¹ Wamungolela ate wayadjimbese pe watemeye wadjodji la makumu, wayawongele la tomo kpaa ndamu, ² watiasele moto obe, watidje wato wabali kindo, watidje wato wasambo tetelake, wayatitimese atie wato kpaa. ³ Laate iso, todjakali liwoso wikete, wato waminga, wato wawungi, watuke wa posa ndenge la ndenge pe la mwemu. Tokalali la minga pe la mohela, todjakali otonani iso amene. ⁴ Kaikonde, ango olamu e Mwengei mokalesi mosu la libalano lande atie wato eenanali, ⁵ etidjake la tomo ndamu enge ekelaki iso, kasi motema magba ende atokalesi iso ndenge atokpoli pe atokpali la mokalo, pe atoumesi wato waholi la ligamesi e elimo satu. ⁶ Atoswelali iso elimo eho ngbii la mboka e Yesu Kilisito mokalesi mosu, ⁷ laate mbuse e oeneni wato walamu la logoo esungo ende, towumia watoti wa libula la ookani e olambeli mokalo mo libela. ⁸ Liloba laho lidjei meemene. Pe la sambo djaho, ibali ate oenesake eho engele kpaa la egalela ate edjei meemene, laate wato wango wamogemei Mwengei wabatake mamungo mawu la okeli tomo ndamu. Dhenda enge edjei olamu pe la kole atie wato. ⁹ Ase tona ogulani wo boli, matoto, oswi, mihela ma sambo dja pui, laate sambo djaho etiakole pe edjei pamba. ¹⁰ Inga moto apumbesa okawani moumisa lihele la owe, mbuse e omokebesi mbala e liwoso la enge ewale, mbuse motona, ¹¹ Yewa ate moto o ndenge eho aungi mboka, pe akokelaka lisumu, ayakwesi la loyi inde amene. ¹² Engele ikootomela Aletemasi inga Tisiki owe tila, kela ndenge kpaa laate odje atie nbai la Nikopolisa, laate ongo nde ebundoi mbai oetesi engele e pioo. ¹³ Mohekele Zenasi, ongo oyewi pui olamu, la Apolosa enge kpaa eengi la okendo wou, laate watidjange ema teeti. ¹⁴ Wato wasu pe wayekole okeli tomo ndamu la oengemesi posa djau enge edjei la kole, laate watidjange owoti pukapuka. ¹⁵ Wato kpaa wango wadjei mongindji la mbai wa ohi mobale. Ha mbaa la wato wango wakotobalaka iso ngbii ndondo e ogemei. Logoo osungu edje la ino kpaa.