¹ Ou se Pol gónóhen lemwót nim sulat ni. Tódô lemwót bè kun kóyô Dwata yóm tehe kéléken dou mò sotu tau gel hógów Krays Jisas. Lewu me Sustinis nim nô bè ni, yóm sotu dumu tekuy setwoli. ² Smulate ebélê ye, yu kem tau deng hemtahu bè Dwata bè syudad Kurin. Deng tnaba Dwata yu mò baling hol kun tau laen dù bolen. Deng nfunen yu hlanen bè yóm deng kessotu ye bè Krays Jisas. Deng ye gotu gomong ne bè yó kem kdéen tau bè dumu benwu deng gel tmaba bè yóm gónó tekuy mogot Jisas Krays. ³ Yó hem Dwata yóm Mà tekuy, ne yóm gónó tekuy mogot Jisas Krays hol tendo tmóbóng kuy ne tendo henek nawa ye. ⁴ Tey tendo gel kdóyónu ke Dwata bè yóm gel któbóngen kuy hlanen bè Krays Jisas. ⁵ Lemwót bè yóm deng kessotu ye bè Krays, yó gónóhen tódô ket du ne yóm gónó Dwata tmóbóng kuy. Deng blayen kuy se yóm khulung ye mudél ne yóm tey ketngón ye. ⁶ Lemwót bè yóm deng tey kegemelen yóm kehtahu ye du yóm tulón me kuy gbak ebè Krays, ⁷ deng tódô ket du ne yóm kenhulung blay Dwata kuy bè yóm igò ye tolo semsangat du kkólen yóm gónó tekuy mogot Jisas Krays. ⁸ Tódô henlelen hembegel du yóm kehtahu ye efet kól bè yóm hol són kdaw anì laen dù bang bud gónó ye megduón ne ke mdà ye bè solu yóm gónó tekuy mogot Jisas Krays. ⁹ Tey gsalig yóm Dwata. Du se yóm tehe tmaba kuy anì hol ye sfulung ebè yóm Ngaen Jisas Krays, yóm gónó tekuy mogot. ¹⁰ Ó kem dumuhu setwoli, lemwót bè yóm kegebek deng blayen dou yóm gónó tekuy mogot Jisas Krays, wen hol hesgaluhu kuy, duhen yóm hol kessotu nawa ye anì là mesgólólen yóm kessotu kehedem ye anì segmung ke wen gel sensatul ye. ¹¹ Yó gónóhu mon du mò kuy nim ni, kem dumuhu setwoli, abay se deng wen bè yó kem kun fes lówó Kluwi fen tmulón du do deng wen gónó ye seglius bè yó kun. ¹² Wen se bélê ye mon du kun, “Lolou Pol dou.” Ne mon kem dumu, “Apulus dou.” Ne bud wen mon du, “Pitér dou lolò.” Ne wen se mon du kun, “Lolou Krays dou.” Yó se gónóhen mesgólól nawa ye. ¹³ Mò kehedem ye du, wadag kô yóm Jisas Krays? Tmau du de yóm deng matay bélê ye bè kros? Ou kô? Yó kô gónó ye hbabtays lemwót bè yóm klolò ye dou? Là kô yó du. ¹⁴ Hyu nawahu dou abay se laen dù tau bnabtaysu bélê ye, són Krispus ne Gayus. ¹⁵ Duhen yó, laen dù tau gembek mon du lemwót bè yóm klolò ye do gónó ye hbabtays. ¹⁶ (Ne Stifanas sotuhen yóm deng bnabtaysu, ne yó kem fes lówóhen. Okóm laen kô dù dumu tau bud tngónu ke deng bnabtaysu.) ¹⁷ Là kô yó du gónó Krays hógów dou ke mabtayse. Okóm yó gónón hógów dou mò tmulón yóm Tulón Hyu. Ne bè yóm ktulónu du, là kô hlanu du bè khulungen hedem tau te tonok. Ke yó tô nmou, déke mom gseng bélê ye yóm tey kfasangen yóm katay Krays bè kros. ¹⁸ Bè yóm gel ktulón me yóm katay Jisas bè kros, ofo kul mon du yó kem tau tolo golu elem