¹ Nage Hana gusabile, guganine, Mtima gwanyi gwamseelela Mlume, Lwiga lwanyi lwaginyuwa mnda mwa Mlume, Anywa anyi agaduwa abisa yulu ya tumangu twanyi; Bululi naseelela uhogonona obe. ² Hashi mine guli mmaha nahi Mlume; Yulu hashi ge gese nambo gogwe, Hashi huo nahi Abetcha. ³ Mushigililile uengelecha bibyo; Ulitona ushihuma mnda tunywa twenyu; Bululi Mlume noo Abetcha a malango, Na bigilanywa bili hulingililwa nage u kilo. ⁴ Mata ma bilume pambwa manogeya, Na baya bene balihyatalile bachibililwa uoma. ⁵ Bene bagyutile balihigya yulu ya uhewa biliwa, na baya bene babele na ndala, basili balituche. Ehe, guya mine gubele igumba gwahubuta baana njwii, Na guya mine guli na baana beengi gwaliumbata. ⁶ Mlume gusuhaga, nage gusuhana mwego; Gususacha ndaa na usinda, iyaka gususecha hegulu. ⁷ Mlume husuita bamwe uba ba mbuchu; Gususacha hasi, iyaka gusuginuna hegulu. ⁸ Gusuginuna ba mbuchu uhuma mmihwili, Gususecha msabi uhuma u chala, yulu gabashamye hamwechi na maoolo, Baswihyana usiba ya buolo bwa ugengeda; Bululi bihanda bya ibaloo byina Mlume, nage gubiile lungu uba hegulu hage. ⁹ Gee gwiusa magulu ma bahaha bage; Bibyo basone bibiwa pii mnda mdo, Yulu ya uoma hashi mine gwihima; ¹⁰ Buuhapana na Mlume biswagwa abisa; Uhuma ha gulu gee gwibata kuba; Mlume gwionona bisula bya ibaloo; Nage gwiha oolo lyage uoma, Na uginuna lwiga lwa mshinyiwa mauta gwage. ¹¹ Hanyuma Elkana gugile Lama u ndu gyage. Na guya mwaana gumgilile migilo gya Mlume u mbele wa Eli, ibuli. ¹² Haho, babo baana ba Eli babele baana bashilingye atu; bashihodile Mlume, ¹³ na kiine gya bibuli byagibele u batu. Mamo mengo nambo mtu ge gese helitangile nyama mengo mo mose, bibyo guchwile m mgichi gwa ibuli, nyama hagibele hubila, nage gabeba na kanya gya meno matatu mmuboo wage; ¹⁴ nage gusugichinda wa uoma m'ya mlweso, ao mmbiliga, ao mmilego, ao mmibya; nyama gyo gyose gyine gibele hudabulwa na giya kanya ibuli igiguhile yoo yine. Noo byababele huita uya Shilo u Baisilaeli bose bene bagile uya Shilo. ¹⁵ Iyaka, hambele ha uchigya mauta, gusuchwa mgichi gwa ibuli, gwimsambilaguya mine gulihtangila giya nyama, Mme ibuli nyama gya uchela; yulu gushihubenja nyama gya guhiwe, gulihuunda nyama gya gibisi. ¹⁶ Iyaka, nambu guya mtu gabemsambila, Bashihulwa utula umashela mauta waahya, hanyuma wiguha byiunda luhuda lobe; noo ugana, Nambo bishi bibyo, alakini godogodo upe hano bino; nangu, usahupa, bibyo nisapa wa uoma. ¹⁷ Bibyo buubi bwabo babo bawalubaga bubele bwata abisa u meeso ma Mlume; bululi babo batu banenune lutangi lwa Mlume. ¹⁸ Alakini Samwele gubele mhugila u mbele wa Mlume, nage gubele na bawalubaga, mchwale kanju lya mgilo lya alili. ¹⁹ Iyaka gummitile kanju lya licho-licho, na ummilile mwaa wa mwaa, haya heligile hamwechi na mmage yulu yautangila nyama mwaa go gose. ²⁰ Nage Eli gummalile Elkana mihaa na mmachage, guganine, Mlume na guuhe bubushiu gugu mmachana, hanyuma ha usimba wilisimbile