¹ Yakobo motuke mo Mwengei mpe la Likumu Yesu kilisito, atie malye liomu la iwale wango wayaandi: Mbaa! ² Wamanaima, eneni eho mwemu pendja, ango ekogbotonokoni ino la omekami ndenge la ndenge. ³ Weewini ate omekami e ondimi wanu ekodjesaka egalya. ⁴ Dhee ate ekaleli e egalia ekele otomo wou kpaa, laate odjeni wato wango wakoki la sambo kpaa pe wawongi la sambo kpaa, wato wango watidjangaka ema. ⁵ Inga mwesi la ono andjanga akili, aonge la Mwengei, laate inde akohekeleke wato kpaa la motema mo meemene, te la opami, akomohekele eho. ⁶ Kasi ayatate la ondimi, atidjee la kokya, laate inde ongo okokokya adjei nda mbonge e ewaale enge ehoho ekogbalaka la ekosombisaka wibete kpaa. ⁷ Enge ndenge e moto ndjongo atibundue ate otota ema aatie Likumu; ⁸ Adjei moto mo loho iwale, la olemalemi la esombeli djande kpaa. ⁹ Dhee ate maagbasu ongo odjei motundake ahemele la odjambemi onde. ¹⁰ Ase mogumi ahemele la otitimi onde laate akosalamata nda fulele e mote. ¹¹ Laate liusawuse likoumaka la ehela eho pe ekoomesaka isoki, pe fulele djaho ekokuaka, pe owongi woho wungo ekoeneneke la maiso ekosalamataka. Ndenge kikima mogumi akooma mboka e mokalo monde. ¹² Mwemu la moto ongo okodja la ondimi ndondo e omekami, mbuse e olongi djinge omekami, akotota okumu e mokalo, enge ewunate Mwengei la wango wakomobalaka. ¹³ Moto tueti, ango ekomekamaka inde, atiase: Mwengei akomekaka mbai. Laate Mwengei akokiti omekami la sambo mbembe alidji inde amene akikiti omomeki moto la ndenge eho. ¹⁴ Moto la moto akomekama la posa ende amene enge ekomogbalaka alidji ekomogulaka. ¹⁵ La mbuse posa eho, engo egbalia eho lemi, ekowota lisumu, ango ekelamia lisumu, ewotia logo. ¹⁶ Otiakoseni, wamanaima wa libalano. ¹⁷ Sambo ndamu kpaa alidji likawo kpaa ekolongwaka likolo, laate ekolongwaka atie wawa e miinda. Pe inde atiakukolaka nda elima. ¹⁸ La mokano monde amene, atowoti la mboka e liloba e meemene, laate iso todje ndondo pukapuka e poo wiho e wikelamu wande. ¹⁹ Yewani lu loyi, wamanima wa libalano: Moto kpaa akoki ookani obangu, ndou la oasi, ndou la ooki limemu. ²⁰ Limemu la wato etikelaka olamu e Mwengei. ²¹ Eho enge, lumbani obe kpaa la ekaleli enge e limemu, pe ndjimani la logoo liloba linge ekoki o okalesi milimo manu pe eyabate ndondo enu. ²² Wumani watemei wa liloba, te ndji waoki la ekosako e ino amene la mamungwene mbe. ²³ Inga inde ongo okooka liloba ase atikelele adjei nda moto opele ongo oyadengi mbanda e ende la talatala. ²⁴ Ongo mbuse e waadendi, akia, awosania ndenge edjei inde. ²⁵ Kasi moto ongo okodendakolaka la pui ndamu, pe e lipanda pe akoyakika la eho, moto oho, nda oumia inde mooki ongo otiosanaka, kasi moto ongo okokelaka otomu, akodja la mwemu ndenge ekokelelaka inde eho. ²⁶ Inga moto akoeneke ate akoakongoko la ndenge ndamu, kaikonde atitekisaka lolemu londe, akokosaka loho londe amene, oyakongi e moto oho edjei pamba. ²⁷ Oyakongi enge elangi pe eti la onalili la maiso ma Mwengei osu pe wawa eho lele: Ogamesi watike, wali wango wagueli pele la odjidji wowu, otoni owudjani la moki.