¹ Omin yóm hógów Dwata tmolok du do yóm tey él tikaw sminang mlel bè yó, yóm mon le, él hlowil tau. Tódô mlel lemwót gu bè yóm bangkù gónón myón kmamal Dwata lewu le yóm Ngà Ubiha, ² hlós mlel ebè gónón sóól yóm lan bè yóm syudad yó. Tódô sbalà tmowok bè kililen se yóm koyu boluyen koyu hlowil tau. Sfolò lewu duléken mungu bè yóm sfalay yóm koyu yó, tódô keten bulón. Ne yó kem dounen mò bulung bè yó kem tau bè klamangen benwu. ³ Ne bè yóm syudad yó, laen kô dù bud tonem bè yó yóm gónó le glayam kem tau lemwót bè ktafak Dwata kul. Nô bè yó se yóm bangkù gónón myón kmamal Dwata lewu le yóm Ngà Ubiha. Ne gotu dóyón le Dwata yó kem tauhen. ⁴ Deng le hol tahu suyó ke Dwata ne, ne yóm kun boluy Dwata, sket snulat lem uyó le. ⁵ Laen kô dù kifuhen yóm benwu yó, ne laen se kô dù bud muhen ne yó kem nóng solok duhen ke nóng kdaw, abay se yóm Dwata gónó le mogot seflós mò layag le. Ne angat wen hogot Dwata kul, ne laen kô dù sónen yóm kogot le du. ⁶ Ne bud monen mò do yóm hógów Dwata deng mudél ebéléu yó, monen, “Ni kem deng tulónu kóm ni koni, hono tahu, ne hono gsalig. Ne yóm Dwata gónó tekuy mogot, yóm tehe gel msù du bè yó kem tugoden yóm Tulusen, du se yóm hógów do anì naw e hetngón bè yó kem tauhen yóm móyón sut ni.”  Ne omin Jisas mudél, monen mò do, ⁷ “Ngem móyóne bud kól ne ni. Tey bong kligalen kun yóm tau mimón du yóm deng eles tulónen bè nim bok ni.” ⁸ Ou se Jan, yóm deng gotu mungol du kdê ni kem ni, ne deng gotu tonu snéen. Bè yóm deng kungolu du ne yóm deng ktonu du, tódóe hegluduk klohok ti yóm hógów Dwata deng hegfan du béléu lanu tô dmóyón du. ⁹  Okóm mom monen mò do, “Bê. Béem nmò yó. Senged kut mò fen tóbóng lówó Dwata, dalang se yó kem dumuhem setwoli gel tmugod ke Dwata, ne yó kem dumuhem gel mimón du yóm deng eles tulónen bè nim bok ni. Olon Dwata dé hol dóyónem.” ¹⁰ Ne bud monen mò do, “Béem abay buni yóm kdê eles tulónen bè nim bok ni, abay se móyónen sut ne yóm kdê tulónen yó. ¹¹  Yóm tau mò sidek, tódô henlósen ne yó kem sidek nmoen. Yóm tau là mólósen, tódô henlósen se kun mò du yóm là mólósen. Okóm yóm tau hyu kmoen, hol henlósen sen mò du yóm hyu. Yóm tau laen dù belenen yóm kmoen, hol henlósen mò du yóm laen dù belenen.” ¹² Ne yó bud udél Jisas, monen, “Ngem móyóne bud kól ne. Wen ofol eles nwitu mò blayu yó kem tau mò balà yóm tehe kul gel nmò, yóm ket kul na sotu. ¹³  Ou se yóm hol buten ne yóm hol sónen. Bud ou se gónón mbut kdéen, ne ou se yóm bud mò sónen.” ¹⁴ Bong kehligal le kul yó kem tau deng eles nfuk le yó kem nes le efet deng mólós anì wen kwalis le ghusek bè bak tikeb yóm syudad yó, ne wen kwalis le snéen mken du yóm bungu yóm koyu hlowil tau. ¹⁵  Okóm là kô le gusek bè yó kul yó kem tau ssamuk honon lu, yó kem tau alì smalig bè imò, yó kem tau smamuk, yó kem tau monok, ne yó kem tau hemtahu bè dwata kéng, ne yó kem tau gel mò kéng, mlan bè udél le ne mlan bè nmò le. ¹⁶ “Ou se Jisas. Deng wen hógówu ebéléem lemwót gu bè longit mò heglalag du bélê ye bè simbahan ni kem ni. Ou se semfu gu bè yóm tehe Dabid, ne ou se yóm blotik semla alì mnóng ke móyón mwas.” ¹⁷ Yó udél yóm Tulus Dwata dalang se yóm libun yehen yóm Ngà Ubiha, mon le, “Géhél ye ne.” Ne yó kem tau mungol du, yake bud mon le kul, “Géhél ye ne.” Géhél le edini ne yó kem tau meeng na le e minum bè yóm él hlowil tau, yóm él là kô feng benli du. Yóm tau móyô, géhél minum ne. ¹⁸ Ou se Jan, wen hetgamahu kuy yu kem tau hmungol du yóm deng eles tulónen bè nim bok ni. Ke wen tau temnù du, angat tennù Dwata béléen yó kem hlayam deng snulat bè nim bok ni bè yóm angat ktafaken du. ¹⁹ Ne ke wen tau wen kóhen du ni kem eles tulónen bè nim bok ni, bud kó Dwata béléen snéen yóm kun ólól bè yóm koyu hlowil tau, ne kóhen snéen yóm gónóhen tô nô bè yóm syudad Dwata, yóm deng tulónen bè nim bok ni. ²⁰ Yó udél Jisas, yóm fen gemtanud du ni kem ni, monen, “Bong tahu se. Móyóne bud kól.” Ne monu se mò du, “Yó sen géhéli kut, Jisas, yóm hol gónó mogot.” ²¹ Yó hem gónó tekuy mogot Jisas yóm hol tendo tmóbóng kuy yóm kdê ye.