¹ Bè yó kem tau hemtahu bè syudad Antyok, wen se bélê le tódô ge temugod ke Dwata, ne wen se bélê le hulung temolok. Ni se boluy le: Barnabas, Simyun (yóm niba le Hitem), Lusyus (lemwót bè syudad Sayrin), ne Menain (yóm tehe dumuhen senok Gubérnor Hirod),ne Sol. ² Sotu kedaw bè yó, fasting le. Bè yóm igò le mni, tódô setulón bélê le yóm Tulus Dwata, monen, “Hetfing ye do Barnabas lewu le Sol. Wen hemou ku.” ³ Tahu se. Bud bud le fasting, ne meni le bè Dwata. Omin le semsenok ku le Barnabas lewu le Sol, omin le hewót ku. ⁴ Kewót Barnabas bè yó lewu le Sol, tendo nalaken lu yóm Tulus Dwata. Mógów le ebè syudad Silusya. Bè yó gónó le smakay owong mógów ebè Siprus. ⁵ Timbow le kemó bè yó bè yóm sotu benwu boluyen Selamis, helós le temolok udé Dwata bè yó kem gónó le ge setifun yó kem yu bè yó. Bè yóm kógów le ni, mung ku Jan Mark mò ge temóbóng ku. ⁶ Kewót le bè yó bè Selamis, tódô henalak le kó bè Pafus, nô bè doli yóm benwu udì te mohin yó. Bè yóm benwu Pafus yó, wen tau wen lamaten nô bè yó, boluyen Bar Jisas. Ju senéen kun. Gel monen du se sotu tugod Dwata kun. ⁷ Swè le Bar Jisas yóm gubérnor bè yó, boluyen Sérgiyus Polus. Tau hulung hedem yóm gubérnor yó. Sotu kedaw, tinoken Barnabas lewu le Sol ebéléen, abay se móyô hemungo du yóm udé Dwata. ⁸ Okóm yóm tau wen lamaten yó koni, tey kekebéen ku. Kóyóen ke là hentahu yóm gubérnor du yóm kul tulón. (Yó boluyen bè Grik nim tau ni, Élimas.) ⁹ Uma kóm yóm Sol, yó sotu gel boluy le du Pol, tey kalaken du yóm Tulus Dwata. Yó nmoen, tódô henunu tenngelen yóm tau wen lamaten yó, ne monen mò du, ¹⁰ “Tauhi Seitan nim uu. Hohonem yó kem kedéen heyu. Són nô bè nawahem yóm kesukatem kem tau. Deng mem henkéngem yóm ho ketahuhen lemwót bè Dwata. ¹¹ Ngem, ni ne kegetekem yóm ketafak Dwata kóm. Nem ne butô efet yóm kehekó Dwata du béléem.” Sen gengen se mefet bè Élimas yóm kebutóen. Tódô migóf, mebe tau mò malak du. ¹² Timbow deng ton yóm gubérnor yóm kebutô Élimas, hentahuhen ne yóm tulón Pol. Ne tey ketengahen du yóm ketolok le gebak ebè Jisas yóm gónó le mogot. ¹³ Kewót le Pol bè yó bè Pafus, semakay le owong mógów ebè Pérga, yóm sotu syudad sendifal mohin, gsakuf prubinsya Pamfilya. Yóm kekól le bè yó, deng mem beklil mulék ebè Jirusalim Jan Mark. ¹⁴ Bud kewót le Pol bè yó, temonok le e subô ebè yóm sotu syudad boluyen Antyok. Nim Antyok ni, gesakuf prubinsya Pisidya. Timbow heto yóm Kedaw Kehegenô, mung le bè yóm ku gónó ge setifun yó kem yu bè yó. ¹⁵ Wen senfala yó kem tau malak bè yó lemwót bè yóm helau Musis ne bè yóm senulat yó kem gena tugod Dwata tganay. Timbow deng kesfala le, wen udé hegefet le bè le Pol, mon le, “Ó kem dumu me setwoli, móyô me ke wen tulón ye mò gónó ye gemduf kum.” ¹⁶ Omin Pol mdà, demiwel sigel ebélê le, monen, “Yu kem dumuhu tau Israél, dalang se yu kem tau là Ju le deng hemtahu bè Dwata, hol henungol ye yóm tulónu kuy. ¹⁷ Bè yóm tehe yu teganay, deng tódô nélék Dwata yó kem tau gónó tekuy gu semfu. Bè yóm tehe kenô le bè Idyip, bè yóm benwu la ko