¹ Wamanima wa libalano, ehele edjei sikala ahala o wale mungo mokoodhingelakani mbai ino, enge ndondo eho, nda ahala e mbai e poo, idjaaki o okundueli ino sambo laate isusole atie ino lokenge enge elamu ² laate obundweni alidji maloba mango maasanali gala la watiesakoli wasatu alidji pui e Likumu pe Mokalesi la mboka e watomani wanu. ³ Oyewini liwoso lu loyi, la masio ma gboo wadendei wakodja la dendjia djau. Wakosomba la ototieyi wihoha wau amene. ⁴ Wakoasa ate: eni owongoyi wonde enge ewunanali? Kaiko tee lisio linge lipotate ogwi watata wasu, sambo kpaa edjaki okelani ndji ndenge kikima nda lipotele e moki. ⁵ La otutei ehoha ewu, loyi lokoosanaka iwo lele: Likolo lidjei tee gala la mbume tetelake enge epumbate la malia pe la ndondo e malia e liloba e Mwengei, ⁶ pe la mboka eho moki e engele eho ebitanate ango e lindate eho la malia. ⁷ Kasi ndji la mboka e liloba eho likolo la mbume enge edjei sika, eisani la gbondo e misa pe ekobanyanaka la obilei lisio lisatisamake pe e obitesi wato wango wakodendjiaka Mwengei. ⁸ Kaiko nde, wamanima wa libalano, otiosanakeni lu loyi, la maiso ma Likumu lisio liesi lidjei nda wilanga mbuka esi pe wilanga mbuka esi nda lisio liesi. ⁹ Likumu atiwumisaka sambo la liwuna lande, ndenge wadji wato wakodhendelaka oumisi sambo, kasi edjei nde oeneseli ino motema molai laate abaliti moto te mwesi aolane kasi abali nde wato kpaa wakukole motema. ¹⁰ Kaiko nde, use wo Likumu wokodja nda moto iwa: Ase la use wuho likolo likoeta la modudu motetelake, kasi wiho waho nda ekouma eho misa wikosalamata, pe mbume la tomo djinge idjei ango ikoenene la hoho. ¹¹ Ndenge moki mosu kpaa mokosalamata, bundwani nda ndenge e wato wango waengi ino odjei? Oengini nde odjei wato e esombeli esatu pe la okeli tomo djinge ekoeneneseke ate onanganini la Mwengei. ¹² Lambelakani pe banyakani la mamungwene manu lisio liwongwake e Mwengei, lisio linge likolo likolongola la misa, pe ekosalamata la wiho waho, nda ekouma eho misa mitetelake, ekonangwana. ¹³ Kasi tokolambelaka likolo liholi pe mbume eholi, ndenge euni inde, pe ongo, sambo ndamu ikodja. ¹⁴ Eho lenge, wamanima walibalano, nda ekolambelaka ino djinge sambo, kelani djinge kpaa eengi la ino laate gboo eho atiogboteni la litono te la obe kasi la logoo. ¹⁵ Alidji, dhendelani motema molai mo Likumu lasu ate edjei mokalo, ndji ndenge mangbasu o libalano Polo aodhingelalini pe ino la lokenge lungo wamohekeleli. ¹⁶ Polo aaselali sambo djaho ndji ndenge pe akokelaka eho la waahala wande kpaa. Kaikonde la ndondo, djeeti sambo widjei paima ate moto ahele kole eho, enge wato wango watitiesame pe wango wamaaniti wakokukolaka eho ndenge eeti, ndji ndenge ekokelaka iwo la madhingo madji kpaa matikali, la obitani ewu amene. ¹⁷ Eho lenge, ino wamanima wa libalano, nda eyewi ino eho liwoso, huakani laate otikpalaneni mongindji la iwo la liwunga e wato wango wakobukaka pui pe otidheeni edjeeli enu e omaani etetelake laate otikweni. ¹⁸ Kasi djaakani ndji obeki ndondo e magba masungu pe e oyewi e Likumu lasu pe Mokalesi Yesu Kilisito. Otwa odje la inde keke pe la masio kpaa. Amen.