¹ Paolo, na Silwano, na Timoteo, wa ihwilo ya Batesalonike, ili mnda mwa Abetcha Setu, na Mlume Yesu Keleshito. ² Keene na gibe wenyu na talala chuuhuma wa Abetcha Tata, na wa Mlume Yesu Keleshito. ³ Bashiwetu, ii bibenju umma Abetcha buswachi masugu mose wa yulu yenyu, nahi bya bilingye, bululi uwasha wenyu wagililila abisa, na luundo lwa mtu gegese uliminage luli lwingi. ⁴ Bino ata na beswe beene tulihumona busoga yulu yenyu mnda bihwilo bya Abetcha wa yulu ya uhemba wenyu,na uwasha wamli nao wa pyenge pyenge chenyu chose na tususu twamwahima. ⁵ Noo isaga ya uononywa ili kiini gya Abetcha, bululi mwahubalwa uba balingyeugingila m'buolo bwa Abetcha, ugana wayulu yage mwasusulwa ⁶ Wa yulu ii kiine u meso ma Abetcha ubaha asusu baya bamsusule benywe; ⁷ na uuma benywe ulitucha hamwechi neetu; mengo ma uununywa wage Mlume Yesu helichwa uhuma hegulu hamwechi na malaika wa uosha wage. ⁸ mnda lulindi lwa ahya; na ubagiwidicha bubi bashibammane Abetcha, na baya bashi baginamine Mwano gwa mwego gwa Mlumyetu Yesu. ⁹ biononywa wa uchimya wa milumbu, na ubagulwa na yenyi ya Mlume na ugengeda wa uoma wage. ¹⁰ gee helichwa bululi gatonwe hawingi ha bahaha bage, na ubagagicha bose bene wa luya lusugu,( yulu ulisambawetu uwashichwe wenyu ) . ¹¹ Wa bibyo tulihumsabila masugumose, yulu Abetcha etu aubale ugimana wa ugiswa wenyu, na umgilila bitaganya bisoga na migilo gyose gya uwasha wa uoma; ¹² China lya Mlumyetu Yesu litunwe mnda mwenyu, na benywe mnda mwage; wa keene cha Abetcha etu na cha Mlume Yesu Keleshito.