¹ Polo, motuke mo Mwengei, mpe toma e Yesu kilisito la obileyi ogemei e wango Mwengei awaoni, pe la oyewi wo meemene enge eokani la ekaleli enanganake la Mwengei, ² la elikia liesi e mokalo ,mo libela enge Mwengei, ongo okokiti obuki moleho, awunate tee la gala. ³ Pe la engele ende aenasali liloba lande ohola la otomo etiesakolake enge wahekeli mbai, la otomami e Mokalesi mosu, Mwengei; ⁴ Atie Tito monga mo mbai e ogemei enge edjei iso kpaa la eho: Magba masungu la logoo e Mwengei wawa pe la Kilisito Yesu mokalesi mosu edje la owe. ⁵ Iyodheli la mokii mo Kelete, laate , owongele sambo djinge itisombaka olamu pe obate wiloko la gbate esi la esi, obileyi malako ma mbai. ⁶ Inga wadja pele wango wati la pamela, molome o moli moikima ongo odjei la wana walamu, wango watipundane la ekaleli e osoto pe wati mito mitetelake. ⁷ Laate mobanei akoki odjei moto ongo otipundane, laate adjei kapita e Mwengei, ati matioke, atimemelaka saa ndjongo, atidje mokengi o mona, atiswaka la wato, atitobaka wato, atidje moto o litema ongo okolukaka ototi wasumbelia la ndenge mbe. ⁸ Kasi adje moto ongo okoyambaka wadjidji, moto ongo okobalaka sambo ndamu, moto o mamungwene malamu, moto molamu, moto o meemene, mosatu, moto ongo okoatekisaka. ⁹ Ongo ohelani la sambo ndamu djinge itiesakolami, laate ayewe oaseli weeti matiesakoli masatu alidji ayewe opameli wango wakomalelaka. ¹⁰ Laate edjei la wamatioke, wato wango wakoasaakolaka saa ndjongo, wato wango wakobitesaka mamungwene, la oeteli wango wanangani la oteni kombeni. ¹¹ Okoki owahelesi monoko, lawato waho wakolingesaka ewedje la maliye ango ekotiesakolaka iwo sambo djinge ekokiti iwo otiesakoli, laate watote asumbelia ndenge ebe. ¹² Mwesi ndondo ewu motiesakoli mowu amene, aasali ate: Wato wa Geleta wakodjaka masio kpaa wato wa moleho, mbau mbe e motulu, wato wa litema wango watibalaka otomu. ¹³ Li litatoli edjei meemene. Eho enge, wapamelaka la otetelake, laate wadje la otetelake e ogemei, ¹⁴ Laate watiahelanese la sambo pambapamba e Wayuda mpe la pui e wato wango wakohaka meemene mokongo. ¹⁵ Wiho kpaa elangi atie wato wango walangi. Kasi atie wato wa osoto la wango wadjangi ogemei ema teeti edjangi olangi, tee mamungwene mawu la oyewi wau wowumiga gbomoko. ¹⁶ Wakoasaka la ohola ate wamoyewi Mwengei, kasi wakomowunganaka Mwengei la tomo djawu, laate wadjei wato wa onalili pe wati la otosi pe watiwonge la tomo teeti elamu.