¹ Mulekage ngasi bubi, na ngasi bunywesi, n'obulyalya n'obwagalwa, muleke n'okuba ba kalimi. ² Mube nka rhubonjo. Mukâcîfinja buzira kuhusa amarha ga Mûka Mwimana, galya garhahumanyiri, lyo omu kuganywa mukula munacizibwe. ³ Bulya Amandiko gadesire mpu: "Mwalabwire obwinja bwa Nyakasane." ⁴ Yegeri Nyakasane, lirya ibuye lizine abantu balahiraga, cikwone Nnâmahanga acîshoga lyo, abona oku liri lya kaboko. ⁵ Muliyegere lyo ninyu muba aka amabuye gazine, mukolesibwe okuyubaka enyumpa ya Mûka gwage.Muli eyo nyumpa mwo mwajira omurhwe gw'abajinji b'omu lubaga lwa Nnâmahanga. Abo bajinji bahirwe omukolo gw'okurhûla Nnâmahanga enterekero ya Mûka gwage. Ebyo kusîmîsa bimusîmîsa omu kukolesa Yezu Kristu. ⁶ Yumvagyi ebi Amandiko gadesire. Gadesire mpu: "Nacîshozire ibuye ly'engulo ndarhi Lyo njijirage ibuye lya kaboko ka nyumpa omu Sayuni*, N'owaliyemera arhakabona nshonyi ciru n'ehitya." ⁷ Eri ibuye liri lya ngulo ndarhi kuli mwe, mwe muyemire, cikwone kili abo barhayemiri: " Lirya ibuye abubasi balahiraga Lyo lyabîrage kaboko ka nyumba." ⁸ N'ahandi kushubir'iderhwa mpu: "Liri ibuye kusarhaza abantu, Lwala lwa kubahirimya." Basarhire bulya balahire okuyemera ankwa, n'obwo bo Nnâmahanga akalemeraga. ⁹ Cikwone mwehe, muli mulala Nnâmahanga acîshogaga, bajinji ba Mwami, lubaga lwimâna, bantu ba Nnâmahanga. Mwacîshogagwa mpu lyo mulumîza omwanzi gw'emikolo minja ya Nnâmahanga wamuhamagaliraga okurhenga omu mwizimya, mpu lyo muja omu bulangale bwage bw'okurhangaza. ¹⁰ Burhanzi murhâli lubaga lwa Nnâmahanga, cikwone bono mukola muli lubaga lwage? Burhanzi murhâli munyire obwonjo bwa Nnâmahanga, cikwone buno mukola mubuhîrwe. ¹¹ Mmuhûnyire, bîra bani, nka kuno muli babalama na babunga en'igulu: mucîlange oku nyifinjo z'omubiri zilwisa omurhima. ¹² Mube n'ebijiro binja omu bapagani, ntyo ciru bakamulega mpu muli bantu ba kujira amabi, bahashe okumanya ebijiro binyu binja bakuze Nnâmahanga olusiku ayisha. ¹³ Mugombe oku ngasi mukulu en'igulu. N'okwo mukujire erhi Nyakasane orhuma. Mugombe kuli mwami, ye gwerhe obuhashe bunene kulushaq, ¹⁴ n'oku barhegesi arhumaga mpu bakahana abajira amabi, bakâkuza n'abajira aminja. ¹⁵ Bulya ebi Nnâmahanga alonza byo by'ebi: muhulise abarhayishi bici n'orhudunguli, n'okwo mukujire n'aminja ginyu. ¹⁶ Ulugendo lwinyu lube lwa bantagengwa ci arhali bantagengwa balonza obulyo bw'okufulika obubi bwabo, ci nka bakozi ba Nnâmahanga. ¹⁷ Mukenge abantu boshi, muzigire bene winyu omu bwemere, muyobohe Nnâmahanga, mukenge na mwami. ¹⁸ Mwe bakozi, mugombe kuli bannawinyu n'obukenge bwoshi. Ntadesiri nti mugombe kuli balya baba binja bone, cikwone n'oku badarhi. ¹⁹ Bulya ocîsezize okulembera amalibuko erhi kukenga Nnâmahanga kurhuma, oyo muntu erhi minja ajijire. Caziga ago malibuko gabe mahambâra. ²⁰ Bulya bunguke buci buhali erhi mwankalembera okushurhirwa amabi mwajijire? Cikwone erhi ankaba murhegesirwe mpu mulibizibwe kwenge mwajijire aminja mukanalembera okwo kulibuka, erhi bwinja mujijire emalanga ga Nnâmahanga. ²¹ Okwo kwo Nnâmahanga amuhamagaliraga, bulya Kristu yene amulibukîre, anamusigîre olwiganyo mpu lyo mushimba olugere lwage. ²² Arhajiraga caha. Ntaye wayumvîrhe aderha akanwa k'obunywesi. ²³ Erhi ajaciragwa, arhashuzagya kanwa, cikwone acîhira omu maboko ga Nnâmahanga otwa emanja n'obushinganyanya. ²⁴ Ye wacîbarhuzagya ebyaha birhu oku murhi, mpu lyo rhufa omu njira eyerekire ebyaha, rhunalamire obushinganyanya. Neci, bibande byage byarhufumagya. ²⁵ Bulya kwo mwâli muyosire nka bibuzi bihezirre, ci buno mwashubirine omungere* n'omulanzi w'emirhima yinyu