¹ Bud heftulónem kul nawa, yó kem tau bè yó anì himón le bè yó kem tau gónó le kmulu ne yó kem dumu tau wen glal le. Yake eles le tendo htifes mò du yóm hyu. ² Bê le abay sentulón yó kem dumu tau. Bê le abay mit sgés. Yake hfulung le mit swè bè kem dumu le, ne hfulung le hemganag nawa le bè kdéen tau. ³ Tehe yu ekni, tehe wen se kut gel ungel, là kô te gel himón, là se dilô te du yóm ktahuhen. Tey kegfét te bè yóm sidek knóyô lówó te, ne bè yóm dê enbeyen nawa te. Deng te gu lemen se kut yóm sdù ne yóm sélés nawa ne yóm sutó nawa. ⁴ Okóm deng gfan bélê tekuy yóm kun kganag nawa Dwata ne yóm kun kbong nawa tekuy, yó gónón lemwà tekuy gu lem hatay. ⁵ Là kô bè kehyu kmò du gónón lemwà kut, okóm tódô lemwót bè yóm kkoduhen kut, hlanen bè yóm Tulus Dwata. Lómón ke denyohen tu yóm Tulusen. Yóm kedyohen kut yó, yó se yóm kehbalingen kut ngà Dwata, ne blayen kut yóm lomi klowil. ⁶ Ne deng tódô sù Dwata bélê te yóm Tulusen mò tendo gel tmóbóng kut bè kdéen. Yóm Tulusen yó, hlanen bè Jisas Krays yóm deng lemwà tekuy gu lem hatay. ⁷  Lemwót bè yóm któbóng Jisas kut yó, yó se gónón deng hyu kton Dwata kut, ne yó se gónó te gmuta du yóm klowil laen dù sónen, yóm gel nefet nawa te ni kmoen ni. ⁸ Hono tahu nim monu mò kóm ni. Yó hol kóyóu ke hol tulónem kul ni kem ni anì henlel le mò du yóm hyu yó kem tau deng hemtahu bè Dwata. Yóm hyu gel nmò le yó, tey bong muhen bè kdéen tau. ⁹ Béi gel mung du kóm yóm skuya mon laen kô dù gónón e mefet, ne yóm kestutul le du yóm tehe fù le gónó le gu semfu. Béi mung lemen yóm sbot mon, ne yóm gel kesgés le bè yóm kun hlau Musis. Laen ofolem du myó, ne laen dù muhen. ¹⁰ Ke wen tau gel hesgólólen nawa kem dumuhen tau, bnólówem. Ke là himónen, bud budem mólów du. Okóm ke là hdonen, béen bud hegbool bélê ye. ¹¹ Abay se monem deng gesyat. Yóm sidek gel nmoen yó gónón gdilô yóm deng kegesyaten. ¹² Sok hógówu Artimas duhen ke Tikikus edyó béléem, hol senlongem ou bè Nikapulis, abay se bè yó gónóhu nô bè yóm bulónen sidek kdaw. ¹³ Hol gel tnóbóngem se ke Sinas kun, yóm begadu, dalang se Apulus anì laen dù gónó le élél bè yóm kógów le. ¹⁴ Yó kem dumu te deng hemtahu bè yó, yake hol le hfulung mò du yóm hyu anì duhe kóm wen lan le gel tmóbóng yó kem dumu tau laen bang genbek le. Là hyuhen ke là wen muhen yóm klowil le. ¹⁵ Nim kdê dumuhu bè ni ni, tey gel kólóm le kóm. Hol tulónem yó kem dumu me ston nawa dyó yóm tey kólóm me kul. Yó ne kóó. Dwata he hol tendo tmóbóng kuy yóm kdê ye.