¹ Fɛn ɲunman nataw yaa tin min sariyaa ra, nŋa koo yɛɛ tinti wo fɛnw na. Wee kanma, mŋɔ miinnu tin to ka kpaa Yaamasa ra ka saaka shi ken lashe san o san, sariyaa ma she ka wuw dapa abada. ² N'a tin dapara, nin yaamasa batobgaw tin sanniyara, aa ka jrumunw ma siyan kenpe ka ban, aa dosokunw tin ti n'a aa yaaki aa ka jrumunw shi kwora kun, aa tin na saakabɔ dabla. ³ Nŋa wo saakaw to ka mŋɔw yribla aa ka jrumunw na san o san. ⁴ Ka sɔɔ, toraw nin bakpɛɛninw yuu ti she ka jrumunw bɔɲin abada. ⁵ Wee kanma Krista naa diyan na, ee r'a fwɔ Yaamasa ye ko: E tinti saaka nin ɲinnifɛn fɛ, nŋa ee piisgoo jɔ didaa nee. ⁶ Saaka giin taw ni jrumunw yafa saakaw jɔshi kwo manji ye. ⁷ Wo sgaanna nen ko: E Yaamasa, ne nani de k'i sakoo kɛ, nafwɔ a sɛbɛnimun kitabuu ra ne kwora tin miin shi. ⁸ Ee r'a fwɔ gare ko: E tisaakaw ni ɲininfɛnw nin saaka giintaw nin jrumun yafa saakaw fɛ, ko wuw manji ye. Wo byɛ na ta, a byɛ saaka ka kanɲa ni sariya wee. ⁹ Wo kwɔ, en ko: Ne nani de k'i sakoo kɛ. Wo tgoo ra, ee batori kwo garee wri, ka flannaan sgi. ¹⁰ Yesu Krista Yaamasa sakoo kɛɛ, wo kanma ee r'a yɛɛ piisgoo ji kakɛ saaka min ye, an sanniya we baaka ra shiyan kenpe. ¹¹ Saakalashebgaw byɛ r'a jɔ dun o dun ka a' ka baraa kɛ. A saaka shi ken lashe shiyan shaanman, wuw ti she ka jrumunw bɔ ɲin abada. ¹² Nŋa , Krista re badaa saka kenpe lashe jrumunw kanmaa miin kɛɛ, ee r'i sgi Yaamasa kninboo fɛ, ¹³ ka makɔɔnri kɛ fwɔ a dguw r'a kɛ a sinkɔɔ daran ye. ¹⁴ Miinnu saniyanimu a' ka jrumunw ma, e wuw dapa badaa saaka kenpe r'e baaka ra. ¹⁵ Ni senu byɛ wo kwo shɛrɛya kɛ an fɛ. E r'a fwɔ ko: ¹⁶ Matgi ko: Ne na layru min ta a' ye, wo dunw tɛnmɛnni kwɔ, wo fɛɛ ɲin ye: Ne na ne ka sariyaw kɛ a' dosokunw na, ka a' sɛbɛ aa hakriw ra. ¹⁷ Wo fwɔnin kwɔ, en ko: Ne ti naan hakri to aa ka jrumunw ni aa ka teen biiya kwow ra kun. ¹⁸ Ayiwaa, nin wuw ka yafa ja miinna, jrumunw yafa saaka kpɛɛman ti bɔ kun. ¹⁹ We kanmaa nbaremanw, yarakpeyaa m'anfɛ ka dun ja senuman senuman kɔɔnna Yesu yuu bɔnni baaka ra. ²⁰ Yesu sra kula ɲranman dayɛɛ an fɛ min tɛnmɛn shoshɛtgɛ fnuu fɛ, wo kɔɔ wo, a yɛɛ piisgo o. ²¹ Saakalashebgaw kuntgii