¹ Ominu yó mton yóm lomi longit ne yóm lomi tonok, abay se deng lana ne yóm gnan. Balù yóm mohin, là kô bud tonem du ne. ² Ne tódô tonu se yóm tey Syudad Dwata, yóm lomi Jirusalim. Tódô htuntun gu tta lemwót gu bè Dwata. Hol lómón ktiloben yóm libun deng eles hegkes bè kyehenen. ³ Ne tódô gungolu se yóm mudél lemwót bè yóm bangkù gónón myón yóm fen kmamal, hgelen udélen, monen, “Ngem yóm kun gónó nô Dwata, deng eles nô lem blóng kem tau ne. Angat tódô hlós nô bélê le, ne lu se baling kem kun tau. Là kóen na a bud skó bélê le ne, yakà du se kul Dwata. ⁴ Angat gotu nifuhen yóm lewok bè mata le. Laen kô dù bud tau matay ne, ne laen se dù bud knangag le, ne laen dù bud nkik le ne laen se dù bud tenduk le, yakà dengen gotu lana ne yóm gnan.” ⁵ Ominen mon du yóm myón bè yóm bangkù gónón myón kmamal, monen, “Ngem gotu hnomihu ne yóm kdéen.” Ne bud monen mò do, “Hol snulatem nim ni, abay se hono tahu, ne hono gsalig.” ⁶ Ne bud monen mò do, “Deng gotu deng ne kdéen. Ou se yóm hol buten ne bud sónen. Bud ou se yóm gónón mbut yóm kdéen, ne ou se yóm bud mò sónen. Yóm tau meeng, angat hinumu bè yóm tbul él gónón mowil tau, yóm él là kô feng benli du. ⁷ Yóm tau gel matù bè yó kem sidek gel sut, ou se baling kun Dwata, ne du se baling dou ngà. ⁸  Okóm yó kem tau likò lemolò do, ne yó kem tau là hemtahu le béléu, yó kem tau ssamuk honon lu, ne yó kem tau monok, ne yó kem tau mò samuk, ne yó kem tau smalig bè imò, ne yó kem tau hemtahu bè dwata kéng, ne kdéen tau mò kéng, angat le gógów elem lanaw ofi yóm kdê le, yóm ofi wen kbudahen tendo seflós dmilóf. Yóm lanaw ofi yó, yó se yóm mon le gewuhen dulék matay tau.” ⁹ Ominen mógów ebéléu yóm sotu hógów Dwata, mogot sotu bè yó kem hitu tukung gónón nô yó kem hol són hlayam, monen mò do, “Mungi do, naw e tolok kóm yóm libun yehen yóm Ngà Ubiha.” ¹⁰  Tahu se. Lemwót bè yóm knóen béléu yóm Tulus Dwata, tódô niten ou etu bè yóm tey bulul geta. Ne toloken do Jirusalim, yóm benwu gónóhen nô Dwata, tódô htuntun gu bè Dwata bè longit. ¹¹ Tódô sminang lemwót bè yóm tey layag Dwata. Lómón keslinangen yóm sotu botu mebtes boluyen dyaspér, yóm botu hol lómón ke sobuy molung ktikawen. ¹² Wen tey beng tahà hilolen yóm syudad yó, ne sfolò lewu bak tikeben. Ne sfolò lewu se hógów Dwata sket mentey bè yó kem bak tikeben yó. Bè ket bak tikeben, deng wen boluy snulat le lemwót bè yó kem sfolò lewu tehe ngà Israél. ¹³ Fi dmata kdaw wen tlu bak tikeben, dalang se fi bwak ne fi leged ne fi desdef snéen, ket ne tlu bak tikeben. ¹⁴ Wen sfolò lewu kay botu gónó le hemyón du yóm beng hilol yóm syudad yó mò hembegel du. Bè ket kay yóm botu yó, wen boluy snulat le lemwót bè yó kem sfolò lewu tau tehe nélék yóm Ngà Ubiha mò hógówen. ¹⁵ 15 Ne yóm hógów Dwata le stulón do yó koni, wen btes blówón nkemen mò btesen klamang yóm syudad yó, gomong bentesen yó kem bak tikeben ne yóm beng hilolen. ¹⁶ Bè yóm kebtesen du yóm syudad yó, tódô senged bè btes yóm hendaen yóm btes hlekelen. Btesen du yóm btes blówón nkemen. Ket na lewu libu bud lewu latu kilumitru yóm hendaen dalang se yóm hlekelen, ne senged snéen yóm kegetahen. ¹⁷ Gotu bentesen ktahà yóm bengen snéen. Yó ktahaen, botong nem folò fat mitruhen. Yóm kun btes yóm hógów Dwata, tódô senged bè yóm sana btes bélê tekuy. ¹⁸ Yóm beng hilolen, hono yóm sotu kay botu bnoluy le dyaspér. Bede yóm syudad yó, deng tódô hono blówón, lómón kolungen sobuy. ¹⁹ Yó kem botu gónón myón yóm bengen, tey dê kay botu mebtes sminang heklóón le du, ket kayen, tólóng beteken. Tanayen, yóm botu bnoluy le dyaspér mò heklóón le du. Gewuhen, yóm mon le safar. Getluhen, yóm mon le agét. Gfaten, yóm mon le éméral. ²⁰ Glimuhen, yóm mon le onik. Gnemen, yóm mon le karnilyan. Ghituhen, yóm mon le kwart mélél. Gwoluhen, yóm mon le bérél. Gesyómen, yóm mon le tupas. Gesfoloen, yóm mon le kalsidoni. Gesfoloen sotu, yóm mon le térkuwis. Gesfoloen lewu, yóm mon le amatis. ²¹ Ne bè yó kem sfolò lewu tikeben, hono nmò le bè lem pérlas. Tódô ket tikeben, sal tek sotu pérlasen geblà du. Ne yóm lan gu lemen yóm syudad yó, hono lan blówón, bede hono molung, lómón kolungen sobuy. ²² Ne laen dù Gónô Dwata tonu lemen yóm syudad yó, abay se yó henged Gónô Dwata bè yó duhen Dwata, yóm gónó tekuy mogot, yóm laen dù là gbeken du, lewu le yóm Ngà Ubiha. ²³ Ne laen kô dù nóng kdaw duhen ke nóng bulón bè yóm syudad yó, abay se yóm layag Dwata tódô seflós mnóng bè yó, ne yóm Ngà Ubiha henged soloken. ²⁴ Yóm kun layag yóm syudad yó, gotu hlayagen yó kem tau bè klamangen benwu. Ne kdéen tau hol geta bè klamangen benwu, gotu nit le elemen yóm kul kendengen mò blay le du. ²⁵ Ne yóm tikeben yóm syudad yó, tódô gel mngal ket kdaw abay se laen kô dù tul kkifuhen bè yó. ²⁶ Tódô kdéen tau bè klamangen benwu, gotu nwit le ebè yó yóm kul kendengen. ²⁷ Okóm là kóen gusek bè yó yóm là mólósen, duhen yóm tau gel mò yóm gónón hemyak knô, ne yóm tau gel mò kéng. Són olo gusek, són yó kem tau deng gsulat boluy le bè yóm bok lowil, duhen yóm kun bok yóm Ngà Ubiha. i