¹ Hanyuma huuwa wage Sauli, hao Daudi haligiwile ubahaga Baameleki, nage Daudi gubele mshame masugu mabili Siklagi; ² nalusugu lwa butatu habele, loola, Hachwile mtu uhuma u bushamo bwa Sauli, bichwalaganywa byage bisambubu, iyaka gwina ihwili mswe mwage; haho, bibele helimmyile Daudi, gugwile hasi, gumginamine Daudi. ³ Daudi gumsambile, Wahuma uhi? Gumsambile, Nahuma mnd bushamo bwa Isilaeli. ⁴ Daudi gumsambile, Byagiliya wii? Ibumbu ino usambile. Gumgaile, Batu basina u bita, iyaka batu beengi bagwile gahagilwe; ndaa na Sauli nage na Yonathani, mwanage, gwaawa. ⁵ Daudu gumsambile guya mmwalubaga mine gummele mwano, Wamana wii ugana Sauli na Yonathani mwanage baawa? ⁶ Guya mmwalubaga mine gummele mwano gugnine, Nibele ho wa hoka abisa hegulu ha loono lwa Gilboa, na loola, Sauli gugegamine sumo lyage; na loola, tubilibili na bachinyi ba falasi balihumlama abilo abisa. ⁷ nage heebuwileu nyuma, gumbonine, gungitile. Nimgaile, Nene guno. ⁸ Gusambile, Uli nayi gogwe? Nimgaile, Nene nili Mmaameleki. ⁹ Gusambile, Ibumbu ino gimana hoka nanyi, upage, bululi ahunago ahumanga; yulu luhuda lwanyi lwili na mwego mnda mwanyi. ¹⁰ Bibyo, nigimanine hoka nage, nimmagile, bululi nimanine wa chigilwe ugana gushihona hanyumaha ugwa; hanyuma niguhile aya akusukusu ene abele u mswe gwage, na bangili lyine libele uboo wage, na nene nabilusha hano wa mlumyanyi. ¹¹ Haho Daudi guwatile bichwalaganywa byage na ubigula, na byoka biya na bato bose beme babele hamwechi nage; ¹² babiile malilo balilile, bahambile ndaa na igolo, wa yulu ya Sauli, na wa yulu ya Yonathani mwanage, nawa yulu ya batu ba Mlume na wa yulu ya ndu gya Isilaeli; yulu bagwile wa ahilu. ¹³ Nage Daudi gumsambile guya mmwalubaga mine gummele mwano, Wahuma uhi gogwe? Gumgaile, Nene nili mwaana gwa mgenyi, Mmaameleki. ¹⁴ Daudi gumsambile, yulu yai usamona booba ugolola uboo obe ummage mshinyiwa mauta gwa Mlume? ¹⁵ Haho Daudi gumgitile gumwe mmwalubaga, gumsambile, Ugye, na ummaga, haho gummulile ndaa na ummaga. ¹⁶ Daudi gumsambile Maasho mobe na mabe hegulu ha mswe gobe gogwe mine; yulu walibangisiya ichuli-chuliyobe ya mwego wagana, Nammaga mshinyiwa mauta gwa Mlume. ¹⁷ BibyoDauli gugimbile lwimbo lwa malilo yulu ya Sauli, na Yonathani, mwanage, malilo noo mano; ¹⁸ (nahi byabigililwe mnda itabo ya yashali), ugana, Baana ba Yuda na bagigiwe bino, ¹⁹ Bene bali ugema ube, Ee Isilaeli Hegulu ha ihana yobe ya iginyubu bahagilwe; Nahi bilume pambwa byabagwile! ²⁰ Mushilisambe bino bikoko mnda Gathi, Mushibigane mnda ndila gya Ashkeloni; Bashichwe useelela bawamisiha ba Bafilisti, Misiha gya bene bashibabagibe kumbi batugiluche. ²¹ Chenywe koono cha Gilboa, bishibe hegulu henyu Iime na mbua, ata na mabala muusola lutangi; Bululi noo utelilwe bichwalaganywa bya ilume pambwa, Nganbo chage Sauli, nangu ushiwa ata na mauta. ²² Uhuma u maashi mabo bene bahagilwe, Uhuma u mauta ma bilume pambwa, Buta bwa Yonathani bushigiwile unyuma, Ata ahilu a Sauli ashigiwile bunene. ²³ Sauli na Yonathani baundilwe na ubenjiwa Mnda Mwego na ata u lubu bashibagulwe; Babele bahuhu uhima loochi, Babele nauoma uhima tambwe. ²⁴ Benywe misiha gya Isilaeli, mlililwe Gugo Sauli, mine gumchwiche bichwalaganywa bya bigachichu bya ulitucha, Gutogole bichwalaganywa byenyu nolo. ²⁵ Nahi biya bilume pambwa byabagwile m'bwingi na bita! Ee Yonathani, gogwe wahagwa Yulu ya ihana yobe ya iginyubu. ²⁶ Nasumwa mtima yulu yobe, Yonathani, mshiwetu, Ubele humenja abisa; Luundo lobe wanyi lubele lwa bigagicha, Uhima luundo lwa baachana. ²⁷ Nahi biya bilume pambwa byabigwile, Na tulume gela byatugugile!