¹ Bululi benywe bene, bashiwetu, mugidi ugingila wetu wenyu, ugana tushibele wa bunene; ² na hatuhwile ususulwa na ugililwa buhulihuli,nahi byamuli bamane, uya u Bafilipi, tutundile yulu ya Abetcha ulisamba Mwano gwa Abetcha wa mli, wa mahindi meengi. ³ Bululi mmano gwetu gushi gwa bubuchu, na gwa bubi na gwa ulimonya; ⁴ yulu nahi biya byatuhelwe ugitabichiwa uu meso ma Abetcha tubiilwe butunga Mwano Gubenju, noo byatuli hulisamba; ushinahi wa ubaseelecha batu, ii wa useelecha Abetcha ene ali hutonda mitima. ⁵ Bululi tushibele na binywa bya ulimonya mengo momose u batu, nahi byamugidi, na wa binywa bya hegulu hegulu na ubisa bushimbi; Abetcha agidi. ⁶ Tushiengile ugengeda wa babu, na wa mli, na ubaya bange hatubele huosha ubaambila nahi bahilwa ba Keleshito ⁷ mndi tubele chumba chumba hawingi henyu,nahi biya mmolwa byesuusa bana bage gee mine. ⁸ Byoka bibyo na beswe byatuli babaudagile wa luundo lwingi, tumonine saso lwa uuma, gushi Mwano Gubenju gwa Abetcha ka, mna mitima gyetu, yulu musili baunjwa bwetu. ⁹ Yulu, bashiwetu, mulihuengelecha asusu etu na unyogwa wetu; bululi chuba na busugu tugilile mgilo tushichwe udembya mtu gegese gwa wenyu, tumsambile biino Mwano Gubenju gwa Abetcha. ¹⁰ Benywe mumonine, na Abetcha nage,byatushamine wenyu bene bawashiche, wa buhaha, na wa winene, ushi wa ulisusula; ¹¹ byoka biya, nahi byamugidi, byatuli balangulule gegese gwenyu nahi bisu umlangulula shibana u baba bage, tubele humtiamanya mitima yulu ya ususulwa; ¹² yulu mushame nahi bili ugiswa wenyu na Abetcha, mine gulihumgita benywe mugingile mnda buolo bwage na ugengeda wage. ¹³ Wa yulu ya bibyo beswe na beswe tulihumtona Abetcha wa nangu uleya, bululi, hamuhwile ugaa iya inywa ya uhulwa ya Abetcha yamuhuliche watuli, yamugaile ushi nahi inywa ya mtu, nahi inywa ya Abetcha; na noo byaili kiine kiine; ilihugila mgilo mnda mwenyu benywe bene mulihuwasha. ¹⁴ Yulu benywe, bashiwetu, mubele baulama ba m'bihwilo bya Abetcha byine bili Ubayahudi, mnda mwa Keleshito Yesu; bululi mususulwe mmoka aya asusu nahi batu ba mmoga gwetu, byabasusulwe na babo Bayahudi; ¹⁵ bene bammagile Mlume Yesu, na babo ba mbuwa, na utunogolola beswe, na bashi humseelecha Abetcha, na bashi huhulichana na mtu gegese. ¹⁶ na utuchibila tushidogome na Bamioga ginge yulu bahogoninywe; bululi bawiliche bubi bwabo masugu mose, Buhuchi bwabahyila ndaa na isula ¹⁷ Mndi beswe, bashiwetu, uba twahusambuana nenyu wa mengo macho, wa byenyi ushi wa mtima ,tugililile ubenja abisa ummona byenyi byenyu. ¹⁸ Wa bibyo tubenjiche uchwa wenyu, ehe,nene Paolo, lwendo lutangi, na lwa bubili, na Ihingili ituchibile. ¹⁹ Yulu maudagilo metu, na saso lyetu, na sala lya ulitona, ii iyii? Wii! ati ii benywe, u meso ma Mlumyetu Yesu, mengo ma uchwa wage, ²⁰ Yulu benywe noo ugengeda wetu, na saso lyetu.