¹ Paolo, na Silwano, na Timoteo, wa ihwilo ya Batesalonike, yine ili mnda mwa Abetcha Tata, na mnda mwa Mlume Yesu Keleshito. Keene na chibe wenyu na talala. ² Tulihuginuna Abetcha masugu mose yulu yenyu benywe bose, na umlumbula mmusaba wetu. ³ Na tushinalea uengelecha mgilo gwenyu gwa uwasha, na asusu enyu a luundo, na uhemba wenyu wa maudagilo wine uli mnda mwa Mlumyetu Yesu Keleshito, umbele wa Abetcha setu. ⁴ Wa bibyo, babuswa bene beli huunjwa na Abetcha, tugidi usobolwa wenyu; ⁵ bululi mwano gubenju gwetu gushimmyile wa binywa ka, ii wa uoma, na wa Mtima Guhaha, na wa ulimonya wingi; nahi byamulibamane bibele mishamenyigyetu yulu yenyu. ⁶ Na benywe nuuba batulama beswe na ba Mlume, hamuhwile ugaa inywa wa asusu eengi, hamwechi na saso lya Mtima Guhaha. ⁷ Na uba batu ba umanyia na batu bose bawashiche uya Makedonia, na Akaya ose. ⁸ Uhuma wenyu inywa ya Abetcha yadagalala, ushi uya Makedonia na Akaya ka, ii bihindagala byose uwasha wenyu wamuli nao yulu ya Abetcha wadagalala; na ata beswe tushi na inge ya udogoma iyaka. ⁹ Yulu bo bene balihulisamba mwano gwetu, byine baubele ugingila wetu wenyu; na byamumgeluile Abetcha na uleya miishiyulu ya ugilila Abetcha mwego na wa kiine; ¹⁰ na ummemba Mwanage uhuma hegulu, mine gwelichulile uhuma ubabu, gee noo Yesu, mine gulihutuhogonona uhuma m'buhuchi bwine bwiichwa.