¹ Netti ponna ngara ata rato mba pareta, 'nda'ndi we kareba kalada a eka nggai ne'e wanno. Wa'ini na iya kambani a wali wanno Betlehem, ne'e tana Yehuda, a kako pamadaka wa'i ne'e Moab, na marengnga ndengnga ni mawinne na monno ndwa ana kambani na. ² Na ata ngarana Elimelekh, mawinnena ngarana Naomi, monno a ndwa nda anana a ngarana Mahlon monno Kilyon, ata Efrata wali Betlehem ne'e Yehuda. Kalengnga pandukki wanno Moab, ka enga wa'i ndi ne'e. ³ Mbage, mate mbanna Elimelekh, la'ina Naomi, monno ndangngi marengnga ndi ndwa nda anana. ⁴ Haida ndwa anana a 'nde'nde lakawa mawinne Moab. Na lakawa mawinne a iya ngarana Orpa, monno a kandwa ndana ngarana Rut. Ne mba ne'e 'ndi ne'e kabullu ndou nda. ⁵ Nyaka, anana a ndwa nda, Mahlon monno Kilyon, a mate kaina nyawe na mawinne kandunda kanni a ndwa nda ana kambani na monno la'ina. Naomi Na Wali ⁶ Mbage, napa pa'ndinnakka wekkina monno ndwa nda wasena wali Moab, orona ne'e wanno Moab na Mori napa ate takka kandi Ata-Na monno na paate ndi panga'a nda. ⁷ Na kako wali ne tana pandou pa ne'i mbani, monno ndwa nda wasena. Tengngara ne'i ndi lara ndana a wali neti tana Yehuda, ⁸ Hinna ngge Naomi mbarra nda a ndwa nda wasena, "Kakomi, walimi mbarra umana inami. Mbanna ma pande 'ndowe Mori kanna 'mbo ngge manawara atena a 'mbetti a hinna wa'ina papatutumi mbara nda ata-ata a mate monno mbara nggu." ⁹ Mori na ya nggu kanurru kanengga mbarramu ne pandou pamawo wa'imu, umma ndou-umma ndouna la'imi." Kambage, na ndekkiwi, monno a ngi'o langngu takka wai ngge kawikada. ¹⁰ Ka hiddawi,"Ne yamme ma wali marengnga ndengnga nggu mbarra bangsamu." ¹¹ Takka, Naomi na wale , "Walimi, ana-ana nggu. Appa ki marengnga ndengnga ngga? Ndakku pa 'ndandi pi'a mbanna ana kambani ki pa nggai la'i ndi." ¹² Walimi ana-ana nggu, kako mi, orona ne sauwa ku kaweda mbanna kaku pala'i pi'a mba lunggu angga. Tudda konna mbaku pangeda wekkina wa'i ngge pamenne nggu a hinna wa'i na a marawi ne gedde mba wa'i ku la'i nggu engnga pa 'nda'ndi nggu ana kambani, ¹³ rema kad'ndundi nya ndukki mba matto? Nyaka, yemmi mi pattu wekki kadonanya mbi nda pala'imi? Indakki,ana-ana nggu. Orona, louka pa poddu po wali yemmi, orona limma Mori mbanna 'gobba ngga yowa!" ¹⁴ A kawauka mba ngi'o ndobba. Mbage, Orpa na 'ndekkiwa mattona, takka na Rut na kadakka mbarra mattona. ¹⁵ Hinna ngge Naomi, "Eta, netti mbai ippamu a wali mbarra 'ndu na monno allahna; kakowu ndeku wi ippamu." ¹⁶ Takka hinna ngge Rut, "Ndu pasassa kangga mbakku 'ndun'da kanggu, monno ndou 'ndikkira kangga wali mbak ku ndeku nggu orona, nggei ngge pakakomu, netti kai ngga sauwa. Ge'i nya ngge pa'taddo wa'imu, ne wa'i kangga sauwa. Bangsamu nya kaidona bangsa nggu, monno Allahmu nya kai ndonna Allah nggu. ¹⁷ Mbu mateku, ku mate kaina monno a tane wa'i nda ne'e. Mbanna ma pandedowe Mori mbanna tau ngga ndengnga louka wali hettina mbaku masewa ndengnga nggu watena podda." ¹⁸ Oro mbanna eta Rut na ndou ngge pawessi ate mbanna marengnga ndengngani nya kanna ngau papanewe ndengngani. ¹⁹ Nyaka, kako haida ata a ndwa nda ndukki ne'e Betlehem. Ne mba ndukki Betlehem, nyaka atangangngara ngara ata wanno oro 'nda, hidda ngge mawinne-mawinne, "Naomi kadowanya?" ²⁰ Hinna ndi, "Ndi kandengnga kangga ngara Naomi, kandengnga wai ngga ngara Mara, malla na Maromba Allah a mangngu mbotona na rai ngge toleka nggu na poddu we. ²¹ Ne sauwa ku kako kalaki ate, takka na Mori na pawali ngga wai ngge limma kaluwa. Appa Naomi ki limi ngga, malla na Mori napagai sakti angga mbanna 'gobba ngga monno na 'Ndukka Mboto 'Ndukka 'Mbisa na padippa ngga podda mbara nggu" V 22 Hinnawe, Naomi mbanna wali marengnga 'ndengngai Rut, mawinne Moab, wasena, a marengngani wali wanno Moab. Mba ndukki Betlehem kawungnga makeni parewe.