hatay ke tulón laen dù muhen. Okóm bélê tekuy kem tau deng gewà gu lem hatay, tódô tngón tekuy bè yó gónón gfan yóm tey kfasang Dwata. ¹⁹ Deng wen udel Dwata tegenay, yó monen, “Yóm kul kehulung hedem yó kem tau temngón talak tonok, nmou sónen. Ne hegfanu yóm klaen dù muhen yóm kul ketngón yó kem tau alì bong hennagì le.” a ²⁰ Duhen yó, ke yó se nmò Dwata, tedu se gónóhen e kól yóm tau kat temngón, ne yóm tau kat bong hennagien, ne yóm tau kat hulung skuya mon? Deng tódô hedilô Dwata yóm klaen dù muhen yóm kul ketengón yó kem tau te tonok. ²¹ Bè kun kehulung hedem Dwata, là kô hlanen du bè kul ketengón kem tau tonok yóm kesetengón le ebéléen. Okóm yó gónón hlan du yóm kehewaen kul gu lem hatay, tódô lemwót bè yóm kehetahu le du yóm tulón nwit me, yóm gel mon le tulón laen dù muhen. ²² Ngem yó dé kem Ju, là kô hentahu le du yóm tulón yó ke là wen yóm hentaw ton mò gónó le hemtahu du. Bong bè yó kem tau Grik, són yó olo henebel le són yóm gónón temnù ketengón le. ²³ Okóm bélê me kum, tek sotu yóm kum gel tulón, duhen yóm tehe ktutuk le ke Krays bè kros. Nim tulón ni, tey kekebê le du yó kem Ju. Ne bud yó kem tau là Ju le, bè kul kehedem du, hol tulón laen dù muhen. ²⁴ Okóm bè kdê yó kem tau deng tenaba Dwata, tau Ju duhen ke tau là Ju le, tódô dilô le se kul nim Krays gel tulón me ni, béléen se hol gónón gfan yóm kun kefasang Dwata ne yóm kehulungen hedem. ²⁵ Bè yóm gel mon kem tau laen dù muhen, kaem alì bong he muhen senta yóm kul ketengón yó kem tau te tonok. Yóm gel mon kem tau laen dù genbek Dwata, kaem tey bong he genbeken senta yóm kul genbek yó kem tau te tonok. ²⁶ Hol hentulón ye nawa dé, kem dumuhu setwoli, yóm kuy kmò bè yóm tehe ktaba Dwata kuy. Bè kehedem tau du, là holen wen se bélê ye ke temngón, duhen ke wen kefasangen, duhen ke kesefu tau hol geta. ²⁷ Okóm yó nmò Dwata, néléken yó kem tau glaan ketengón le mò gónón hemyak yó kem tau temngón lem nim benwu ni. Ne néléken yó kem tau laen hol genbek le mò gónón hemyak yó kem tau wen genbek le lem nim benwu ni. ²⁸ Néléken yó kem tau gel hen-genok le lem nim benwu ni, ne gel kenhisik le, ne gel henwog le mò gónón lemsón yóm alì bong muhen bè yó kem tau te tonok, mò gónó Dwata hegfan yóm klaen dù muhen yóm kul gel hendem yó kem tau te tonok. ²⁹ Yó gónóm mon, laen kô dù gónó tau hton salù bè solu Dwata. ³⁰ Okóm deng sensotu Dwata tekuy bè Krays Jisas, ne bud benlayen tekuy ketngón snéen hlanen bè Krays. Ne lemwót bè Krays gónón tedeng kton Dwata tekuy, ne gónó tekuy baling kun tau laen dù belenen. Bud Krays se fen lemwà tekuy gu lem hatay. ³¹ Bong tahu se yóm monen bè Sulat Dwata, yóm monen, “Olon yóm kun deng nmò yóm gónóhem mogot yóm hol saluem. Béi mom heton salù yó dum kóm.” b