¹ Duhen yó, kem dumuhu setwoli, tey kogot nawahu ebélê ye, ne tey khahuu kuy. Lelen tey wen gónó ye hefligal do, ne tey kehyu nawahu du yóm gel kmò ye. Ke lolò ye ni kem tulónu kuy ni koni, kem dumuhu sogot nawa, ni se gónón mbegel yóm klolò ye du yóm gónó tekuy mogot. ² Ni wen udélu ebè yó kem lewu libun Iyudiya ne Sintika. Yó hol kóyóu bélê ye ke géhél ye sotun lemwót bè yóm kesetwoli ye bè yóm gónó tekuy mogot. ³ Ne uu snéen, Wè, yóm tau là monol nawahen tmóbóng dou, yake uu hol tmóbóng kul anì géhél le sefyu. Tey tehe khotu le nawa le tmóbóng do ekni bè yóm kehbólu yóm Tulón Hyu. Tehe le gel mung ke Klémén ne yó kem dumu gel tmóbóng dou. Yóm kul boluy deng gotu nô bè yóm bok Dwata, duhen yóm bok lowil. a ⁴ Hol ye tendo gel hligal dé lemwót bè yóm deng kessotu ye bè yóm gónó tekuy mogot. Bud nulitu bélê ye yóm monu yó koni, hol ye gel hligal dé. ⁵ Hol hen‑ganag ye nawa ye bè yóm kdéen tau. Móyónen kól ne yóm gónó tekuy mogot. ⁶ Béen gel tafa nawa ye balù kihu gel sut bélê ye. Okóm bè yóm gel kni ye bè Dwata, gotu hni ye béléen yóm wen mu ye du. Ne eles hmung ye du se yóm gel kdóyón ye du.  Ke ni se gel nmò ye, gnóm ye yóm kenek nawa lemwót bè Dwata. ⁷ Yóm kenek nawa yó, là gbek tekuy hmingón du yóm a 4:3 Yóm bok lowil monen yó, yó se yóm bok gónó le smulat du ditu bè longit yóm boluy yó kem tau gmuta du yóm klowil laen dù sónen. mò kmoen. Ke deng gnóm ye, là kóen bud sbeweg ne kehedem ye, baling menek kegnóm ye du lemwót bè yóm deng kessotu ye bè Krays Jisas. ⁸ Ni mò sónu du bélê ye, kem dumuhu setwoli. Yake hol sù ye lem hendem ye dé yóm hyu, ne yóm knóón bang dóyón. Tey hyu ke són gel hendem ye yóm tahu ne yóm tedeng ne yóm mólós, ne yóm minggel ne yóm knóón nadat. ⁹ Hol gel nmò ye yó kem deng dnalang ye lemwót bè yóm deng gungol ye ne yóm deng ton ye béléu. Ke yó se nmò ye, hlós nô bélê ye Dwata, yóm tendo henek nawa tekuy. ¹⁰ Lemwót bè yóm kessotu me yóm gónó tekuy mogot, tey bong kligalu bè yóm tóbóng ye bud sut béléu. Tngónu yóm gónó ye là géhél hemwit ebéléu, là lemwóten bè yóm là kehedem ye do, okóm lemwót bè yóm klaen dù lan ye hemwit du ebéléu. ¹¹ Là kô yó du gónóhu mon du yó koni ke mone gónóhu tmulón du kuy yóm kélélu. Deng hónô dnalangu dou yóm kegsengel nawa balù kihu nô béléu. ¹² Deng kem hónô lanu ne dou yóm élél, ne deng lanu se yóm kwen gónóhu wen. Deng dnalangu ne dou nim kegsengel nawa ni, balù kihu gónóhu nô, ne kihu kdaw. Gsengel nawahu ke gemtuhe duhen ke bitile, ke wen gónóhu wen duhen ke éléle. ¹³ Laen dù là gbeku du lemwót bè yóm kfasang Krays béléu. ¹⁴ Okóm tey hyu se yóm kwen hwit ye ebéléu bè yóm igou glayam. ¹⁵ Deng hónô tngón ye se kuy, yu kem tau bè Flipay, yóm le kuléku gu dyó bè kuy prubinsya Masdunya bè yóm tehe kbutu tmolok lem blóng ye yóm Tulón Hyu, sónen yu se yó kem hemtahu bè yó gel tmóbóng dou. Laen kô dù dumu tau fen tmóbóng do bè filak, són sem yu. ¹⁶ Bè yóm tehe kwen gónóhu élél bè yóm tolo knóu bè syudad Tisalunika, là olon tek sulék du yóm tehe kehwit ye tóbóng ebéléu. ¹⁷ Là kô yó du sen‑galuhu ke hol gel wen blay ye dou, okóm yó hol sen‑ galuhu ke temnù yóm ofol blay Dwata kuy. ¹⁸ Duhen yó, ni sii mò lesibuhen yóm kdê deng blay ye do, botong wen lukasen béléu lemwót bè yóm blay ye do yó. Laen kô dù hendeenu ni kmoen ni lemwót bè yóm blay ye dou hlan ye bè pafruditus. Ni kem blay ye dou ni, hol lómón yóm gel dsù le alì minggel boohen gel blay le ebè Dwata, yóm dsù gel henmóyóen, ne yóm gónón gel hyu nawahen. ¹⁹ Ke Dwata kun, lemwót bè yóm tey kendengenen, gotu blayen kuy yóm gónó ye élél hlanen bè Krays Jisas. ²⁰ Hol bê tekuy abay nmò sónen yóm kdóyón tekuy ke Dwata yóm Mà tekuy. ²¹ Tey gel kólómu kul yó kem kun tau Dwata bè yó, yó kem tau deng nfun Krays Jisas. Dalang se ni kem dumu tekuy setwoli bè ni, tey gel kólóm le kuy. ²² Tódô kdê ni kem tau Dwata bè ni, tey kul kólóm kuy snéen, hol néen ni kem tau mò nmò bè yóm gónô bong yóm tau hol geta bè klamangen. ²³ Yó hem gónó tekuy mogot Jisas Krays hol tendo tmóbóng kuy.