¹ Ni hol són yóm tulónu kuy, kem dumuhu etwoli. Hol ye gel hligal dé lemwót bè yóm deng kessotu ye bè yóm gónó tekuy mogot. Wen bud sensulitu bélê ye yóm tehe snulatu bélê ye anì là tlas ye. ² Hol ten‑gama ye yó kem tau sidek nmò le, kem tau alì sekban, kem tau alì móyô mò du bélê ye yóm tmulì. ³ Bè ktahuhen, tekuy se yóm tau wen tahu ilóen, là kô lu du. Abay se tekuy se yó kem tau gel hloni bè Dwata hlanen bè Tulusen. Tekuy se yóm alì hligal lemwót bè yóm deng kessotu tekuy bè Krays Jisas. Là bud snalig tekuy du ne yó kem gel hlolò tau mò lan tekuy gewà gu lem hatay. ⁴ Bè ktahuhen, wen lanu smalig du yó kem yó ke wen muhen. Ke wen tau tô smalig du yóm dê hlolò le yó, milud he yóm dou ksalig du. ⁵ Abay se nim ou, bè yóm sotu fedyanu deng sut, htulì le ou snéen. Ne ou se hol semfu gu bè Israél, lugod yóm sotu ngaen Bindyamin. Tahuhe tau Hibru se dou. Bè yóm kdê hlau me mi kem Ju, gotu lolou, yakà tauhe Farisi se dou. ⁶ Lemwót bè yóm alì kkinì nawahu lemolò du, botong gotu genlau yó kem tau hemtahu bè Jisas. Ke yó gónón baling tedeng yóm tau lanen lemolò du yó kem hlau, kaem laen dù gónó le gemsanil dou. ⁷  Okóm tódô tebelu ne yó kem yó, yóm tehe alì bong muhen béléu. Deng dilóu laen dù nefeten. Deng tlesu du ne yóm tahu bong muhen, duhen Krays. ⁸ Là sónen du yóm monu yó koni yóm tebelu. Deng gotu tebelu snéen yóm kentihen tehe gel lolou anì gutahu yóm alì bong muhen senta le, duhen yóm ketngónu ke Krays Jisas yóm gónóhu mogot. Lemwót bè yóm ketngónu du, tódô gotu tebelu ne yóm gna lolou, hol lómón ke desenfól kehedemu kul anì duhe kóm, hol tngónu Krays, ⁹ 9 ne anì hol me baling ssotu yóm lewu me. Là bud wen gónóhu tedeng ne ke lemwót bè klolou yóm hlau. Okóm ni, denge baling tedeng lemwót bè yóm kehtahuhu bè Krays. Nim ktedeng monu ni, tódô blay Dwata lemwót bè yóm kehtahuhu. ¹⁰ Tek són yó hol sen‑galuhu ni kmoen ni, duhen yóm ketngónu ke Krays, ne ke gnómu bè klowilu yóm tey kegbek Krays bè yóm deng klowilen gu lem hatay. Kóyóu ke gnómu snéen dou yóm tehe keglayamen anì mkéle du bè yóm tehe katayen, ¹¹ abay se wen hendón nefet nawahu, duhen yóm angat klowilen dou gu lem hatay. ¹² Ni kem monu ni koni, là monu du dé ke deng gotu ketu mò du, duhen ke denge hol gulit. Okóm yó dé hol nmou, hotuhu gelu kemtes du anì angat gutahu yóm ofol blay Krays Jisas dou, yakà yó du uléken yóm tehe kfunen dou. ¹³ Bè ktahuhen, kem dumuhu setwoli, là deng gutahu du he ni kem ni. Okóm tek sotu ne nmou ni kmoen ni, tódô klifótu yóm gnahen, hotuhu gelu anì gutahu yóm hol nalu nawahu. ¹⁴ Yó gónóm mon, tódô henktengu yóm dou klóy efet gutahu yóm ofol blay Dwata do, duhen yóm klowil bè longit, yóm tehe tabahen dou hlanen bè Krays Jisas. ¹⁵ Yóm kdê tekuy deng malay kehtahuhen, yake lómón ni dé kehedem tekuy. Okóm ke wen bélê ye tólóng kehedemen, heglileb Dwata kul he nim ni. ¹⁶ Baluen ke lómón yó kehedem le, syan ke hol henkteng tekuy yóm deng klolò te du lemwót bè kbut yóm kehtahu te. ¹⁷ Yake henlel ye dmalang du yóm dou kmò, kem dumuhu setwoli, ne hol gel hnénég ye dé yó kem dumu tau deng gel lemolò du yóm kum kmò. ¹⁸ Abay se tey dê tau tódô dilóem bè kekdol le yóm khohon le yóm katay Krays bè kros. Deng dê duléku ne tmulón du kuy nim ni, botong mosok lewoku nim bud ktulónu du kuy ni. ¹⁹ Yó kem tau yó, angat le gógów elem lanaw ofi, abay se yóm kul knóyô lówó, hol lómón ke yó se dwata lolò le. Deng le mom hegmón du yóm nmò gónó myak. Són yó nô bè nawa le, són yóm nmò tau talak tonok. ²⁰ Okóm tólóng yóm bélê tekuy. Longit se benwu tekuy. Ne wen tey tendo hendón nangat tekuy ni kmoen ni, duhen yóm fen lemwà tekuy gu lem hatay, yóm gónó tekuy mogot Jisas Krays lemwót gu bè longit. ²¹ Bè yóm angat kesfuléken edini, tenlesen yóm lówó tekuy mahil matay nii, ne heskélen bè yóm kun lówó là matayen. Yóm kegbeken mò du nim ni, bud yó se yóm kegbeken mogot du yóm klamangen.