¹ Ó kem dumuhu setwoli, yóm deng tnaba Dwata mò kem tauhen. Hol hendem tekuy dé Jisas. Du se yóm deng hógów Dwata elem blóng tekuy mò fen blóng tekuy ebè Dwata bè yóm kehtahu tekuy. ² Tey kteneb Jisas bè yóm tehe hmò Dwata du. Hol lómón yóm tehe kteneb Musis bè yóm tehe kwiten yó kem kun tau Dwata. Yóm kwiten kul yó, hol lómón ke mò nmò lem gónô Dwata. ³ Bede sal gel dóyón tekuy yóm tau fun gónô senta yóm gónô hdaen. Lómón yó se ke Jisas kun, tey bong kadat Dwata du senta Musis. ⁴ Ket gónô, sal gel wen fen mò du. Bede Dwata fen hol mò du yóm kdéen. ⁵ Bong ke Musis kun, du se sotu tau mò nmò bè gónô Dwata, ne tey teneb yóm kmoen nmò. Yó kem kun nmò yó, gotu hningónen yóm hol tahu duhen angat hegfan Dwata bè hulin kdaw. ⁶ Okóm ke Krays kun, du se hol kun Ngà Dwata, ne gotu hfogot Dwata du yóm gónóen yó, ne tey teneb kogoten du. Tekuy se kun gónô Dwata, syan ke là likò tekuy lemolò du, ne ke hol gentud nawa tekuy yóm hendón nefet nawa tekuy. ⁷ Duhen yó, hol hendem tekuy yóm tehe mon yóm Tulus Dwata, yóm monen, “Ke sok gungol ye ni kemdaw ni yóm udél Dwata ebélê ye, ⁸ hol bê ye abay là himón, lómón yóm deng tehe nmò yó kem fù ye bè yóm tehe là kehdon le ke Dwata. Là kô le himón bè yóm tehe knô le bè yóm benwu là hyu menwu du, bè yóm kdaw tehe ktilów le ke Dwata. ⁹ Yó mon Dwata, botong fat folò halayen kegen le mton du yóm gel któbóngu kul, ewenem sana ktilów le do. ¹⁰ Yó se gónóhu alì lembut kul, ne yó gónóhu mon du, ‘Hono kem tau tabag kehedem le yóm kdê le, mom kenbê le yóm dou hlolò kul.’ ¹¹ Tey kebutu kul, ya tey kget kmonu du, ‘Hol là gehlós le edu kul yóm benwu mò gónó le hlós henek nô.’ ” ¹² Ó kem dumuhu setwoli, hol ye eles temgama anì là nóen bélê ye yóm knawa sidek, yóm knawa là mimón. Lemwót bè yóm knawa yó gónó ye kmogol ke Dwata, yóm Dwata laen dù tul katayen. ¹³ Okóm yó dé yóm hol tnana nmò ye yóm igoen tolo wen kdaw blay Dwata tekuy, hol ye setgel ket kdaw anì laen dù bélê ye gtondo bè yóm sidek, ne hlós baling tau là mimón. ¹⁴ Són gónó kuy hlós mò kun dumu Krays ke là kó tekuy du yóm tehe kegtud nawa te du. ¹⁵ Wen yóm monen bè Sulat Dwata, yóm monen, “Ke sok gungol ye nim kemdaw ni yóm udél Dwata ebélê ye, hol bê ye abay là himón, lómón yóm deng tehe nmò yó kem fù ye bè yóm tehe là kehdon le ke Dwata.” ¹⁶ Tau du de ni kem tau mon Dwata ni koni, yó kem tehe hmungol du yóm udélen, okóm là hdon le? Yó kem tau monen yó koni, yó sem kdéen tau tehe nalak Musis gu bè Idyip. ¹⁷ Tau du de yóm tau lenbut Dwata bè fat folò halayen? Yó se kem tau mò sidek, yó kem tau tódô matay lem yóm benwu là hyu menwu du. ¹⁸ Wen yóm alì mget tehe mon Dwata, yó monen, “Hol là gehlós le edu tum benwu mò gónó le angat hlós henek nô.” Tau du se gónón e gbak yóm udélen yó? Kaem gbak ebè yó kem tau là hdonen. ¹⁹ Tahu se, laen kô dù bélê le gehlós ebè tum benwu tu lemwót bè yóm là kehtahu le.