¹ Yenia ahumbwa akoyadjimbaka ongo likolo, aiki pungola e ebete e logo koto la mindjota la ewo ende. ² Ahelia dalagona, ndjo enge egala, enge emoweli iwo djabulu, inga etota, amokandjia la mindjota wilanga koto eesi. ³ Amolumbia la ebete e logo, alihia abatia elembo la ebete enge elingelake, laate atikose kine wato, ndji ango ekoenga wilango koto. Mbuse ango wakomoluhola ma engele keke. ⁴ Yenia koto wangbelengo e okumu, edjaali la wango wayabatelali eho, wawahali okulu esambesake. Yenia milimo ma wato wango watenanali mito la omototoli Yesu la kole e Mwengei, la wango watiyakongoli la mbau mbe koto la elima eho, la wango watitotali wilembo la wilongi wau koto la mawo mau wawongoia la mokalo, wakondjia la Kilisito wilanga koto eesi. ⁵ Wato wagbake wango watikalali watiwongwali la mokalo tee ango ilanga koto eengali. Ehele nde obasi wo poo. ⁶ Mwemu la wango wasuswali mbala e liwoso! logo lo wale loti la okumu atie ewu; wakodja wanganga-Mwengei wa Mwengei koto wa Kilisito, wakokala la inde ilanga koto eesi. ⁷ Ango ekoenga ilanga koto, Satana akopumba la woyogo ende. ⁸ Akopumba la owakosi wato wango wayabati la wisuki inei e moki Goge la Magoge, la kole e kindo. Motango mowu modjaali nda ngene e ewale. ⁹ Wayaandjali la mbume kpaa, walingali ebete edjaki oyabati wasatu koto gbata enge ebala iwo. Ase misa milongwali likolo eyadjimbia ewalakia. ¹⁰ Djabulu ongo odjaakali owakosi wato alumbanali la misa e supulu ebete mbau mbe la motiesakoli o moleho wadjaakali, wakoene odjidji likolo la wuse libela la libela. ¹¹ Yenia ngbelengo esungu e okumu ebubake, la moto ongo oyabatali likolo laho. Mbume la likolo etilali litilali liwoso lande, etidjaakali kine la ebete. ¹² Iwenia wato wagwake wato wasungu wasungu la wato wakeke wakeke, wayamalia liwoso la ebete e okumu. Buku iluhuania. Ase buku enge eeti edjaali buku e mokalo. Wato wango wagbake wasambesanali la sambo djinge idhingani la wabuku waho, la otutei tomo djau. ¹³ Ewale ewongolia wato wagbake wango wadjeiaka ongo, logo wo mbila ewongwesali wato wagbake wango wadjaali ongo, moto la moto asambesanali la otutei tomo djande. ¹⁴ Logo la mbila elumbania ongo la misa. Logo lo wale wuho, misa. ¹⁵ Moto ongo otidhingiaka iwo kombo ende la buku e mokalo wamolumbali la misa.