¹ Ienia koto mbau mbe epumbia la ewale, edjei la ndjeka liomu la mito sambo, la ndjeka djaho mangboka liomu, ase la mito maho kombo dja iliko. ² Mbau mbe enge eeneli mbai edjali nda mpange. Makolo mande madjali nda Uluse monoko monde nda simba. Dalagona amohali mbau eho okulu wonde koto ngbelengo ende e okumu koto okumu osungu. ³ Yenia moto monde mwesi nda ekondjoi ahue logo, okondjoi wonde wo logo wokalia. La mogano mbume kpaa emobiliali mbau mbe eho. ⁴ Wamogani dalagona laate amohali mbau mbe eho okumu, koko wayakongoli la mbau mbe eho la ehele engbundu, ''Ndai odjei nda ehele mbau mbe?'' Koto ''Ndai oengi osani la inde wita?'' ⁵ Wamohekelia monoko mokwasaka sambo mbe sambo ndjinge ileki obe, wamohekelia okumu laate akondje ilanga tuku inei la iwale. ⁶ Aluholia monoko monde la omoaseli Mwengei sambo mbe, la otangi nkombo ende la ebete ekwabataka inde, la wango koto wakwabataka ongo likolo. ⁷ Wamohekelia ate asane la wasatu koto awalonge. Wamohekelia okumu laate awakondje wato wango wadjei ahala la mbume, wato wa minoko kpaa, la miki kpaa. ⁸ Wato kpaa wango wakwabataka la mbume wakoyakonga la inde, wango nkombo djau itidhinganali la buku e mokalo e Mana o meme ongo oolanali, tee la lipotele e moki. ⁹ Ongo odjéi la wiokelo aoke! ¹⁰ Ongo moto okoke la wombo, akoke ndi la wombo, ongo okola la etogo wakomoola ndi la etogo. ango nde oiki mpiko la ondimi o wasantu. ¹¹ Alidji iyenia mbau mbe eeti epumbia la mbume, adjéi la ndjeka iwale nda enge e meme, adjaki owasi nda Dalagona. ¹² Nama eho ekelelakali okumu wo mbau enge e liwoso ndji ango mine edjei mbau eho, mbau eho ekelakali ate wato kpaa wango wadjei la mbume wayakonge la mbau enge e liwoso enge mpota ende e logo ekaliaga. ¹³ Edjaaki okeli sambo sungu sungu. Edjaaki okeli ate inga te misa milongwe likolo eyadjimbe tee la mbume la maiso ma wato. ¹⁴ ekoakosaka la wato wango wayabati la mbume la makamwisi mango ma mohekeleli iwo mboka liwoso la mbau mbe, ekoewesaka wato wango wayabati la mbume ate wakele elima e mbau mbe eho ease koto eolese wato kpaa wango watiakongoko la elima e mbau mbe eho. ¹⁵ Wamohekelia okulu okpomesake mbau mbe eho, mbuse eho mbau mbe ekpomia koto easia ate moto kpaa ongo oti la elombo e mbau wamoole. ¹⁶ Edjaaki otomi moto kpaa; wato wakeke la wango wasungu, wato waogumake la wango waotundake, wato wa lipanda la tuke, watote elembo la ewo ewu epele te la mbanda ewu. ¹⁷ Ate moto te mokikima atienge osombi te otambi inga atidje la elembo, la kombo e nama koto motango mo kombo ende. ¹⁸ Alandjo ongo odje la lokenge. Ongo odjéi la lomungo obolesane motango mo nama, laate edjei motango mo moto pele, koto motango monde modjei kama motoba la tuku motoba la motoba.