¹ Wango kpaa wadjei mituke, adhendele makumu mawu laate waengi la mogano, laate kombo e Mwengei la matiesakoli mande matitonane. ² Alidji, wango wadjei la wiloko wango wadjei wagemei watiwadendjiake, la ndenge edjei iwo wamaangbasu; kaiko wawakelele alidji olamu oeti, laate wango wakototaka kole la otomo owu e olamu wadjei wagemei pe wamaangbasu wa libalano. Tiesakola djinge sambo pe la ohekeli djinge egalela. ³ Inga moto akotiesakalaka djeti matiesakoli pe atindjimaka maloba mango makohaka kole, enge e Likumu lasu Yesu Kilisito, pe litiesakoli linge liokani la ekaleli e nanganake la Mwengei, ⁴ Akundji la elolo, ayewiti ema, adjei la ekoni la moto, la obatani kokia pe la osuameli maloba; djinge sambo ekopumbesaka mohela, oswi, maloba ma iliko, obundoli weeti obe. ⁵ Owumesani maloba obe la sambo pamba e wato wango wabiti mamungo pe wati la omeemene, wango wakobundwaka ate onangani la Mwengei edjei mboka etotake kole. Yakatola la ndenge eenge wato. ⁶ Ekaleli enge enanganake la Mwengei la ekaleli e oemeli la enge edjei owe la eho edjei mboka etotake kole e sungu. ⁷ Laate totidjaali la ema la moki, pe totike la ema. ⁸ Eho lenge inga todja la ilaka la wisindje, toemele la wiho waho. ⁹ Wango wakobalaka wawume wagumake, wakokwaka la omekani, la lisala pe la posa ngbii e ekete pe enge ekookesaka ekoni, enge ekolindjisaka wato la obitani pe la libhoma. ¹⁰ Laate libalano e wambele edjei ndjili e sambo mbe e ndenge kpaa, pe nda wadji wabekesi libalano laho wawusiga mboka pe wayalumbia iwomene la odjidji. ¹¹ La owe, moto o Mwengei, tila djinge sambo, tutia olamu, ekaleli eyahelake la liloba, ogemei, libalano, odjéi la egalala, odjei logoo. ¹² Sana kindo elamu e ogemei; hela mokalo mo libela enge woowelelali owe pe ondjimaali la hoho lihoso la watotoli ngbii. ¹³ Liwoso la Mwengei, ongo okohaka mokalo la wiho kpaa, liwoso la Yesu kilisito, mototoli ongo oasali la hoho liwoso la Poso Pilato, ikootomaka, ¹⁴ ate otemeye pui wuho e olangi alidji otipundane la loyi tee la oeneneni e Likumu lasu Yesu Kilisito. ¹⁵ Oeneni woho, Likumu sa mwesi e mwemu akoinya la engele eho enge ebatana; inde Memene e wamemene, Likumu e makumu, ¹⁶ ndji inde amene ongo oengiti ogwi, akoyabataka la hoho enge moto tueti akokiti omoeni; Atote mogano la okulu wo libela. Amina. ¹⁷ Waasela wagumake e ma masio watidje la elolo, alidji watibate mamungwene mawu la ogumake enge ekoki owungi keke te leekundu, kasi atie Mwengei, ongo okotohaka iso wiho kpaa sa bingo laate iso toemele. ¹⁸ Wakele sambo ndamu, wadje wagumake e sambo ndamu, wadjake mawo petee, wato wayewi okawi; ¹⁹ Wakoyaisela wiho wa motio la masio mageleli enge eyabati la esuleli elamu enge emayi iwo laate wahele mokalo mo libela. ²⁰ Ee Timoteo, bania ema enge eisami atie owe, tona okpomakpomi pamba enge ekobitesaka sambo djinge edjei osatu pe maloba ma kokia e yewake moleho; ²¹ nda wadji waenesali la elolo ate wadjei la oyewi ehonde wadhei ogemei.