kul du, tey kehból Dwata kul. Ne bè yóm bud kehewaen kul, tey kehegfanen du bélê le yóm kefasangen. ¹⁸ Botong fat folò halayen kegenen hembala du yóm là kimón le du ditu bè yóm benwu laen dù tau menwu du. ¹⁹ Gloken gotu hematay yó kem hitu kay but tau nô lem yóm benwu Kanan mò gónón hebenwu yó kem tehe teme tekuy. ²⁰ Yó kegenen mò du yóm ni, botong fat latu bud limu folò halayen. Bè yóm deng kebenwu le bè kul benwu bè Kanan, benlay Dwata lu tau mò kemukum bélê le efet kól bè yóm kun kdaw Samwél, yóm sotu tau gena tugod Dwata tganay. ²¹ Bè yóm kdaw yó, yó heni le bè Dwata ke wen tau mò hol geta bélê le mò gónó le galak. Duhen Sol ngà Kis se yóm tendok Dwata mò hol geta bélê le, yóm tau semfu gu bè Bindyamin. Yó kegen Sol geta bélê le, botong fat folò halayen. ²² Timbow kó Dwata Sol, telesen du Dabid mò tau hol geta bélê le. Wen tulón Dwata gebak ebè Dabid, yó monen, ‘Nim Dabid ngà Jisi ni, tey hyu nawahu ebéléen. Angat gotu nmoen yóm kdê hmou du.’ ²³ Ne bè Dabid se gónóhen gu semfu Jisas, yóm tau tehe fasad Dwata yó kem tau Israél mò gónó tekuy gewà gu lem salà. ²⁴ Gu laan Jisas là deng mebut temolok,” mon Pol, “Jan yóm gna temolok lem belóng kem tau Israél. Yó gel tulónen, monen, ‘Kenogol ye yó kem sidek gel nmò ye, ne hbabtays ye.’ ²⁵ Bè yóm deng móyón kegesón yóm kun ketolok Jan, yó udélen ebè yó kem tau, monen, ‘Ofo kuy mon du kô ke ou yóm gel nangat ye? Là gi. Huli dou yóm tau nangat ye yó. Là kóe knóón ke tóe hesek béléen.’ ²⁶ Ó kem dumuhu tau Israél,” mon Pol, “kem tau tememe bè Abraham, dalang se yu kem tau là Juhen deng hemtahu bè Dwata, ebélê tekuy se gónó Dwata e hemwit du yóm tulón mò gónó tekuy gewà gu lem hatay. ²⁷ Yó kem tau menwu bè Jirusalim kkólen bè yó kem tau gel malak kul, là kô dilô le du ke Jisas yóm deng nélék Dwata mò lemwà tekuy gu lem hatay. Ne là kô glileb le du snéen yóm tehe udél yó kem tehe gna tugod Dwata tganay, yóm gel benasa le bè ket Kdaw Kehegnô. Okóm bè yóm khatay le ke Jisas, yó se deng gónón dohò yóm udél gel benasa le yó. ²⁸ Balù yóm klaen dù salà ton le bè Jisas mò gónó le hmatay du, ewenem, sana kni le du bè Paylét anì hfatayen. ²⁹ Ne tahu se,” mon Pol, “hfatay le. Timbow deng gotu nmò le yóm gónón dohò yóm kdê tehe eles hsulat Dwata gbak ebéléen, omin le ma lówóhen bè kros, tódô sù le lem yóm kilib gónó le lembeng du. ³⁰ Okóm bè getluhen kdaw bud hlowil Dwata. ³¹ Kogol yóm deng bud klowilen, dê duléken ne bud hegfan bè yó kem tau tehe mung du gu bè Galili etu bè Jirusalim. Ni kmoen ni, lu se gebentey du bè kdéen tau Israél yóm deng klowilen. ³² - ³³ Duhen ni se,” mon Pol, “yóm Tulón Hyu tendo kum gel nwit ni. Bè yóm deng klowil Dwata ke Jisas, yó se gónón dohò yóm tehe fasaden yó kem tehe teme tekuy tganay. Duhen ni se tekuy kem tau tugod le fen gmafit du. Du se gónón e gbak yóm tehe hsulat Dwata bè bok Lingón, yóm monen, ‘Uu yóm hol Ngau. Deng duhen ni ne kehegfanu du yóm kngau kóm.’ ³⁴ Deng eles tulón Dwata snéen yóm angat kehlowilen ke Jisas, ne yóm là kehboloken du lówóhen lem lebengen. Yó udél Dwata, monen, ‘Angat hdohou etahem yóm tehe fasadu ke Dabid tganay.’ ³⁵ Wen sotu tehe utóm lingón Dabid ebè Dwata tganay, monen, ‘Là kô nem e bayà hbolok du lem lebengen yóm tau tóbóng lówóhem gotu nawahen kóm.’ ³⁶ Yóm utóm lingón Dabid yó, là kóen gbak ebè kun knô. Abay se bè yóm deng gotu kdeng Dabid yóm hmò Dwata du, matay se kun, ne lebeng le klohok yó kem tehe teme en, ne deng kem bolok ne lówóhen. ³⁷ Okóm yóm tehe kehlowil Dwata ke Jisas, là kóen bolok lówóhen. ³⁸ Yó gónóm mon, kem dumuhu tau Israél,” mon Pol, “hol kóyóu ke tngón ye bè Jisas se gónó Dwata hlan du yóm kehlifóten salà kem tau. Bong bè yó dum klolò tekuy yóm hlau Musis, laen dù gónón mkó du salà te. ³⁹ Okóm ke nô kihu tau hemtahu bè Jisas, yó se gónón gewà gu lem salà. ⁴⁰ Yó gónóm mon du, hol ye eles temgama anì là getdoken ebélê ye yó kem tehe udél yó kem gna tugod Dwata tganay, yóm mon le, ⁴¹ ‘Tenngel ye dé, yu kem tau là hemtahuhen. Igò ye se tnga du yóm gel ton ye, deng ye mem sekel du. Baluen he ke wen tau hol tmulón du kuy yóm nmou ni, ewenem là kô ne ye e hentahu du.’ ” ⁴² Bè yóm bud kewót le Pol ne Barnabas bè yóm gónó le gel stifun yó, eles bud tinok le lu yó kem tau hmungol kul yó koni anì bud le tmolok bélê le ke bud hto yóm Kdaw Kehegnô. ⁴³ Timbow le deng gotu skas bè yó, tey dê tau mung kul le Pol. Wen se tau Ju ne wen se là Juhen, okóm hemtahu le bè Dwata. Tey kegduf Pol ne Barnabas kul anì là baya le du yóm któbóng Dwata kul. ⁴⁴ Bè yóm bud kestifun le bè yóm Kdaw Kehegnô yó kem tau yó koni, tódô tô kdê yó kem tau bè yóm syudad yó gotu mung ne le e bud hnungol yóm Udél Dwata. ⁴⁵ Timbow ton yó kem Ju yóm tey tau wen, deng mem mélés nawa le le Pol. Deng mem hennê le yóm tulón nwit Pol, lel le semdekà du. ⁴⁶ Okóm kul le Pol ne Barnabas, là kô wen klikò le malà kul, mon le, “Igoen hyu ke yu gna tnulón me yóm tulón nwit me, okóm mem kenbê ye. Ilóem ofo kuy mon du ke laen dù mu ye du yóm udé gónó ye gemuta klowi laen dù sónen. Tódô tenagak me yu, mógów me ebè yó ne kem tau là yu le. ⁴⁷ Yakà ni du se yóm deng hemò Dwata kum, tehe monen mò kum, ‘Yóm kehógówu kuy ni, ho lómón ke yu yóm layag lem belóng yó kem tau là yu le, anì gefet bè klamangen benwu yóm lan tau gewà gu lem hatay.’ ” ⁴⁸ Timbow gungol yó kem tau là yu le yóm tulón le Pol yó, ya tey keheligal le, ne tey kdóyón le ke Dwata bè yóm udélen. Ne kedê yó kem tau tehe olu Dwata eta le yóm klowi laen dù sónen, gotu le hemtahu. ⁴⁹ Tódô lengeben klamang yóm benwu yó gónón e mebó yóm udél Dwata. ⁵⁰ Okóm tey keklit le kul le Pol yó kem Ju. Gotu nofong le yó kem tau wen glal le bè yóm syudad yó, dalang se yó kem libun boi là Juhen deng hemtahu bè Dwata anì kenbê le Pol ne Barnabas, ne hedó le lu bè yó. ⁵¹ Yó gónó le Pol ne Barnabas olo temótók kefung laan ti le mò ilô yóm klaen dù bud ku du ne ke tnafak Dwata lu yó kem tau kembê kul. Ne hlós le ebè syudad Ikunyum. ⁵² Okóm tey kehligal le yó kem tau lomi hemtahu bè Jisas bè Antyok. Sónmò le halak bè yóm Tulus Dwata.