¹ Nie Petro, ntunwa ya Yezu Kristu. Aga maruba ngayandiki balya bîshogwa ba Nnâmahanga bashabine omu cihugo c'e Ponto, n'omu Galatiya, n'omu Kapadokiya, n'omu Aziya n'omu Bitiniya. ² Mwe Nyamunzinda Larha acîshozire omu bumanye bwage, anamucêsa na Mûka Mwimana, mpu lyo muyimva Yezu Kristu munacêsibwe n'omuko gwage. Olukogo n'omurhula gwa Nnâmahanga gube haguma ninyu! ³ Akuzibwe Nnâmahanga, Ishe wa Nyakasane Yezu Kristu! Omu bwonjo bwage bunji arhuburha buhyahya, anarhuha obulangalire bulerha obuzine, erhi afûla Yezu Kristu omu bafîre, ⁴ mpu lyo rhuyish'iyima omu birugu birhabola.burhazinga birhanakulukula, byo birya mubîkirwa omu mpingu, ⁵ mwe mulangwa n'obuhashe bwa Nnâmahanga erhi buyemere bwinyu burhuma, mpu lyo muyish'ifulûlwa omu mango ga buzinda. ⁶ Ciru ankaba buno mukwanine mulibuke mango masungunu omu marhangulo ga ngasi lubero, mushagaluke okwo. ⁷ Ago marhangulo gali ga kugera obwemere bwinyu buli bunganaci. Ennoro erheganyibwe okuherêrekezibwa, n'obwo muliro erhangulwa mwo; n'obwemere byinyu kwo n'okwo, obonage oku bwo bunajira obunguke bunene kulusha. Kurhangulwa burhangulwa lyo buyerekana obuzibu bugwerhe. Na ntyo kwo mwankahâbagwa mwo obukuze, n'irenge n'olukengwa hano Yezu Kristu ayisha. ⁸ Mumuzigira n'obwo murhasag'imubona, mumuyemire murhali mwamubona buno, n'omwishingo gwinyu munene gurhankaderhwa gunanyujwire irenge, ⁹ bulya mumanyire okw'obwemere bwinyu bwamuhisa oku bucire bwinyu. ¹⁰ Obwo bucire bwo abalêbi* balêbaga mwo enshokano mwâli mubîkirwe bakag'ilongereza bwenene; ¹¹ bacîhangana okumanya mango gahi na bimanyiso bici Omûka gwa Kristu gwakag'ibalangûla, erhi gukâbabwiriza embere bibe, amalumwa ga Kristu n'irenge lyanakulikire. ¹² Bafulûlirwa okw'obugo bâli bahîrwe burhâli bwabo bone, cikwone na ninyu buli bwinyu. Balya bamuyigirizagya Emyanzi y'Akalembe bo bamumanyisize obwo bugo mwo gano mango, n'oburhabale bwa Mûka Mwimana warhumagwa kurhenga e mpingu. Ciru na bamalahika* basîma bwenene ukumanya obwo bugo. ¹³ Co cirhumire muyorhe mucîrheganyize okukola. Muyorh mulâlire n'okulangalira bwenene enshobôlo mwashobôla hano Yezu Kristu ayisha. ¹⁴ Mukâyumba ebi Nnâmahanga adesire murhanacîshweketaga oku nyifinjo mwali mugwerhe mîra. amango murhali muyishi bici. ¹⁵ Cikwone mubebimana omu bijiro binyu byoshi, nka kula Nnâmahanga wamuhamagala aba mwimana. ¹⁶ Bulya Amandiko gadesire mpu ; " Mube bimana, bulya nâni mba mwimana." ¹⁷ Nka mwashenga munaderhe Nnâmahanga izino lya larha, ye twira abantu boshi emanja, anizitwe buzira kabôlo, anahembe ngasi muntu nka kulya anakozire. Co cirhumire aga mango gacimugalire mwacibêra omw'igulu, omu bijiro binyu muyerekane obukenge mumugwerhe kwo. ¹⁸ Mumanye oku murharhenzibagwa omu bworhere bugalugalu bashakuluza binyu bamuyahukizagya n'ebirugu byankasherera, nka nfaranga erhi nnoro. ¹⁹ Mwacizibwe omu njira y'enterekero y'engulo ndarhi ya Kristu. Ali ayosire nka mwana-buzi orhali kwo ishenbo erhi izinga. ²⁰ Nnâmahanga acîshozire Kristu embere igulu lirhacilemwa, ayerekinwe na Nnâmahanga mpu lyo mubona aminja muli aga mango ga buzinda. ²¹ Muli ye muyemire Nnâmahanga wamunfulaga anamuha irenge. Ntyo kwo obwemere bwinyu n'obulangalire bwinyu biyerekire emunda Nnâmahanga ali. ²² Mwashukwirwe* erhi kulya kuyumva n'okujira ebi okuli kudesire kurhuma, lyo musîma buzira bulyalya balya bali bene winyu omu bwemere. Musîmanage bwemerhe n'emirhima yinyu yoshi. ²³ Bulya mukola mubisirwe bwa kabiri. Arhali bala balarha bafa bo bamubusire, cikwone mubusirwe n'erya mburho erhafa. Muyosire ntyo erhi kalya kanwa ka Nnâmahanga k'obuzine kanali k'ensiku n'amango ko karhumire. ²⁴ Nk'oku Amandiko gadesire mpu: " Abantu boshi kwo bali nka lubala N'obwinja bwabo bwoshi kwo buli nka bwaso bwa lubala. Olubala lunayume, n'obwaso b'olwo lubala bahungumuke, ²⁵ cikwone akanwa ka Nyakasane kahabêra ensiku n'amango." Ako kanwa ko klya Emyanzi y'Akalembe yamulerheraga.