¹ Mndi, bashiwetu, yulu ya mwano gwa mengo na bihindi, mushilingye naba golele. ² Bululi benywe bene mugidi ugana lusugu lwa Mlume lwichwa nahi biya miibi byesuchwa m'busugu. ³ Mengo mabasugana, hali talala na pii, haho noo udoga hausubachwila wa ubabula, nahi biya busungu bya busumchwila gwa gumo, na winene bashihogononywa. ⁴ Mndi benywe, bashiwetu, mushi mnda mdo, ata liya chuba liimchwilile nahi miibi. ⁵ Bululi benywe bose musili baana ba lwenge, na baana ba mchuba; beswe tushi ba m'busugu na ba mdo. ⁶ Bino tushilale tuulo na uhongela nahi baya baange, mndi tuyeshe, na uba na lingililo. ⁷ Yulu bene basulala tuulo basulala m'busugu, iyaka na baolwa baswuolwa m'busugu. ⁸ Wa bibyo beswe tuli ba mchuba, tube na lingililo, na ulichwia ubyali uwasha na luundo, na akusukusu etu abe maudagilo ma uhogononywa. ⁹ Bululi Abetcha ashitubiile yulu ya sungu chage, ii yulu tuhewe uhogononywa, wa Mlumyetu Yesu Keleshito; ¹⁰ guya mine guwile yulu yetu, na tube na mwego hamwechi nage, na uba twayesha nambo uba twahongele. ¹¹ Bino muhungyane na ugubaana mtu na gunge nage, byoka biya nahi byamusugila. ¹² Mndi, bashiwetu, tulihubenja mubamane baya bene bali hulihana yulu yenyu, na umgimanina yulu ya Mlume, na uuma mmano; ¹³ Mubanyemye abisa mnda luundo, bululi bwa migilo gyabo. Mube na talala benywe wa benywe. ¹⁴ Bashiwetu, tulihumtongelela, mubahane baya bene bashi na mishaminyigisoga, ubateyamanya bene bina bugongole; ubateyamanya bilema; hembwe na batu bose. ¹⁵ Loolwe mtu gegese gashi mgiwidiche miinage bubii wa bubii; bululi masugu mose mulole bya bisoga, benywe wa benywe na uu batu bose. ¹⁶ Seelelwe masugu mose; ¹⁷ Sabwe wa ugililila; ¹⁸ Tonywe wa bihisho byose; yulu noo bilihubenja Abetcha watuli mnda mwa Keleshito Yesu. ¹⁹ Mushi chimye Mtima; ²⁰ Mushihanye bubuwa; ²¹ tonjwe bihisho byose; gitabuwe bya bisoga; ²² libagulwe na bubii bwa mioga gyose. ²³ Abetcha oo ene a talala abahahacheabisa; benywe na bichuli chuli byenyu bya mwego na mitima gyenyu na mibili gyenyu mubiswe na muwilile, nangu uba na abachi, mengo ma uchwa wage MlumyetuYesu Keleshito. ²⁴ Gee ii m'bwilile mine gilihubagita, nage gwigila. ²⁵ Bashiwetu, mutusabile, ²⁶ Mubatanye babuswa bose wa ubaumbatila wa ugengeda. ²⁷ Nilihumlahila wa Mlume, babuswa bose balangulilwe guno mkanda. ²⁸ Keene cha Mlumyetu Yesu Keleshito na chibe hamwechi neenyu.