¹ ehe yu ekni, yóm Dwata tódô gel mudél ebè yó kem tau gnan tehe gónó tekuy gu semfu hlanen bè yó kem tugoden. Ne tey dê dulék Dwata mudél ebélê le, ne tey dê lanen mò du snéen. ² Okóm tólóng ni kmoen ni. Yóm kudél Dwata ebélê tekuy, deng hlanen bè yóm Ngaen. Yóm Ngaen yó, du se yóm deng fen hedlimunen yóm kentihen, ne deng néléken mò angat mfun du snéen. ³ Yóm kun kegeta Dwata, deng hol tódô tahu gfan bè yóm Ngaen yó. Yóm kun kmò Dwata, yó se kun kmò yóm Ngaen. Du fen mkem du yóm kdê nmoen hlanen bè yóm udélen alì mfasang. Timbow kogol yóm tehe kkóhen salà kdéen tau, tódô mulék ebè longit, ne myón fi bè kwanan yóm Dwata alì mfasang bè kdéen. ⁴ Yóm Ngaen yó, deng tey kehegeta Dwata du senta yó kem gel hógówen gu bè longit. Ne bè yóm ktaba Dwata du hol kun Ngà, bud yó sotu gónón gfan yóm kehegetahen du senta yóm kul kegeta yó kem gel hógówen. ⁵ Abay se laen dù bélê le ke mon Dwata mò kul, “Uu yóm hol Ngau. Deng duhen ni ne yóm kdaw kehegfanu du yóm kngau kóm.”  Balù sotu bè yó kem hógówen ke wen tulónen gbak ebélê le, ke monen, “Ou se angat Maem, ne uu se angat Ngau.” ⁶ Ne bè yóm tehe khógów Dwata yóm Ngaen elem benwu, yó udélen, monen, “Yake hol gel dóyón yó kem gel hógówu gu bè longit.” ⁷ Ne yó fen udél Dwata gbak ebè yó kem gel hógówen, yó monen, “Yó kem gel hógówu gu bè longit, gbeku hembaling kul lenos duhen ke dilóf ofi.” ⁸ Okóm tólóng se udél Dwata ebè yóm hol Ngaen. Tehe monen mò du, “Ó Dwata, laen kô dù nan e són yóm kogotem tau. Tey tedeng yóm kogotem kul. ⁹ Tey hyu nawahem du yóm nmò tedeng, ne kenbéem yóm nmò sidek. Yó gónóhu mélék kóm mò hegetahu ne mò hnigalu senta yó kem dumuhem.” ¹⁰ Sotu tehe bud udél Dwata ebéléen, monen, “Bè yóm tehe tekang kbuten, Dwata, uu se tehe dmimun du klamangen tonok, ne tehe kóm lan tdok yóm longit. ¹¹ Angat wen són le yó kem yó, fen là yó dum kóm. Hol lómón kmoem kul, hol lómón yóm nes bolok. ¹² Angat tódô lenfiem, ne tlesem du yóm lomi. Okóm yó dum kóm, là kóen megetles, ne laen kô nam e són.” ¹³ Balù sotu bè yó kem gel hógów Dwata ke deng gónón e mon du, “Myóni bè ni fi bè kwananu. Angat ndau lu elaan he yó kem hmohon kóm.” ¹⁴ Okóm kul yó kem gel hógówen, mò kmò le se kul du? Lu se yóm mtulus tóbóng lówó Dwata. Gel dóken lu mò fen tmóbóng yó kem tau angat gmuta du yóm klowil laen dù sónen.