¹ Uya u lubunga lw'Antiokia ubele bamwe bambwa na bagikia, nabo ii Balanaba, na Simoni gulihugiswa Nigeli, na Lukio Mkilene, na Manaeni bubele mshi wabo gwa ukoka bele limwechi na olo Helode, na Sauli. ² Bano hababele hutambikila na uhamba, mtima guhaha guganine, mbagulilwe Balanaba na Sauli yulu ya mgilo gwandi m'bagitile. ³ habahuile uhamba na usaba, babiile maboo mabo hegulu habo, babaleile bagie lwabo. ⁴ Babo batu habahuile uhilwa na mtima guhaha baundumwile Seleukia, na uhuma ubo bahitile ndila gya m'bahali mpaga Kipolo. ⁵ Na hababele mmbuga gya Salami balisambile inywa y'Abeca mmasinagogi ma bahudi, babele na Yohana maluko nahi m'bwatilicha kwabo. ⁶ Habahuile uhita hawingi ha ichiba yose mpaga Pafo, bamonine mtu gwa luganga-ganga, mbwa gya lulimi, myahudi china lyake bal-yesu. ⁷ Guno mtu gubele hamwechi na Selgio Paulo, mtu gwa lwenyi. Gee liwali gubakitile Balanaba na Saulo bakie wake, kubendiche uhulicha inywa y'Abeca. ⁸ haho, Elima guya gwa luganga-ganga (lilio noo china lyage) gubilile paa nabo, gubendiche umgiwicha liwali kahume m'buwasha. ⁹ Bibyo Sauli guya mine noo Paulo, mgilichu mtima guhaha gumlolile meso. ¹⁰ Kuganine, gogue guakiluchu tubachi na bubi bose mwana gwa iningili, amangu a kiine kyose ushihulea ugobea madila ma mlume mene mali magolobu? ¹¹ Bino, ulole, uboo wa mlume uli hegulu hobe, na gogue ubi ihobu, ushimona chuba mamwe mengo. Haka ndimi cha luenge chimkingile mmeso namdo nuuchwa, guchungulwile-chungulwile nuenga mtu guimpuata uboo na umlombuela. ¹² Guya liwali helimonine bagilie, guwashiche, gulugagilwe lugigio lwa mlume. ¹³ Hanyuma Paulo na beenage bagile iyake ndila gya mmadi uhuma Pafo, bahuile Pelge uya Pamfilia, Yohana gubashigile gugiwile Yelusalemu. ¹⁴ Paulo na Balnaba bahumine Pelge, ndila gya mbala nuhya Antiokia, mbuga gya Pisidia, babingile m'sinagogi lusugu lwa ulitucha, bashamine. ¹⁵ Hanyuma ha usama m'bindo na itabo ya bambwa, bauta ba Sinagogi bahilile mtu wabali, na ubasambila, babuswa, nambo mwahuba na inywa ya ubawatilicha bano batu idogomwe. ¹⁶ Paulo gubapepelile uboo, gugamine, benywe, balumiana b'Isilaeli, na benywe mulihumsina Abeca, hulichiwe. ¹⁷ Abeca a bana batu d'Isilaeli asobolile bamasetu, gubaginuine bubo batu, hababele hushama nahi bagenyi msii gya Misili, na wa uboo uginunywe gubahuminye, gubalombwele. ¹⁸ Na wa miaa maumi mana gubele nabo mwanaganywa gubavumilie. ¹⁹ Na helihuile uhaga mioga njwi m'ibaloo ya bakanaani gubahele ibaloo yabo ibe buhiana wa miaa sambi china na maumi matano. ²⁰ Hanyuma ha bibyo gubahele bagechi ba milandu alaa mbwa Samweli. ²¹ Hanyuma ha bibyo, basabile bahewe olo, Abeca abahele Sauli mwana gwa Kishi, mtu gwa ibushi ya Benyamini, umiaa maumi mana. ²² Na heli huile umunya gugo, guginunine Daudi gobe olo lyabo nine guelishuhudie, kuganine, nimmonine, Daudi, mwana gwa Yese, mtu gulihugila biubenja mtima gunyi, guigila bya luundo lwanyi. ²³ Wi bushi ya gugo mtu Abeca gummilile Isilaeli mmonya, moo, Yesu, nahibielilagile. ²⁴ Yohana helihule ulisamba ubatu bose ba Isilaeli mwano gwa uchunjwa wa ulibecha, hambele ha