wa Mlume. Hanyuma bagile u ndu gyabo. ²¹ Nage Mlume gumlingamine Hana, nage guswalile gumo, gubutile baana, ba balumyana batatu na ba baachana babili, Nage gugo mwaana Samwele guulile u mbele wa Mlume. ²² Bibyo Eli gusibele mmungu abisa; nage guhuliche mwano gwa bikoko byose byine baana bage byabagilile Baisilaeli; na byabalalile na baachana bene babele hugila ha mchango gwa hema lya busambeno. ²³ Gubasambile yulu yai mulihuita bikoko nahi bibyo? Bululi nahulicha mwano gwa bihisho byenyu biibi u bano btu. ²⁴ Bishi bibyo, baana banyi, yulu mwano guno gwandihuhulicha gushi mwano gusoga; mwabalubya batu ba Mlume. ²⁵ Gumwe mtu gabemlubila miinage, Abetcha immonona; alakini nmbo mtu gabemlubila Mlume, m nanyi gwimdogomena? Alakini bshihuliche liidi lya sabo, wa ibalo Mlume gulingilile ka ubahaga. ²⁶ Na guya mwaana, Samwele, gugililile uula ichuli guhelwe iuku na Mlume, na u batu nabo. ²⁷ Hanyuma mtu gwa Abetcha gumgilile Eli, gumsambile Mlume gwagana bino, Wi wii! Nene nishilimoninye ichuli-chuli ynyi ya mego u ndu gya sobe, hababele uya Misili, hababele hugilila ndu gya Falao migilo? ²⁸ Wi wii! Nishimsobole gee hawingi ha bibushi byose bya Isilaeli, yulu gaabe ibuli yanyi; na hasele u butambikilo bwanyi; na uhulila aswenge, na uchwala kanjo lya ahwaba u yaali u mbele wanyi? Nene nishibahele batu ba ibushi ya bamasobe lutangi lose lwa nyama cha Isilaeli lwine lutangilwe waahya? ²⁹ Bululi bwai mulihuta agele lutangi lwanyi lwa nyama lwine luganinywe mnda bushamo bwanyi; ubanyeminye baana bobe upima nene, uoshe ulihemya nalutangi lose lwa batu banyi Isilaeli lwa lusoga? ³⁰ Bululi bwa bibyo, Mlume, Abetcha a Isilaeli, gwagana, M winene, niganine uba ndu gyobe, na ndu gya sobe bigi hugimana u mbele wanyi milumbu; Alakini bino Mlume gwagana, Ino ikoko na yabe koo nanyi; wa bibyo baya bene bali huunyemya nibanyemya, na baya bene bali humbedula bibalwa uba bashi atu. ³¹ Lingamina, masugu malihuchwa, handiugeda uboo obe, na uboo wa ibushi ya sobe, na mnda ndu gyobe mushibi na mmungu. ³² Gogwe wilola asusu a bushamo bwanyi, u bu mbona bose bwabihewa ba Isilaeli; na mnda ndu gyobe mushibi na mmungu mlumbu. ³³ Iyaka mtu gwa obe, mine gwandishibagula na butmbikilo bwanyi, gubi mtu gwa uubela meeso, na uuchigilicha mtima; iyaka babuswa bose ba mndu gyobe biiwa mengo mabihiya uba batu babaomu. ³⁴ Na ino noo isaga yine ibi obe, yibabanga baana bobe babili, Hofni na Finehasi; biiwa bose babili lusugu lumwechi. ³⁵ Nene niliginywina ibuli ya iwilile, mine gwiita ulamana na bihisho byose byinw bywndi nabyo mnd mtima gwanyi, na mnda malanga manyi; nene nimgubaila ndu gya giomu; nage gwigimanau mbele wa mshinyiwa gwa mauta gwanyi milumbu. ³⁶ Hanyuma habi, ugana mtu ge gese mine gwishigala mnda ndu gyobe gwigya umgandalila, yulu gahewe ihindi icho ya lusuu, na mkati gumwechi; na umsambila, Ibumbu ino, umbiya u mgilo go gose gwa bwibuli, yulu naoshe uya ata ihindi icho ya mkati.