¹ Ne pol, Krista Yesu ka ceradin sakoo baakaa ra, ka kanɲa nin a ka kriri wee, anin an baremancɛ Sositɛnɛn min sɛbɛ ɲin cera Yaa masa ka eglisi man miin min korɛnti, ² aa ye miin nun kri ra ka kɛ senunmanw ye ka aa bla aa danan ka saniya Yesu Krista ra, a nin miin nun byɛɛ an Matgi Yesu krista tŋ ɔ kri ja o ja. A yee min an nin wuw byɛ Matgi ye. ³ An fa Yaa masa nin Yesu raa nɛɛman nin dososhon ji aa ma. ⁴ Nee baaka da ne ka Yaa masa ye sgaan byɛ aa kwo ra a ka nɛɛma kanma, wo min jira aa ma Krista Yesu ra, ⁵ Ko aa bguyara fɛn byɛ ra a ye ra, fwɔ ka she komaa byɛ nin dɔninyaa byɛ ra, ⁶ katgu Krista shɛreyaa sabaatira aa shɛma. ⁷ Wo tgoora, ka aa to Yesu Krista yrarii makɔɔnri ra, Yaa masa ka ɲinfɛn shi ti dɛsɛ aa rá ⁸ A yee na aa sabaati kun fwɔ a laban na, yaako aa yaakibii raa sɔɔ Matgi Yesu krista ka duun na. ⁹ Yaa masa min kantgi ya. A yee raa krii ka kɛ a dincɛ an Mantgi Yesu jɛnnŋɔnw ye. ¹⁰ Baremanw, ne raa daare an Matgi Yesu Krista tŋɔɔ kanma: Aa kan kɛ ken ye. Paa k'a kɛ aa shɛma. Aa kɔɔn kɛ ken ye,wo kɔɔ o ŋanniɲan ken n'a kɛ aa raɑ nin myiiriya ken. ¹¹ Ne baremanw, a fwɔra ne fɛ kloe ka sho mŋɔw jɔɔ fɛ ko sɔsɔri min aa shɛma. ¹² Ne m'afɛ ka miin fwɔ, wo min de ko: Aaye jɔɔ ra fwɔ ko: Ne min Pol ta ye. Jɔɔ ren ko: Ne min apolɔsi ta ye. Jɔɔ byɛ ren ko :Ne min Piri ta ye. Jɔ kpɛɛman neen :Ne min krista ta ye. ¹³ Kista tran tran nin no wa? Pol kpeŋmera yri ra aa ye kanma wa? Aa batisera Pol tgɔ ra wa? ¹⁴ Nee baaka da Yaa masa ye, katgu ne ma aaye shi batise, nin Krisipusi nin Gayusi tɛ, ¹⁵ Yaako mŋɔshi kaa fwɔ ko aa batisera ne tgɔ ra. ¹⁶ Shɛn ro, nee Sitɛfanasi ka shokɔɔn na mŋɔw byɛ batisee. Nin nee mŋɔ kɛɛman batisee wu kwɔ, ne akri ti wo ra. ¹⁷ Krista ma ne cɛ ka batiseri kɛ, ee ne cee ka kibaro junmaan fwɔ nin mŋɔw ka akritgiyaa tɛ, yaako Krista kpeŋmeyrii kibarojunmaan kwoo kaa kɛ fwuu ye. ¹⁸ Krista kpeŋmeyrii kwo wanjurii min nalomanya ree hrakibgashɔw ɲan na, nŋa an ne miin nun krishi, an ne ɲan na, Yaa masa ka shebgaya ro. ¹⁹ A sɛbɛnin mun ko: Ne na akritgiw ka akritgiyaa shɛn, ka kwo dɔn naw ka dɔnniyaa kɛ fwuu ye. ²⁰ Wo ra sa, akri tgii min miin? Sariya kaanmŋɔw min miin? Waati ɲiin sɔsɔrikɛraa min miin? Yaa masa maa yra ko dinyan ɲin ka akritgiyaa min naromanya ya wa? ²¹ Yaa masa ka akritgiya min n'i yraa dinyan na, dinyan n'aka akritgiyaa ma she ka Yaa masa dɔn wo fɛ. Wee r'a to Yaa masa ree yaa latgɛ ka dananbgaw krishi wanjuri naromanyaa fɛ. ²² Yahutuw tgɛnmashɛ kabakwomanw nee ɲinni. Grɛkiw akritgiya wee ɲinni. ²³ An kpiin Krista kpeŋmenin kwoo wanjurii kɛ.Wo anjurii min kunnashɛnri ree Yahutuw ɲan na. Shiya kpɛɛw ɲan na, naromanya ro. ²⁴ Nŋa Yaa masa r'aye miin nun kri, Yahutuw nin shiya kpɛɛw kpin,wuw ɲan na,Krista min Yaa masa ka shebgayaa nin a ka akritgiya wee ye.