¹ Yenia likolo poli la mbume poli, laate likolo egala la mbume gala eetali, koto ewale etidjaakali kine. ² Yenia koto gbata mosatu, Yelusalema poli, elongoyi likolo atie Mwengei, ekoyadjimbaka ewongesani koto nda moli o liwala ongo owongeli wenge la kole e molome onde. ³ Iokia moli mwesi motetelake elongoiya la ngbelengo e okumu, easia ate, ''Dhenga ebete eyabatake e Mwengei edjei ebete eikima la wato, akoyabata la iwo koto wakodja wato wande. Mwengei inde amene akodja la iwo. ⁴ Akohuhola poo e maiso mau kpaa, logo etidja kine, etidja kine te logo, te odhumbeyi, te ekoni koto etidja kine, odjidji etidja kine. Sambo dja gala iyeti. ⁵ Ongo oyabatali la ngbelengo e okumu aasali ate, ''Denga! ikokelaka sambo kpaa poli. Asia koto, ''Dhinga, dji sambo idjei dja meemene.'' ⁶ Aasali koto la mbai, ''Ekelania! Mbai idjei Alipa koto Omega, moto o liwoo koto o mbuse. Ongo odjei la ehoha e malia ikomoha pamba malia mango malongoyi la likaka e malia ma mokalo. ⁷ Ongo okolonga akotota lisango e wihoo waho, ikodja Mwengei onde, inde koto akodja mana o mbai. ⁸ Ase wato wa mbangi la wango wadjangi ogemei, la wango wa osoto koto wa onalili, la waoli wato, la wato wa pite, la wango wakokelaka tomo e milimo mbe, la wango wakoyakongoko la wilima, la wato wa moleho likao lawu ekodja ndondo e misa minge mikololaka. Enge einyei logo e wale.'' ⁹ Mwesi o waahumbwa sambo wango waikakali teni sambo djinge itumi la odjidji sambo ongo o gboo adjia, aasali ate, ''Djaka ahala. Ikoinya owe moli o liwala o mana o meme. ¹⁰ Akpalia mbai la okulu a elimo likolo mokoli mosungu koto ndai andjineia mbai moki mosantu, Yelusalema, ongo odil kakali olongoi ongo likolo atie Mwengei, la otwa e Mwengei. ¹¹ Yelusalema edjei la otwa wo Mwengei, koto ongali woho wodjei nda libukeli e motio , nda libukeli e yasipe enge ekongalaka nda malia ma malanga. ¹² Olai woho wodjeiaka wosungu adjali la milango liomu la miale, likolo la minge milango ndjongo waahumbwa liomu la wale, la kombo idhingani, djinge dja mawota liomu la male ma wana wa isalaele. ¹³ Ngambo ekolongwaka liwusawuse milango misato, ngambo e likolo milango misato, ngambo e midi milango misato, ngambo ekolangalaka moi milango misato. ¹⁴ Etutu e gbata eho edjakali la mabukeli liomu la iwale e moboko, likolo la minge miboko ndjongo nkombo liomu la iwale dja watutiani wa mana omeme. ¹⁵ Ongo odjakali wasi la mbai adjakali la mokombe nda ema epimelake nda wolo, la opimi moki milango mande la witutu wande. ¹⁶ Moki muho modjali nda ma enge edjei la wisuki winei, olai wo moki wokokanali la wokwe. Apimia moki la mokombe, atotia wipimo koto liomu la iwale; wolai, okwe la ango awodja ienganali. ¹⁷ Apimia etutu, atotia wipimo kama la tuku inei, epimo e moto enge edjali e aahumbwa. ¹⁸ Etutu eho wakeliaka la ema eweli iwo ate yasipe, moki modjali mo wolo mokwania la ema eweli io ate talatala. ¹⁹ Miboko ma enge etutu ndjongo e moki miwongesanali la mabukeli ma motio ma ndenge kpaa: moboko mungo mo liwoso modjali la ema eweli iwo ate yasipe, mungo mo wale modjali mosapili, mosato mo kalasedwane mungo monei mo Emelode. ²⁰ Mungo motano mo Salodonisi, mungo mo motoba mo Saladwone, mungo mo sambo mo kilizolia, mungo mo mwambi mo Belila, mungo mo libwa mo Topaze, mungo mo liomu silisopalase, mungo mo liomu la moikima mo yaseti, mungo mo liomu la iwale mo Ametisiti. ²¹ Milango liomu la miale maho midjali la mabukeli ma motio mpe ombeli wesi wesi adjakali la libungeli liesi liesi la motio ebete e liwange edjakali la wolo olamu, nda kopo enge ekoeneneke ngambo kpaa. ²² Itieniaka kine molako ndondo e moki; laate Mwengei inde amene aumiga molako inde amene, la mana omeme. ²³ Moki muho moidjali kine la mposa e moi posa e sandja la ongengesi moki, laate otwa o Mwengei ekomongengeseke, mana o meme bendele ende. ²⁴ Miki kpaa mikosomba la ongengi wonde, makumu ma mbume wakomoha otwa djau. ²⁵ Milango mande mitilihana la wuse, laate likolo litidja. ²⁶ Wakomoha otwa la mogano e miki kpaa, ²⁷ ase ema kpaa enge eti mosatu koto moto kpaa ongo okokelaka loyi eesi e osoto koto akobukaka moleho atilingela ongo, ndji wango wadhingani la buku e mokalo e Mana o meme nde wakolingela.