¹ Ishugele, bashiwetu, tulihumtendelela na uumana ugana mugyate mnda mwa Mlume Yesu, nahi bya mugaile watuli mulingye ugyata na umseelecha abetcha, nahi benywe byamuli hugyata,byoka biya mugililile abisa ² Bululi mugidi ii mmano nai gwatummele yulu ya Mlume Yesu. ³ Bululi bibyo noo ubenja wa Abetcha, uhahachiwa wenyu, mulibagule na masei,; ⁴ gegese gwenyu gamane uguhima m'bili gwagemnda mwa buhaha na bunyemu; ⁵ ushi wa itima ibii, nahi mioga gishigimmane Abetcha. ⁶ Mtu gashi guhe biingi uli mshiwabo na umlubila wa ino ihisho; bululi Mlume noo gwilihulila wa bibyo byose; nahi byatumsambile aala, tulisambile abisa. ⁷ Yulu Abetcha ashitugitile bunyenye ii tube bahahachiwe. ⁸ Mndiguya mineguli huhanya, gushihuhanya mtu gulihuhanya Abetcha, mine gulihuuma benywe Mtima gwage Guhaha ⁹ Yulu ya mwano gwa ubenjana, mushihubenja namgolele; bululi benywe bene mugigichiwe na Abetcha ubenjana. ¹⁰ Bululi mulihugila u babuswa bose bene bali uya Makedonia ose. Bino tulihumtendelela, babuswa, mugililile abisa. ¹¹ Iyaka mumonye uhola, na ugila bigilanywa byenyu na ugila migilo gya maboo menyu,nahi byatumlagile; ¹² bululi mugyate wa bunyemu u baya bene bali hambuga, na mushibe na bitaganywa byobyose ¹³ Bino, bashiwetu, tushihubenja muhulwe umana mwano gwabo balalile mlubu, mushichwe uchigililwa nahi bange bene bashi na maudagilo, ¹⁴ Nanbo, uba twawashaugana Yesu guwile na guchuwile, byoka biya na baya bene balalile mnda mwa Yesu, Abetcha ibachwisha hamwechi nage. ¹⁵ Wa bino tulihumsambila wa inywa ya Mlume, ugana beswe bene tuli poo, twishigala ndaa na mengo ma uchwa wage Mlume, winene tushibi batangi babo bene bahwile ulala mnda lubu. ¹⁶ Yulu Mlume geminegwisala uhuma hegulu hamwechi na mbila, na lidi lya malaika mmata, na asiba a Abetcha; na bene bawile mnda mwa Keleshito noo bitula uchulwa. ¹⁷ Hanyuma na beswe bene bali na poo, tushigele, twihehulwa hamwechi nage mnda matimba, bululi tusambane na Mlume m'bwingi na gulu, na bibyo tubi hamwechi na Mlume milumbu. ¹⁸ Bino muhungyane wa bibyo binywa.