m'anfɛ, a sginiimun Yaamasa ka shoo kun na. ²² We ra to an kpaa Yaamasa ra nin dosokun sɛbɛ, ni danayaa dapani piɛni wee ɑn dosokunw saniyanin, fwɔ aa ti an yaaki kun, an piisgow kwoni nin je piɛnin wee. ²³ An to an dgi fwɔnii kan ka ɲɔɔrɔ a ra kwosɛbɛ, katgu min layruu ta, wo min kantgi ye ka a dapa. ²⁴ An jan to nŋɔn na yaako an ni ka nŋɔn tinminja kanuya nin kɛwari ɲunmaanw kɛrii ra. ²⁵ An k'a nŋɔn lajɛɛn dabla nafwɔ jɔɔ ra kɛ tinmiinshi nŋa an nŋɔn laji, yaako aa dɔn ko Matgi ka dun sruɲa na. ²⁶ Katgu n'an k'an tgu ka jrumun kɛ ka sɔɔ an min ka shɛɛn dɔn ka ban, jrumun yafa saaka shi ti ɲin kun, ²⁷ fwɔ kiti ni fyɛnbaa makɔɔnri wo, wo min sran kwo ba ree, wo fyɛnba na Yaamasa dguw giin ka ban. ²⁸ Nin mŋɔ min ka Musa ka sariyaa shɛn, wo r'a pka ni shɛrɛ fla wamaa saba ka shɛrɛya ye, hinna ti n'a k'ara. ²⁹ Nŋa min Yaamasa dincɛ dɔn a sin kɔɔ, ka Yaamasa ka layidu yuu jate fɛn nŋɔnni ye, a tin sanniyara wo miin fɛ, ka yɛɛkwo lakon tin Yaamasa ka nɛɛnman ɲin na, aa ti myiiri ko wo tgi ka kan ni tɔɔrɔba ye ka tɛnmɛn wuw jɔɔ taa kan kwosɛbɛ wa? ³⁰ Ka sɔɔ min na fwɔɔ ko: Hakɛɛ bɔ kwo min nee ma, nee na asaa, wo ni Matgii na kiti tgɛ a ka mŋɔw kan, an wo fwɔ bgaa dɔn. ³¹ Ka dun Yaamasa ɲranman boo ra, wee sran kwoba ree! ³² Nŋa aa yri to dun tɛnmɛnniw na.Wo waati ra, Yaamasa ka kɛɛn sɔɔnin kwɔ, aa r'e kɛɛba kɛ ka tɔɔrɔɔ munɲun. ³³ pan jɔ fɛ, aa kɛra fɛɛri fɛn ye aa tgɔ dguu fwɔrii n'a ka tɔɔrɔɔ kanma, woni kun mŋɔ kpɛɛ miinnu tɔɔrɔ ra tiin, an kɛra wuw jɛn nŋɔn ru ye. ³⁴ Aa hinna ra kaso ra mŋɔw ra. Mŋɔw r'a boofɛnw ml'aan raa sgan miin na, aa wo munɲuun nin ɲunshɔnja ye, katgu a' ra dɔn ko nafoo ban bii pisamaan min aa fɛ. ³⁵ Wee kanma aak'a dgi piyɛnii fri, wo braji ka buun kwosɛbɛ. ³⁶ Aa makwoo min munɲuni na, yaako ka Yaamasa sakwoo kɛ, wo kwɔ, ka layidu fɛn sɔɔ. ³⁷ kasɔɔ wati dɔɔni na tɛnmɛn ban, wo waatii man yan kun, miin ka kan ka na, we r'e na, wo ti n'a miɛn. ³⁸ Ne ka mɲɔ teen niin na ɲranmanya dananya wee baaka ra. Nŋa nin a ka seki kwɔ, akwo ti ja ne doso wee fyew. ³⁹ Miinnu seki kwɔ ka hraki, an kpin ti wuw jɔ ye, nŋa miinnu dananya kɛ ka a' ɲinw krishi, an min wuw jɔ ye.