¹ Okanisile boogegisa mosala balondisi na bahomi, sikisa, batoa kola la mobili anja, ² kangana djomala into, djala bantoa djedje; bato banja bato bawede anga bato bhu. ³ Angaa nabesu bei mosa bato badjede, bande inda basikisa yonga nda Mokonga, bato nde baheli, bande banobelai asuba bodjede ne gesile, bei bakpe na bei begeana besu na besu. ⁴ Che, mbeno nde bonja inda Mokonga Namisi'asu na ekondi ndae anga batoli aehangianine, ⁵ aaso lamisi amakanga te ama mobili ndasu aanja inde bei bekoli, che anga lokoo ndae, teisila la lobatiso a boteana la ngendo ibale asuba boteanala suba Meema Abhu, ⁶ inde ahanji a ngasu na meema imoti teisila-la Yesu Kilisito Namisi, ⁷ angaa, bengi suba bonja teisila-la lokoo ndae, angaa bebe asuba boosobela, baamena moandala bala beli meyo na meyo. ⁸ Yonga nde ande domi na ne kondi inte o lebee yonga nde, angaa bande banebei Mokonga bakole mobili anja. ⁹ Olenge inde aanja na ana boembo anga bato. Che okome boaka abobo, yonga-la tondana, yonga-la sani, boaka nde alengi salia angaa indo indana boembo na ande aboobo. ¹⁰ Ontuse antiao, tambusa hanalae inda imoti na hanalae inda ibale, imbe abhisa buana, ¹¹ na beubha sinde mamuna nto nde abungi, na akola nde bodjede na ae yola nde iye nganga. ¹² Mbeno nde nema ne ntea Alitemasi ndege Tishika nongoo, obhia uma dia nongo'ami Nekopoli; angaa iwa yeu neuma neika esala mbua. ¹³ Ootabele Zenasi, hangelisi a salia, bona Apolos a tamba ndabo, angaa babolai ema. ¹⁴ Abongi anga bande baasu bagole kola la mobili anja angaa beetabele bande basuba bungu, angaa baikai ama kanga botala la matonda. ¹⁵ Bande baiki na eme ani bao sesei. Oosee bande basokondi asuba lebea. Lokoo inda Mokonga abe na benu.