¹ Kwa biingi, ba kwami, muume na kyanya munda mwa Vidinyambi: Shiki shooka ku bw kwinyina ma kumo makadi mama, na jidi na faida jija jija kwenu. ² Mute angalisho na bwa, mute angalisho na batumishi banyinya, mute angalisho na badi teebwa jando banyinya. ³ Sababu badi teebwa jaando, ni bashwe, baki teela Vidinyambi witu abada kwa tima ja Vidinyambi, baki indumbula munda mwa Yezu kristo, na bashiki badila mukoba; ⁴ Mimi nami ni umanga na kyaku badila mu lukoba. Itu juungi wiku ivunia lukoba, ni taanga zaidi. ⁵ Mimi, wadi teebwa jaando lufuku lwa muanda, wa bukoo bwa Izraeli, wa kabila ka benyamini, mu Ebrania wadi butuka kwa mu Ebrania juja sheria ngidi mu farisao; ⁶ Juja juhudi fa tobwesha kanisa; shidi na kya kutakukidibwa, juja haki ja sheria. ⁷ Ila bindubiibi byadinange faida kwami, fabilola bidi bikasike, juu ja Kristo. ⁸ Na ngi lola bindu biibi byoso mbulele, juja ku lweela kwa ujuzi wa Yezu kristo Fumu wami juujaje nadi sama byoso, nangi bilolo bidi bitobo, kwamupata Kristo. ⁹ Naku bangibwa munda mwaje, kushidi na haki jaami, jeja jiki vila ku sheria, ila amo na jeja jiki ebwa kuzila ja imani ja kristo, haki jikiva kwa Vidinyambi ku zila ja imani. ¹⁰ Ili ku mujuka Kristo, na mbuta jaje ja ufufuko waje, na kulumbakana kwa bitoobwa byaje, na kuuma byadi ije munda mwa kufa kwaje, kwa kufika. ¹¹ Itu ni obanga, kwa ufufuko mukidi kya badi mota. ¹² ndaku boja titi fapata kale madipo, ao fa fikila kaba ukamilifu; ila ngi jena lubilo, kwa kuu kwata, sababu fa kwatibwa na Yezu kristo. ¹³ Bakwami, shikininga kuukomena; ila ngita kindu kikimo: Ku luba kidi nyuma na kwena busu, ¹⁴ Ngi jena lubilo kudi ukomo, kwa kupata madipo ja ku tambidibwa kwa Vidinyambi ùunda mwa Yezu kristo. ¹⁵ bashwe booso badi ba kamilifu, tuume na didi wazo didimo; na itu mudikwa zilajimo na wazo diingi, Vidinambi wi mu manisha. ¹⁶ Ila bobo, nga'nga atwadi komena, tu sumuke kwa atwa jijimo. ¹⁷ Munvate mimi, bakwami, na kulola baba baki sumuka kwa mufano mukimana kwitu; ¹⁸ Sababu kudi bavudile baki sumuka bidi ma adui ba musalaba wa Kristo, nadi mujongwela manajivudile, na ngiboja lungi mukudila. ¹⁹ Mwisho wabo wituula ngu kasika. Vidinyambi waabo ni ifu diabo, ba kita mbunda jabo ku kyekya kidi na buvu, baki waza bobo bindu bya dunia. ²⁰ Ila mukola wiitu ukata udi kujulu, kwa tuki dindila bidi mukombozi Fumu Yezu Kristo, ²¹ Wi fululanga lukoba lwitu lwa haibu, na ku luta lwa tuule sawa sawa na lukoba lwa mbunda, kwa mbuta adi najo ja ku fukamanisha kila kiindu.