¹ Wamanaima wa libalano, otindjimakeni elimo kpaa, kasi mekakani elimo eho la oyewi inga wadjei wa Mwengei, kasi mekekeni maloba maho la oenesi inga elongoyi pendja atie inde, laate ngbii e watiesakoli wa moleho wapumbiga la moki. ² Yewani liloba e elimo elongoyi atie Mwengei la lu loyi: Elimo kpaa enge ekondjimisaka Yesu Kilisito ate adjali la wenge e mwini elongoyi atie Mwengei. ³ Kasi elimo kpaa enge etiganaka Yesu, etilongwe atie Mwengei. Eho edjei elimo e moyamaleli mo Kilisito enge eokalini ino ate ageleli, pe sikalandjo edjiga la moki. ⁴ Ino wana wakeke, olongoyini atie Mwengei , pe olongini wango wato, laate moto ongo odjei la oboliani mongindji la ino aeti moto ongo odjei la oboliani mongindji la moki. ⁵ Iwo walongoyi la moki; eho enge wakoasaka sambo djinge elongoyi la moki pe moki mokwaokaka. ⁶ Iso tolongoyi atie Mwengei. Moto ongo ototi oyewi e Mwengei akotookaka; moto ongo alongoyiti atie Mwengei atitookaka. Edjei la ndenge eho nde tokoyewaka elimo e meemene la e limo e liwunga. ⁷ Wamanima wa libalano, tobalane iso la iso, laate libalano elongoyi atie Mwengei, pe moto kpaa ongo akobalaka, awotami la Mwengei pe ayewi Mwengei. ⁸ Moto ongo otibalaka amoyewiti Mwengei laate Mwngei adjei libalano. ⁹ La lu loyi nde libalano la Mwengei eenisani la hoho la iso, laate Mwengei atomali la moki mana onde saa mwesi ongo owotamali laate iso tokoke ototi mokalo la mboka ende. ¹⁰ Libalano laho, eti ate iso nde tomobalali Mwengei, kaiko nde ate inde moto otobalali iso pe amotomali mana onde adje likawo la odhihi masumu masu. ¹¹ Wamanaima wa libalano, inga edja ndenge eho nde Mwengei atobalali iso, iso amene pe tokoki obalani. ¹² Moto tweti atimoeneli Mwengei. Inga tobalana iso la iso, Mwengei ayabati la iso pe libalano la inde lilamu eengi la iso. ¹³ Tokoyewaka ate toyabati la inde pe inde ayabati pe la iso laate atohekeli elimo e inde. ¹⁴ Iso amene toeni pe togemei ate wawa amotomi mana nda mokalesi e moki. ¹⁵ Moto kpaa ongo okoasa la hoho ate Yesu adjei mana o Mwengei, Mwengei ayabati la inde, pe inde la Mwengei. ¹⁶ Pe iso amene toyewi pe togemei libalano linge Mwengei adjei la eho atie iso. Mwengei adjei libalano, pe moto ongo ayabati la libalano, ayabati la Mwengei, pe Mwengei la inde. ¹⁷ Libalano ewumi eengake atie iso la ndenge ehele, ate iso toase la hoho pe la omeemene lisio la osambisi laate ndenge ohongo moto adjei, iso pe todjei ndjongo la mu moki. ¹⁸ Ndondo e libalano owangi etidjaka, kaikonde libalano liengake ekoumbaka la owangi, laate owangi ekobataka ohiani. Moto ongo odjei ndondo e owangi, libalano lande liengakiyo. ¹⁹ Nde iso, tokomobalaka laate inde koto atobalali liwoso. ²⁰ Inga moto aasa ate: Ikomobalaka Mwengei, kaikonde atimobalaka miino onde, adjei moto o moleho. Laate moto ongo otimobalaka maanango, ongo omoeni inde, aengiti omobali Mwengei, ongo otimoeneke inde. ²¹ Pe tototi pui ehele atie inde, ate moto ongo okomobalaka Mwengei akomobala pe miino onde.