¹ Polo motutiani mo Yesu Kilisito la otomo e Mwengei Mokalesi mosu Pe la Yesu Kilisito Elikia esu. ² Atie Timoteo, mana ombai omeemene ndondo e ogemei: Magba masungu, moteme magba, logoo e Mwengei Wawa pe e Yesu Kilisito Likumu lasu edjee la owe. ³ Ango ebalali mbai oki la Masedonia, iyowaselali otikale la Efeso, laate owahekele wadji mitindo ate watitiesakolake djeti mateya. ⁴ Watiyahelese la masekpe ma moleho pe la matoto ma watata mango mati la kole, kasi enge ekopumbesaka ewedje la ebete okeleli otomo e Mwengei enge ekoengaka la ogemei. ⁵ Gbondo e ma matiesakoli edjei libalano enge ekodjaka la moteme molangi, la oyewi enge elamu pe la ogemei enge edjangi moleho. ⁶ Wadji walongoyi la ehele mboka wayahia la okpomakpomi edjangi ema. ⁷ Wabali odjeyi watiesakoli wa pui, kasi watitenaka gbondo e sambo ndjinge ekoeneseke iwo la mohandja ate edjei meemene. ⁸ Sikala toyewi ate pui ekodjaaka olamu inga moto akelela eho la ndenge ewongi. ⁹ La oyewi olamu ate etikelamali la wato walamu kasi la wato wadjangi omeemene, wato wa minga, wato wango wakodhendjiaka Mwengei la wato wa masumu, wato wango wadjangi motema magba pe wato wango wakodhendjaka wiho wisatu. ¹⁰ Wato wa ndumba, wato wango wakolangalaka pele la pele pe wali la wali, watambi wa wato, wato wa moleho, wato wango wakolapaka la moleho pe la sambo kpaa enge ekoyamalelaka mateya mango makohaka kole. ¹¹ La obilei mboli ndamu e dombwa e Mwengei e mwemu enge wahekelali mbai. ¹² Ikomodombwaka Yesu Kilisito Likumu lasu, ongo ohekeli mbai okulu, laate aeneli mbai meemene la ndenge ahali mbai otomo, ¹³ te liwoso idjakali otangi pe oenesi odjidji pe idjakali moto o minga. Kaikonde wandjokelali mbai magba, laate itidjakali la oyewi pe itidjakali la ogemei. ¹⁴ Kasi magba masungu e Likumu lasu etumali likolo la mbai la ogemei la libalano la ookani la Yesu Kilisito. ¹⁵ Li liloba lidjei meemene pe ewongi ondjimi ate Yesu Kilisito adjali la moki la okalesi wasumuki. Ndondo ewu mbai moto o liwoso. ¹⁶ Kaikonde, waokelali mbai magba laate la mboka e mbai moto o liwoso, Yesu Kilisito aenesali motema molayi monde kpaa laate idje ekpangele e wango wakomogemeya inde la mokalo mo libela. ¹⁷ Sikalandjo, Likumu o libela, ongo okokiti oholi, ongo otieneneke, inde Mwengei mwesi, atote mogano la otwa libela la libela. Amina. ¹⁸ Mana o mbai, Timoteo, ikohekeleke ehele otomo, la maokani e matiesakoli enge e oaselali, laate la mboka eho osanake kindo e molimo. ¹⁹ Obanye ogemei pe mamungwene malamu, mango wadji walumbi pe ogemei wowu elindji nda andondoli. ²⁰ Imena la Aledjandela wango iwalumbi la mawo ma mondjili laate wayewe ate watimotangaka Mwengei.