uchwa wake. ²⁵ Yohana helihuile luendo lwake kuganine, mulihunanga nene ni nanyi? Nene nishigee. Bino, lolwe, hanyuma hanyi halihuchwa gumwechi mina gwandishi lingu usula migochi gya mikalabanda gyake. ²⁶ Babuswa, baana ba ibushi ya Ibulahimu, na hawingi henyu balihunyemia Abeca, wetu beswe inywa ya uhoma uno ya hilwa. ²⁷ Yulu bashami ba Yelusalemu, na bata babo, bululi bashimmanine gee, ata binywa bya bambwa byene bilihusomwa kila lusugu lwa ulitucha, babibile yulu ya ummonona. ²⁸ Inangwa bashimmonine ibolo ya ummagila basabile Pilato gammage. ²⁹ na habo huile wita byose biandikwe yulu yage bamsachiche umti gwa asusu, bambile msinda. ³⁰ Abetcha amchulile uhuma ubabu. ³¹ Gumoneye masugu mengi ubaya gaselile nage uhuma Galilaya ugya Yelusalemu, na bino boo noo bamashahidi bage ubatu. ³² Na beswe tulihusamba mwano gubenju gwa aya alago ahele bamatata. ³³ ugana Abeca awilicha ao alago ubaana betu, wa uuchula Yesu, nahi byabigolilwe u Zabuli gya bululi, gogue noo mwananyi, nene lino nuubuta. ³⁴ Iyata gumchulile uhuma ubabu, yulu gushigiwilile ubola, gwagana bibyo. Niima benywe bibya bihaha bya Daudi bya uhulilwa mihaa. ³⁵ Wa bibyo gwakana uginge Zabuli, gushimlea mmaha gobe umona ubola. ³⁶ Yulu Daudi, helihuhuile ugilila mmugo gw'Abeca mmibushi yage, gulalile, guchiilwe hamwechi na bamasake, nage gubolile. ³⁷ Guno mine guchulilwe na Abeca gushimonine ubola. ³⁸ Bino, bimanyie wamli, bashiwetu, ugana yulu ya gugo, mwasambilwa mwano gwa uleele lwa bubi. ³⁹ Wa gugu gese kuimbwasha guibalwa kiine u bihisho biya byose byeshimoosha ubalwa kiine um'bindo gwa Musa. ⁴⁰ Lolwe, bino, gushibachuilile guya mwano gulisambile ba mbwa. ⁴¹ Lolwe, benwe mulihulengia, mugagichiwe, na muchimine, yulu nagila mkilo nene masuku menyu, mkilo gwine gumusabawasha abisa, inangwa mtu gunamsammbila hululu. ⁴² Hababele hutoboa, babatendelele ugana basambile iyaka bino binywa lusugu lwa ulitucha lwa bubili lwage. ⁴³ Sinagogi halisalie, Bayahudi bengi na ba washa babo balamene na Paulo na Balanaba bene babele hudogoma nabo na ubaha mtima gwa ukilila mnda kene ch'Abetcha. ⁴⁴ Lusugu lulitucha lwa bubili, batu bengi alibumbuga gyose, basumbile wihulicha inywa y'Abetcha. ⁴⁵ Bibyo Bayahudi, habamonine liya sumbilo, bamonine buwa, bahaninye binywa bulisambile Paulo, habele paa na ubatua. ⁴⁶ Paulo na Balanaba badogomine wa nangu udidibua baganine, bibele lingie inywa y'Abetcha itula ulisambwa wenyu, yulu mwailungila koo,na ulimona mitima gyenyu mushingilingye mwego gwa milumbu, lolwe, twahugalwila mioga ginge. ⁴⁷ Yulu ya bibyo biatulibalagwe na mlume, nubya uba lwenge lwa mioga, ube uhona ata isula y'ibaloo. ⁴⁸ Mioga habahulihe bibyo baseelele, baiginune inywa ya mlume, na bene babele balangilwe mwego gwa milumbu bawashiche. ⁴⁹ Inywa ya mlume idagalele iya ibaloo yose. ⁵⁰ Bibyo Bayahudi babasongamanye baachana babinyumbia na babitibiata na bata ba mbuga, babosambile batu babasusule a Paulo na Balanaba, babachingile ung'umba chabo. ⁵¹ Paulo na Balanaba baukumuine ihuili ya umagulu mabo, boo nukia Ikonia. ⁵² Bagigiwa bagiluchiwe saso namtima guhaha.