Yakub Napatabboka Ndengawi Rahel ¹ Mbage, na Yakub napa kitage pakakona mono na dukki ne wanno ata Timur. ² Ne mbanna panamatage mata, Yakub kanangngu etawi a iya mata we'e pakoda ne maredda dana, mono a touda dededa mbebe a mbeika ne uppuna mata we'e, ne we'e pakoda pa enu waida ranga a todi waige iya tatapa watu aka ladana, ³ nya ne'i kuwa kundi a pakua ne'e, haida ata ndawa ranga a leilarrai na togo patodi waida ne we'e pakoda monno a yadi paenu ana mbe'be nda. Mbage a ta'i mbali na togo, ponnu we'e pakoda. ⁴ Hinnage Yakub mbarranda ata ndawa ranga ne'e, "ole 'da'dinggu, ngge wali nyame yemmi?" A wale wa, "Yamme wali ma Haran." ⁵ Hinna ndommo ngge Yakub mbarradda, "Appa 'mi pandewi Laban, anana Nahor?" A walewa, "Mapandi wi." ⁶ Mbage, Yakub na tuwawi, " Ndapeidonanya?" Awale we, " Naduwadona. etawa, name Rahel, ana mawinnenai, ammiwi mono mbe'benda amana." ⁷ Hinnage Yakub, "Etawe, loddopowa. Nda nduki kipona rapa mba pa kuwadi ranga. Yadi heida mbe'be 'mba 'mbenu mono ka'dawawi wali netti marekda dana." ⁸ Nyamo heida ata dawa ranga kahi'dage, " Ndanna ma pandekewe ama pawillige balinawe ngarra kuwa kabak'ba mbe'be papa kuwana mono na togo pa todiwai a leilarrai wali mbak'a wee pakoda; nyakidowe ne yamme pa kolema mbamma yadi pa enu mbe'be-mbe'bema." ⁹ Tenggara Yakub mbanna panewe denggadi, Rahel ammiwi mono mbe'be amana orona nya a dawawi. ¹⁰ Tengngara Yakub banna eta Rahel, ana mawinne na Laban, na'ana innana, mono mbe'benda Laban, Yakub na barrawi mono na leilarawi na togo watu wali nee mba'ana wee pakoda, dukkiwe mbanna nyadi paenu heida mbe'be Laban, na'ana innana. ¹¹ Mbage, Yakub na de'kkiwa Rahel mono nakawauka mbanna ngi'o. ¹² Yakub natekkina Rahel mbanya ndu'nda'ndi nai amana, mono mbanya ananai Ribka. Nyaka, kanna malle Rahel mono na tekkina amana. ¹³ Tenggara Yakub na rengngewe tubana Yakub, ana wottona, napa gesana banna kako pa tabbokawa, bage nawapowa mono nadekkiwa Yakub, mbage na ngindiwa ummana. Bage, Na Yakub na tekki ngarra kuwawe barra Laban. ¹⁴ Hinnage Laban barrana, " Mbadekukoge ne yo'u ra'adagu." Nya kanna dangngi Yakub barrana ne'a ia wullana a gainna. Laban Na Nke'di ni Yakub ¹⁵ Mbage, Laban hinnani na Yakub, " Langngokapo ne yo'u ba ra'a dagu, engngakadoge ne yo'u mbapa willi ka luwau ne barragu? Tekkigawe mbarragu pei'patana mbaku yagu kasewamu?" ¹⁶ Laban a nduanda anana. Na paka'a ngarana Lea mono napa allika ngarana Rahel. ¹⁷ Mata na Lea ndanna singirakke , takkana Rahel napa wekki kambolana monno na kambolawe matana. ¹⁸ Orona Yakub na mbei Rahel, hinnangge, :"Ne youwa ku pawilliangga mbarramu pittu ndouna kaku koleni Rahel." ¹⁹ Hinnage Laban, "Na ndua powe ku yagu Rahel mu nde'ke ndouwa ka nda ata wadekkaka a ndekewa. Kanyawe, ndangngiwu mbarragu." ²⁰ Kanyawe, ndangngi mbanna Yakub monno napawili mbarrana Laban pittu ndouna. Pittu ndouna palawina Yakub mbanna pangaingge pirra lodokina mbanna pawilli orona na namanawarra pongngu Rahel. ²¹ Na ndukkiwe pittu ndouna, hinnage Yakub mbarra Laban, "Ya nggai Rahel ngga'i kaku pambola ndengngawi. Ne rapa pawillinggu mbarramu nama mbambawe." ²² Nyaka, Laban na raingge iya rame kalada mbara ngara kuwa ata a ne'i na ne'e pandou. ²³ Ne gedde mema pongu, Laban na ngindiwa anana, Lea, mbarra Yakub, monno Yakub nappa ia ndengngawi Lea. ²⁴ Laban na yawa na ata mawinnena, Zilpa, mbarrana Lea kanna patukawi. ²⁵ Koka kabu gedde na, Yakub na etawa Lea a ndura ndengawi. Hinnage Yakub mbarra Laban, "Appa ku ke'ndeangga.Ku eta mbanna podda mbaku pawilliangga mbarramu ngga'i kaku kolewi Rahel? Ne ku ke'ndeangga?" ²⁶ Na walewa Yakub, "Ne'e wannoma ana kamurri ndanna ullukanna mbanna pala'i mba ndanna pala'i kopona na paka'a. ²⁷ Ponnu mbelli po pittu loddona mbu pambola ndengngawi Lea, monno kaku yagu Rahel mbarramu. Takka mu pawilli ndommo po mbarragu pittu ndouna. " ²⁸ Yakub na rawingge monno na ponnu we ne loddo ngauna pa kole ndenganawe maringi a walina mori, ledena mba wa'ini mawinnena. Mbage Laban na yanai Rahel, anana, mba mawinnenai Yakub. ²⁹ Laban na yawa atana, mawinne, a ngarana Bilha, mbarrana Rahel kanna wai atani. ³⁰ Nyaka, Yakub nakka iya 'ndengngawi Rahel. Monno Yakub nappa pawilli ndommo pittu ndouna mbarra Laban. 'Ndu'nda'ndina Yakub a matamba ³¹ Na etawe Mori Yakub na louka pamanawarapu Rahel indapi'apo Lea, nya kannawukke na pandou atana Lea, takkana Rahel na woto. ³² Lea napa anawi iya ana ka'mbanina, papangaranna Ruben. Nepa papangara 'ndengnganai Ruben na Lea orona mbahinnangge, "Mori na etanggawe papo'ndanggu. Na la'inggu ndanna manawarakingga sauwa, nyaka mbahinawe la'inggu noto ngge na manawara'mbangga ³³ Lea na pati'a pi'a monno na paana wi anana wadde. Napa ngarawi anana Simeon. Hinnangge, "Mori na rengnge ngga ne youwa mba ndanna manawarakingga, nyakanna yaga ana mbarranggu." ³⁴ Lea napa pati'a ndommo monno napa anani anana wadde. Napa ngarawi Lewi. Hinnangge, "Mbahinna ne'e, la'inggu engnga enga mbai mbaranggu orona ku ya'mbai touda ana kambani mbarrana." ³⁵ Mbage, Lea napa anawi ana na wadde. Napa ngarawi na lakawa Yehuda. Napa ngara hinnawi orona mba hinnage,"Ne mbahinnawe, ku ndeikawa na Mori." Mbalinangge, Lea ndanna pa'ana pi'a mbanna.