¹ Ke lómónen yó kegetahen yóm gónó tekuy mogot, hol sù tekuy bè nawa tekuy sen yóm ktahuhen deng gungol tekuy anì là snonol tekuy du. ² Tey mget yóm tehe tulón Dwata yó kem tehe fù tekuy ekni, hlanen bè yó kem gel hógówen gu bè longit. Ke wen tau mulé du, sal gel megtafak du, yóm tafak mò balà yóm sidek deng nmoen. ³ Mom milud he kegtafak tekuy ke là kenmón tekuy du yóm tey hyu deng nmò Dwata bélê tekuy mò lan tekuy gewà gu lem hatay. Yó sem gónó tekuy mogot yóm tanay tmulón du yóm lan yó, ne lemwót yó kem tau mungol du, bud lu se hetngón du tekuy yóm ktahuhen. ⁴ Ne ke Dwata kun, bud du se gemtanud du yóm ktahuhen yóm gel tulón le hlanen bè yó kem tey dê hentaw ton hmoen kul, lelen wen yóm kenhulung lemwót bè Tulusen tódô blayen bè yó kem tau deng néléken. ⁵ Wen yóm gel tulón me kuy, duhen yóm lomi benwu angat nmò Dwata. Nim lomi benwu nmoen ni, là kô hfogoten du yó kem hógówen gu bè longit. ⁶ Mom tau te tonok néléken mò hogoten du, hol lómón yóm monen bè Sulat Dwata, yóm monen, “Ó Dwata, kiholem kóem kemmón kul yó kem tau? Kiholem kóem alì semgyok kul igò le olo tau te tonok? ⁷ Deng hlun heglaanem lu bè yó kem gel hógówem gu bè longit. Tehe oluhem kul yóm kegeta le, ne yóm kadat le kul, ⁸ ne tódô gotu hkemem kul kdéen.”  Bè yóm kehkem Dwata du yó kem tau yóm kdéen, laen kô dù bud tebel du. Bede là tagad ton tekuy du he yóm kehkemen du kul ni kmoen ni. ⁹ Okóm deng ton tekuy Jisas. Bè yóm tehe knóen te tonok, hlun heglaan Dwata bè yó kem gel hógówen gu bè longit anì fen na a matay bè kdéen tau. Yó se mò lan Dwata tmóbóng kul. Okóm ni kmoen ni, deng ton tekuy yóm tey kehegeta Dwata du, ne yóm tey kadat le du lemwót bè yóm keglayamen bè yóm katayen bélê tekuy. ¹⁰ Dwata se yóm tehe dmimun du yóm kentihen, ne tolo nkemen he ni kmoen ni. Tey hyu yóm tehe nmoen bè Jisas, nan na hlan bè yóm gónón hol glayam anì gfan yóm tey kguliten. Ni se lan Dwata mit tekuy kem ngaen etu bè longit. Yakà Jisas du yóm tukô gna tekuy ebè yóm klowil laen dù sónen. ¹¹ Du se gembek hólós tekuy bè yó kem sidek gel nmò tekuy. Ne tekuy se yó kem tau hólósen gbót menmà béléen bè Dwata. Yó se gónó Jisas là kemyak moluy tekuy kem dumuhen setwoli. ¹² Tehe monen mò ke Dwata, monen, “Angat tulónu yóm deng gendengem bè yó kem dumuhu setwoli. Angat dóyónu uu bè yóm gel kestifun le.” ¹³ Ne wen bud monen, “Dwata se yóm hol snaligu.” Ne bud ni sii yóm sotu tehe monen, “Ni ou, Dwata, gotu le mung do yó kem ngà deng blayem do.” ¹⁴ Yó kem ngà mon Jisas yó koni, kem tau te tonok se yó, wen unged le ne wen litô le. Ne ke Jisas kun, hbaling tau mkél bélê tekuy. Yó gónón mò du anì fen matay bélê tekuy. Lemwót bè yóm katayen yó mò lanen gemlà ke Seitan, yóm fen mogot yóm hatay. ¹⁵ Bè yóm katayen yó, yó gónón lemwà tekuy kem tau alì likò matay, abay se monem tolo kuy gfét du bè yóm igò tekuy mowil. ¹⁶ Bè yóm tehe katay Jisas, sundu yó du tnóbóngen ke mone yó kem gel hógów Dwata gu bè longit. Kaem tau yóm tnóbóngen, hol lómón yóm monen bè Sulat Dwata, yóm monen, “Tnóbóngen yó kem tau semfu gu bè yóm tehe Abraham.” ¹⁷ Bè yóm któbóngen tau, là gbeken du ke là nan tódô hbaling tau anì mkél bélê tekuy kem dumuhen setwoli. Yó gónón na gbót bè yóm kmò tekuy anì du mò blóng tekuy ebè Dwata, ne anì là mili nawahen mò du bélê tekuy, ne anì hol knoduhen tekuy. Bè yóm keseblóngen yó, yó se gónó Dwata hmifót salà tekuy. ¹⁸ Ne ni kmoen ni, gbeken tmóbóng yó kem tau ke wen sindil sut bélê le, abay se deng gnómen se kun yóm sindil, ne deng glayam.