¹ A mɛn na pan byɛ, kakaayaa min kɛra aa shɛma, min nŋɔn ti kɛra ari shiya kpɛɛw shɛma, wo fɛɛ ɲin ye ko aa jɔ ra fa moso taa. ² Aa ree min kunshɛbayaa kɛra hari byi! Aa ɲaan tin ka kan ka shishi kwosɛbɛ, yaa ko miin wo kwoo kɛ, wo raa kpɛn ka bɔ aa shɛma. ³ Ari nin ne ti aa shɛma ɲin piisoo ra, ne ɲiin min aa shɛma ɲin. Miin wo kwo dguu kɛ, nee kititgɛɛ wo ka ban, e nafwɔ ne tin min ɲin. ⁴ Ka aa lajɛnnin to Yesu tgɔ ra anin ne ɲiin fran na, an Matgi Yesu ka shebgayaa na kɛ an fɛ, ⁵ aa wo cɛɛ dun shitaannin boo ra, a piikoo raa hraki, yaaka, aɲin naa krishi Matgi Yesu ka duun na. ⁶ Aa ka yɛɛ boɲanrii ti bɛn! Aa maa dɔn ko fwuunnun fɛn dɔɔnin mŋu ɲɔɔnnin niin byɛ fwuunnun wa? ⁷ Aa wo fwuunnun fɛɛn kɔɔ bɔ ɲin, yaako a raa kɛ mŋu ɲɔɔni nin kla ye, fwuunnun fɛn ti miin na, sabu aa sanniyanin no, nafwɔ bwuru fwuunnunbii, katgu an ka tɛnmɛnkan saakaa pkara, wo min Krista ree. ⁸ Wee kanma an wo ɲannapiɛɛ kɛ, nŋa wo kaa kɛ nin fwuunnun fɛn kɔɔ ye, waamaa nin kɔɔnna dguyaa nin sɔnkronyaa fwuunnun fɛn wee, fwɔ dosokunpiɛninyaa nin shɛn bwuru fwuunnunbii wee. ⁹ Ne ra fwɔɔ aa fɛɛ ne ka sɛbɛɛ ra ko aa nin yashɔw kaa jɛn fwoyi ra, ¹⁰ nŋa diyan ɲin yashɔw kwo tɛ. Wasabiiw ni byikaninkɛraw ni josɔnnaw kwo tɛ. Nin wuuw re kwo tunmun, a tin na kɛ waajibi ye aa bɔ diyan na! ¹¹ Nŋa sisa nee miin fwɔ, wo min de ko: Mŋɔ miin kri ko bareman, nin wo min yashɔ ye, waamaa wasabii, jo sɔnna, waamaa nɛnnin kɛ ra, waamaa dɔɔshɔ, waamaa byinkaninkɛra, aa nin wo tgi kaa jɛn fwoyi ra. Aa nin wo bɔnŋɔnkwo mŋɔ kaa dunnin kɛ nŋɔn fɛ yɛɛ. ¹² - ¹³ Kɛɛnma mŋɔw ka baara kwoo min ne kunkwo ye wa? Yaa masa ree na kitiitgɛ wuw kan. mŋɔ miinnun min aa shɛma, aa m'ankan ka wuw ka kitiikwoo ɲannabɔ re kɛ? Aa kwodgukɛraw kpɛn ka bɔ aa shɛma.