¹ Polo, motomami, atibatane la wato, koto te la mboka e wato, ase itomani la Yesu Kilisito koto la Mwengei Wawa, ongo omobasisali yesu ndondo e wato wagbake. ² koto wamanima wango wadjei la mbai ongo la mangomba ma Wagalatia: ³ Magba ma sungu la logoo e Mwengei Wawa osu koto la Likumu Yesu kilisito edjeni la ino. ⁴ Ongo oyahekeleli inde amene la kole e masumu masu, laate atolongose la dji sambo mbembe dja moki mo ehele engele, la ookani e mwano mo Mwengei osu koto Wawa. ⁵ Inde odjei la otwa libela la libela. Amena! ⁶ Ikokamwaka ndenge ekolongwaka ino galagala pendja atie moto awowelalini ino la logoo esu e Kilisito, koto okobiliakani eeti mboli ndamu. ⁷ Kaikonde, eti eeti mboli ndamu; edjei nde la weeti wato wango wakoobatakani la ewedje koto wakolukaka obitesi mboli ndamu e Kilisito. ⁸ Kaikonde, inga mwesi la iso, te ahumbwa mwesi ongo olongoyi likolo, adja ootiesakoli ino mboli ndamu enge eengiti la enge tootiesakolini, abumakolame. ⁹ Ndenge elongoi iso oasi, mbai pe iyaseli eho alidji sikala ate: moto ongo okootiesakolani mboli ndamu enge eengiti la enge eyambalini ino, abumakolane. ¹⁰ Sikala, ikolukaka ogemeisi wato Mwengei? Inga ikolukaka oyemelesi wato? Inga idjei yo oyemelesi wato, iti motuke mo Kilisito. ¹¹ Ikowaaselakani, wamanima, ate mboli ndamu enge etiesakoli mbai etidje la wato. ¹² Ititotali eho atie wato, moto toeti koto atitiesakolali mbai eho, ase Kilisito nde ayinyali mbai eho. ¹³ Ookalini mboli e esombeli e mbai e gala la losambo e Wayuda, ate idjali oenesi odjidji liboliani wo Mwengei pe idjali oluki owandjakoli. ¹⁴ Pe idjali oki liwoso ndondo e losambo e Wayuda, oyeti wato ngbi wango wadjei mimbati ma mbai ala la moki mo mbai, laate idjalikali la egalela pendja la loyi e ekaleli e watata wa mbai. ¹⁵ Kasi esi engele Mwengei, ongo opumesi mbia la solo dja ima pe ongo owelali mbai la logoo ende. ¹⁶ Ango aenali olamu omwenesi mana onde la mboka e mbai, la otiesakoli wiondo mboli ndamu ende, itikeli omohueli moto tueti. ¹⁷ Mpe mbai ititelali la yelusalema, etie wango wadjakali watoma liwoso la mbai, kasi ikeli liwoso la Alabia mpe iwongwali alidji la Damasi. ¹⁸ Mbuse e mbula isato, itelali la Yelusalema la yewesani la Kepasi, mpe ikelali masio liomu la matano etie inde. ¹⁹ Kasi itieneneli la weeti Watoma, omolongosi Yakobo manango e Likumu. ²⁰ Itibubukaka lokuta ladji sambo ikokodhingaka mbai, liwoso la maiso ma Mwengei. ²¹ Mbuse ikeli la miki ma Sulia mpe la Silisia. ²² Kasi mangomba ma Yudea mango madjakali la ookani la Kilisito etiyewali elongi e mbai. ²³ Waokakali sa wato wakoasaka: Moto ongo odjakali otonyokoli liwoso, adje sikala otiesakali mboli ndamu e ondjimi enge inde adjakali liwoso owandjakoli. ²⁴ Wadjakali omotemei Mwengei la loyi e mbai.