¹ Kaikonde edjei pe la watiesakoli wa moleho ndondo e wato, ndenge kikima pe ekodja la wamwalimo wa moleho ndondo enu. Wato waho wakolingesa la lokenge ma masambo mango makobitisaka, pe wakomowungana te Likumu ongo owasombali iwo, wakoyadjeesele obitani galagala. ² Ngbii wakobileya sambo djawu e esombeli e ndundu, pe la loyi e iwo mboka e meemene ekotangema. ³ La ononi owu, wakoolakelani ino wiho la maloba ma moleho. Kasi etumbu enge wawatenela iwo opoti gala etiumua kine, pe obitani wowu wotilangala kine ilo. ⁴ Inga Mwengei atiyatekisali ohekeli waahumbwa wango wakelate masumu etumbu, kasi awayetelali galagala, awanangali la mindjota pe awalumbia la liwela e molili, laate walambele osambisami. ⁵ Pe inga atiatekisali ohekeli moki mo gala etumbu, kasi amobanyali Noa, motuke mo sambo ndamu, la wadji wato nsambo, ango edjeesali inde pela la moki mo wato wango wadjakali omodendeyi Mwengei. ⁶ Pe inga aumesali gbata dja Sodomo la Gomola miwusu ma misa akweseli eho la loyi, ahekelali wato wango wakomodendjiaka Mwengei ekpangele e sambo djinge igeleli. ⁷ Inga akalesali Lota moto o sambo ndamu, ongo odjakali oyakongi la bolo la loyi e wato wango wakobukaka pui wango wayahali la esombeli e ndundu- ⁸ laate moto molamu oho, la loyi e sambo enge edjakali inde oeni pe ooki ango edjakali inde oyabati lisio la lisio ndondo ewu, adjakali ookesi molimo monde mo sambo ndamu magba la sambo djau e bukake pui- ⁹ likumu ayewi okalesi la omekani wato wango wakonanganaka la Mwengei, kasi oyisi la lisio e osambisi wato wango wadjangi sambo ndamu laate waolame. ¹⁰ Kaikonde, wango wakotutiaka wenge la ehoha e obitesi eho, pe wango wakodendjiaka okumu. Watiwangaka sambo, wadjei wamatioke, watingilimaka liwoso la wato wango wadjei la otwa, kasi wakotangaka. ¹¹ Waahumbwa inga te ate wayeti otetelake la okulu, watiwapundaka la maloba ma wiliko, la ebili ate wakomotemeyaka Likumu. ¹² Kasi wango wato, la sambo djinge eyewiti iwo pe wakotangakolaka, wakobitisana la mboka ewu enge ekokeke la logo, nda nama djinge idjangi lokenge wango wakowotamaka ndji ate wanangame pe waolame. ¹³ Wakoyakelelaka obe iwo amene pe eho nde liputi dja tomo djau mbe. Atie ewu oemelisi wenge la use nde mwemu. Wato waungi mboka pe wato wa onalili, wakoyahekeleke la mwemu e matiesakoli mawu ango ekolakaka iwo yenga enu. ¹⁴ Maiso mawu etumi la iteba, pe etiengaka odhei lisumu, pe wakogulaka milimo minge mimaaniti. Motema mou ehahani la ononi. wadjei wana wa mbumakolo! ¹⁵ Wadheiya mboka enge enanolani, waungi, watuteya mboka e Balama, mana o Beolo, ongo obalali liputi e sambo mbe. ¹⁶ Kasi atotali pamela laate abukali pui; punda enge ekokpalaka mikpali pe enge etiasaka, easali la moli nda moto pe enangelali wokete e motiesakoli moho mboka. ¹⁷ Wadjei wiliwa witii la maliya, pe ligite linge ekokpalanaka la eheho etetelake, pe wawaiseli likolo eindake. ¹⁸ La ebili ate wakopumbesaka maloba ma elolo enge eti akole, pe la ehoha e wenge la ekaleli e soni wakogulaka wango wapoti otili wato wango wakoyasombesaka la liwunga. ¹⁹ Wakowawunelaka iwo lipanda, kaikonde iwo amene wadjei mituke ma obitani. Laate ongo olongami la odji moto aumiga motuke e ongo moto. ²⁰ Inga mbuse e otili osoto e moki la mboka e oyewi wo meemene e Likumu pe mokalesi Yesu Kilisito, wawongosia alidji sambo djaho pe walongania, gboo ewu eumia obe oyeti ndenge edjakali iwo liwoso. ²¹ laate eengali odjei olamu inga watiyewake pendja mboka e sambo ndamu la ebete ate wayewe eho ase mbuse wakukie mokongo la pui mosatu enge wawahali iwo. ²² Liloba e li lisekpe enge e meemene eengisami atie iwo: Mbwa ewongwanelia wilaka winge witoholi inde, pe ngoya enge ekpoli iwo ewongoiya alidji oyabuluki la mokpodho.