¹ W'oyo, mwanawani, Ochihangane omubonjo buli omu Yesu Kristu. ² N'ebiwayunvirhe kurheng'emwani embere z'abahamirizi banene, obihe abalume bakwanene, bakagala kubiyigiriz' abandi. ³ Libuka haguma nani, nka nfola miherho mwinja wa Yesu Kristu. ⁴ Nta nfola muherho oherera omubijiro by'akalam' ogala kusimisa nawabo wamulondolaga. ⁵ Nta mulibirha oyambiswa echishema, nka rhakulikiz' amarhegeko. ⁶ Bikwanen' omuhinzi ahinge embere z' okushalul' amalehe. ⁷ Oyunv' ebyo ndinaderha bulala nahano aguha obweng' omubintu byoshi. ⁸ Oyibuke Yesu Kristu w'arhengag' omuluburho lwa Daudi, afukir' omubafu, kukulikirana guno mwazi gwani g'obuholo, ⁹ Gurhumire nalibuka kugeran'okushwekwa nka chishambo. Alik' omwazi gwa Nyamuzinda gurhashwekerwe. ¹⁰ Che chirhumire nalembera byoshi enyanya z'abalondwerwe, yinabo babon' obuchunguke buli omu Yesu Kristu haguma n'obukuze bw'esiku n'amango. ¹¹ Gun'omwazi gukwanene: nkarhufire haguma na Yesu, njirhwafuka haguma naye. ¹² Rhukalembera, njirhwalama haguma haye; nkarhumulahire, nj'arhulahira naye. ¹³ Eri rhwankalahira obwemere, yewe ayorha mwemezi bulal' arhankagala kuchilahira. ¹⁴ Yibus' ebi bintu, obahanule embere za Nyamuzinda, barhabaga n'obuhaka bw'emyazi erhaherhe kamaro, aliko erhoz'abayiyunva. ¹⁵ Ochihangane kuchiyerekana ok'oye mererwe na Nyamuzinda, mukozi orhajira burhe oyigiriza bwinja omwazi gw'okunali. ¹⁶ Olek' ebinwa byabushabusha n'ebibi, bulala ababiderha bagenderera kubiha, n' emyazi yabo yagenderera kubihya. ¹⁷ Omu luganjo lwabo bantu hali Himeneya na Fileto. ¹⁸ Bamalire kurheng' omunjira y'okuli. Balibaderha ok'obufuke bwamalir'iba, n'okuheny' obwemere bwa baguma. ¹⁹ Aliko, esimikiro lya Nyamuzinda liyimangire bwinja, haguma n'echinwa chage, akolesa nka chimanyiso. Nyakasani ayinji abalibage. Na ngasi Yeshi oderh'ezino lya Nyakasani alek' obubi. ²⁰ Alik' omunju nene, harhalimo, engumbu z'ehoro n'efuranga zonyine, chimuba n'eby'obudaka. Ziguma ziri ngumbu z'olukengo, n'ezindi zirhagwerh' akamaro. ²¹ Ey'omuntu akachichesa, n'okuchiyasa n'ebyo bintu; yebe nka ngumbu ekengwa, echesezwe, yakamaro embere za nawabo, echesezwe kubuli kasi kinja. ²² Libirh' enyifinjo z'obusole, olonz' okunali n'obwemere, n'obuzigire, n'omurhula, haguma nabarhali mu Nyakasani, n'omurhima guchere. ²³ Olibirh' obuhaka, bw'esire burhaherhe kamaro, omeny' okubulerh' entambala. ²⁴ Birhahunir' ok' omukozi wa Nyakasani agwasize kuba n'obuhaka; aliko, agwasirwe kuba mwirhonzi oku bantu boshi,owakagala kuyigiriza, owakagala kulember' amalibuko; n'obwirhonzi, ²⁵ N'okuhanul' abashombanyi, nabikashobokana, omubulangalire bwa Nyamuzinda ogala kuhabo kulek' ebyaha n'okumenya okuli. ²⁶ Banagale kugwarh' obwenge bwabo, kandi bachiyase n'omurhego gwa Lyangombe, bulala amalire, kubashweka n'okujir' obulonza bwage.