¹ Haho, mwaana Samwele gumgilile Mlume mgilo u mbele wa Eli. Na inywa ya Mlume ishibele huhulichiwa maya masugu; hashibele na uununilwa wa hululu. ² Habele maya mengo, Eli helibele mlachu ha ihana yage ( iyaka meeso mage basibe hutula buhobu, na gushibele huosha umona), ³ na yaa ya Abetcha ishibele nachima ata, Samwele gubele mlachu mnda lubunga lwa Mlume, henenhabele na lindo lya Abetcha; ⁴ bibyo mamao mengo Mlume gumitile Samwele; nage gugaile, Nene gono. ⁵ Gugile uli Eli abilo, guganine, Nene guno; yulu wangita nachwe. Eli guganine, Nisugita; gyu lala iyaka. Nage gugile, gulalile iyaka. ⁶ Mlume gumgitile lwendo lwa bubili, Samwele! Samwele! Gubyuwile gugile uli Eli, guganine Nene guno; bululi wangita. Eli guganine, Nisugita mwananyi; ubegya ulala iyaka. ⁷ Bibyo Samwele gushibele nammana Mlume, na inywa ya Mlume ishibele naununywa wage. ⁸ Mlume gumgitile Samwele lwendo lwa butatu. Nage gugimanine gugile uli Eli, guganine, Nene guno; yulu wangita. Haho Eli gumanine ugana Mlume noo gulihumgita guya mwaana. ⁹ Wa bibyo Eli gumsambile Samwele, Ugye, ulale; nambo, gwiugita, wigana, Dogoma, Mlume; yulu mgichi gobe gulihuhulicha, Haho Samwele gugile gulalile, ha ihana yage gee buchima. ¹⁰ Mlume guchwile, gugimene, gugitile byoka biya nahi hatangi, Samwele! Samwele! Haho Samwele guganine, Dogoma, Mlume; yulu mgichi gobe gulihuhulicha. ¹¹ Mlume gumsambile, Samwele, Lingamina, nihisha ihisho mnda Isilaeli, yine ge gese heliihulicha mmatu mage michiga. ¹² Luya lusugu nibiwilicha biya binywa byose byandiganine yulu ya Eli yuluya ndu gyage, utula ubutulilo ndaa na wisula. ¹³ Bululi nimsambile ugana nionona ndu gyage milumbu, yulu ya uya usona wine welimanine; bululi baana bage balilushishe buloga, na ata gee gushibachibile. ¹⁴ Na wa bibyo nilahile pa yulu ya ndu gya Eli, ugana usona wa ndu gya Eli ushihahachiwa wa lutangi lwa nyama ata wa lutangi lo lose milumbu. ¹⁵ Nage Samwele gulalile abisa ndaa na halweo, gugibugule michango gya ndu gya Mlume. Samwele gumonine booba wa umsambila Ele maya malo. ¹⁶ Haho Eli gumgitile Samwele, gunanine, Samwele, mwananyi. Nage gugaile, Nene gono. ¹⁷ Gum'budiche, M yinywa nai yagadogoma nobe? Nihutendelela, ushimbise; Abetcha uugilile byoka bibyo, na ugililila, ubembisa yo yose u bibyo byose byine Mlume byagadogoma nobe. ¹⁸ Bibyo Samwele gumsambile binywa byose, gushibisile yo yose. Nage guganine, Mm Mlume gugo; na gaite yelihumona uba isoga. ¹⁹ Samwele guulile ichuli, nage Mlume gubele hamwechi nage, na gushiileile inywa yage yo yose ugwa hasi. ²⁰ Nabo Baisilaeli bose, utula Dani ndaa na Beel-sheba, bamanine ugana gugo Samwele gusili mbuwa gwa Mlume. ²¹ Nage Mlume gumoneye iyaka uya Shilo; bululi Mlume guliunune wa Samwele uya Shilo, wa inywa ya Mlume. Nayo inywa ya Samwele ibahyiile ba Isilaeli bose.