¹ Okóm kóm du, hol tolokem kul yóm segtón ebè yóm tahu tolok. ² Yó hol hloloem kul yó kem logi deng malay knawa le, bê le abay hlengel, yake hfulung le mit ktau le, ne hfulung le mafas nawa le. Yake hgemel le kehtahu le, ne hfulung le kembong nawa kem dumu le, ne hfulung le hbala ke wen gónó le glayam. ³ Dalang se yó kem libun deng malay knawa le, hol nmò le se kul yóm gónó le madat kul yó kem dumu le. Bê le abay tódô sentulón kem dumu le. Bê le abay hlengel. Yakà bélê le du gónó le dmalang du yóm hyu yó kem libun lomi myehen. ⁴ Yó dnalang le bélê le yóm kbong nawa le kem tuha logi le dalang se yó kem ngà le. ⁵ Bud dnalang le bélê le se yóm khulung mafas nawa, ne yóm klaen dù belenen yóm gel nmò le, ne yóm khulung hgifat gu lem gónó le, ne yóm khulung le heglaan bè kem tuha logi le. Ke ni se gel nmò yó kem libun, laen kô bang gónó le gemsanil du yóm tulón lemwót bè Dwata yó kem dumu tau hmilol kul. ⁶ Dalang se bè yó kem sawang logi, hol le hfulung mafas nawa le. ⁷ Yake béléem dé, Taytus, mò gónó le dmalang du yóm kehyu kmò. Hol hewótem lem but blututem yóm ktolokem kul, béem mom hningay. ⁸ Yake hono tahu yóm gel tolokem kul anì laen dù gónó le gemsanil du yóm gel tulónem. Ke ni se nmoem, mulék le myak yó kem hmohon kut lemwót bè yóm klaen dù bang udél le eta te. ⁹ Yó kem tau klifen, yake hol le heglaan bè yó kem tau mfun kul, ne hol nmò le yóm gónó le hefligal kul. Hol bê le abay smabà ¹⁰ ne bê le se abay tódô temsob. Yake lu dé yóm tau hol mfesek anì seklóón ebè yóm gel nmò le yóm dnalang le gbak ebè Dwata, yóm deng lemwà tekuy gu lem hatay. ¹¹ Deng hegfan Dwata yóm tey nawahen ebè kdéen tau bè yóm kehewaen tekuy gu lem hatay. ¹² Lemwót bè yóm tey nawahen yó, bê kuy bud nmò yóm kun kenbê bélê tekuy. Bê te abay geskét du yó kem gel kenbeyen nawa lem nim benwu ni. Hfulung te mit yóm kut ktau, hebtol te knawa te, ne nmò te yóm gónó te gulit ebè Dwata. ¹³ Ni se hol nmò tekuy yóm igò tekuy semsangat du yóm kdaw hendón nefet nawa te, duhen yóm kdaw kesfuléken edini Jisas Krays, yóm Dwata tekuy, yóm deng lemwà tekuy gu lem hatay. Angat hol gfan bè yóm kdaw yó yóm alì kegetahen. ¹⁴ Deng fen hamaen yóm kun klowil bélê tekuy anì lenwaen tekuy bè kdéen sidek gónó te gel geskét, ne henbalingen tekuy kem kun tau deng mólós, anì gotu nawa tekuy mò du yóm nmò hyu. ¹⁵ Hol tolokem kul ni kem ni. Hol gendufem lu mimón, ne bnólówem lu ke wen gónó le teklé, yakà wen kóm kwalis mò du. Ne béem nmò yóm gónó le kemfê kóm.