¹ Wana wa mbai, ikoodhingelakani dji sambo, laate otikeleni lisumu. Kaikonde, inga moto akela lisumu, todjei la mwaseli mwesi atie wawa, Yesu Kilisito moto molamu. ² Adjei inde amene mbau e mbondji la odhihi mawunga masu, eti saa enge esu amene, kasi pe e moki kpaa. ³ La lu loyi nde tokoyewaka ate tomoyewi, ebali aasi ate, inga tokobaniaka pui djande. ⁴ Ongo akoasa: imoyewi, kasi atikelelaka pui djande, adjei moto o moleho, pe meemene eti ndondo e inde. ⁵ Kasi ongo okobaniaka loyi londe, libalano la Mwengei liengemeni ndondo e inde. La likambo eho toyewi ate todjei ebete e kikkima mongindji la inde. ⁶ Ongo okwasaka ate ayabati lainde akoki osombi mpe ndji nda inde amene. ⁷ Wamana ima wa libalano, eti pui e holi enge liodhingelini mbai ino, kasi pui e gala enge etotate ino tee la lipotele. Pui eho e gala, edjei loi lungo liokalini ino. ⁸ Mbala kpaa edjei pui esi e holi nde ikoodhingelakani, ehele edjei loyi lo meemne la ino pe la inde, laate likolo e koyetaka pe hoho e meemene etaniga. ⁹ Moto ongo oasi ate adjei la ngbai, ndjongo akomotonaka manango, adjei ndi ndondo e likolo. ¹⁰ Moto ongo omobali manango adjei ndondo e ngbai la eho ati la ndenge teeti esakelake ekikimi. ¹¹ Kasi moto ongo okomotonaka manango adjei ndondo e molili, akosombaka la molili mpe akoleiti eni ekokeke inde, late molili limolihi maiso. ¹² Ikoodhingelakani, wana, laate masumu manu malibisami la gbondo e kombo e inde . ¹³ Ikoodhingelaka, wawawa, laate omoyewini moto ongo odjei tee la lipotele. Iyodhingeli, ndjenga; laate omolongini moto mobe. Iyodhingeliani, wana wa keke, laate omoyewini wawa. ¹⁴ Iyodhingeliani wawawa, laate omoyewalini inde ongo odjei tee la lipotele. Iyodhingeliani ino, ndjenga odjeini la oteteli, pe liloba e Mwengei liabati ndondo e ino, pe olongiani moto mobe. ¹⁵ Wotibalakeni mu moki, te wiho winge windjei lainde. inga moto mwesi abala moki, libalano e wawa eti ndondo e inde. ¹⁶ Laate wiho djinge edjei la moki, posa dja wenge, posa e maiso, la elolo e wiho e okaleli, lidjiti atie wawa, kasi lidji la moki. ¹⁷ Kasi moki mokoeta, la sambo djaho meemene,kasi ongo okokelaka enge ebali Mwengei akokala libela la libela. ¹⁸ Wana wakeke, engele e gboo mumu, la linge liokate ino ate moamaleli o Kilisito ageleli, opoti sikalandjo ngbii la iwo wango wakoamalelaka Kilisito wadji. La eho nde toewi ate edjei engele e gboo. ¹⁹ Wapumbiaka ndondo esu, kasi watidjakali wato wasu, laate inga wadjakali wango wasu nda watikalali mongindji la iso. Kaiko wapumbali la oenesi la hoho ate te iwo kpaa nde wadjei wato wasu. ²⁰ Aseko ino wango wamunolami maita masatu, odjeini ino kpaa la akili. ²¹ Odhingi iyodhingelini ino, eti ate otiyeweni meemene, kasi laate oyewini eho, pe laate moleho te mokeke etilongwaka la meemene. ²² Ndai odjei moto o moleho, inga te ongo okotonaka ondimi ate Yesu adjei kilisito? Inde ongo mwamaleli e kilisito, moto ongo okowunganaka wawa la monga monde. ²³ Moto ongo okowungana monga awungani wawa. Moto ongo omogemei monga adjei pe la wawa. ²⁴ Nde ino, enge eokalini ino tee la lipotele eyabate ndondo e ino. Inga linge liokali ino tee la lipotele eyabati ndondo e ino, ino pe okotikalani la limbutekele mongindji ndondo e mana pe ndondo e wawa. ²⁵ Aseko ema eunanate enge inde amene atowunelate edjei mokalo mungo moti la gbo. ²⁶ Iyoodingelini ino dji sambo la loyi e wato wango wakolukaka ookosakoli. ²⁷ Nde ino, maita mango inde aobatalini ino eyabati ndondo enu, pe otini la posa ate mwesi aotiesakoleni. Kasi nda maita mango inde abatali ekootiesakolakani la sambo kpaa, pe edjei meemene pe eti ekosako, pe ndenge saa eotiesakolini, tikalani limbutukele mongindji la inde. ²⁸ La eho sikandjo, wana wa keke, tikalani limbutukele ndondo e inde, laate, ango ekwenene inde, toase la hoho pe la meemene, pe otitile la soni lihele lande ango ekodja inde. ²⁹ Inga oyewini ate edjei meemene, okoyewakani ate moto kpaa ongo okokelaka sambo ndamu awotani la inde.