuliche mwano bagulile bisanjwa byabo, bagile abilo bagingile mnda mwasumbilo, banogeye mitima. ¹⁵ baganine, benywe balume, yulu yai mwaita bino? beswe tuli batu byoka biomlibenywe tulihumsambi mwano gubenju, yulu mugalwe nauleya bigilanywa bihugi na mumkile Abeca ali na mwego, abumbile gulu na sii na bahali nabyose bilimo. ¹⁶ Guya, hala mganda gubaleile mioga gyose bagie mmadila mabo bo bene. ¹⁷ Bibyo gushilileelile nangu na ushuhuda, yulu gugilile bisoga, gummele mbula usala hegulu namengo ma usola, gumgiutiche mitima gyenyu iliwa na saso. ¹⁸ Wa bibyo binywa babachibile sumbilo wa mitima usuma bashibaha lutangi. ¹⁹ Bayahudi bahiile uhuma Antiokia naIkonio, basambile sumbilo bamte Paulo mawe, na umpulila hambuga, balangile gwahuhua uwa. ²⁰ Bibyo bagigiwa bamchungulwile mnda mbuga mmeshi gwake guhumine, gugile lwake na Balanaba mpaga Delbe. ²¹ Na habahuile lisamba mwano gubenju mmgia mbuga, na uba nabagigi bengi, bagiwile mpaga Listla na Ikonia na Antiokia. ²² Bagililile ubagimia bagigiwa mitima na ubasambila bashame mnda buwashana ugana bilingie ugingila m'buolo bw'Abeca wa ndila gya asusu engi. ²³ Na habahuile usoola baulu mmunga chose na usaba hamwechi nauhamba, bababiile mmabo mamlume guubawashiche. ²⁴ Hanyuma bahitile hawingi ha Pisidia bagingile Pamfilia. ²⁵ haho habalisambile iya inywa haya Pelge balile mpaga Atalia. ²⁶ Na huhuma uya badaguile na ukia Antiokia. Uba noo wabasabilwe keene ch'Abetcha yulu ya Guya mkile gubahuile ugila. ²⁷ Na habahule balusumbiche lubunga, babasambile bihisho byose bigilile Abetcha hamwechi nabo, ugana gwagibugulila mioga mchango gwa uwasha. ²⁸ Bashamine uya masugu mengi hamwechi nabagigiwa.