¹ Bè yóm kdaw yó, yó nmò Hirod, yóm tau hol geta bè yóm benwu yó, nbuten ne hemsidek yó kem tau hemtahu bè Jisas. ² Yó nmoen bè Jim, yóm hol dumun setwoli Jan, hfatayen, tnibó le sudeng. ³ Timbow ton Hirod tey ktimu óyô yó kem Ju bè yóm deng kehfatayen ke Jim, yó gónón bud hekfô ke Pitér snéen. Olo kóm tolo geblà bè yóm kdaw kmò le ken bong bè yóm kken le yóm tnafay laen dù bulung henoken. ⁴ Yóm kekfô le ke Pitér, tódô heflós le elem blanggù. Wen fat bung sendalù stufì mentey du, ket na fat yóm kwen le bè yóm sotu bung. Yó tô atul Hirod, sok deng kogol yóm ken bong nmò le bè Kdaw Khius, tô hdaen bè gónón wen bè yóm kekukumen du. ⁵ Yóm igò Pitér nô lem blanggù, tódô hotu le nawa le mni béléen bè Dwata yó kem dumuhen hemtahu. ⁶ Tek suloy ne duen yóm tô kkukum Hirod ke Pitér bè gónón wen. Bè yóm hol són kifu yó, tungô Pitér lem blóng yó kem lewu sendalù mentey du ⁷ wen lewu kdina fét le du. Ne bud wen lewu sendalù mentey bè bak bakdo yóm blanggù.  Tódô wen hógów Dwata gu bè longit sut bè yó, ya tey klayagen lem yóm blanggù. Ominen leminggil bemtik ke Pitér, nogoten bè abalen, monen, “Géhéli ne, Pitér, btiki.” Tahu se, btik Pitér. Tódô gotu bkas yó kem kdina fét le bè sigelen. ⁸ Monen mò du yóm hógów Dwata, “Hgetem hiletem, ne lesekem tlumfaem.” Ne tahu se, nimón Pitér. Bud mon yóm hógów Dwata, “Legmoti, mungi do.” ⁹ Tahu se, mung du Pitér hewà gu lem blanggù. Okóm bè kun kehedem du Pitér yóm yó, olo knahen. Là tngónen du ke tahu hewà. ¹⁰ Bè yóm kehewà le, tanay nius le yóm bakdo gfi bélê le gónó le mentey yó kem sendalù, omin le mius yóm gewu bakdo, omin le kól bè yóm bakdo bala tók bè yóm lan mógów ebè yóm syudad. Ne tódô kéng hninggel lenungkaem se yóm bak tikeb yó koni, ne tódô le se hewà, lolò le yóm sotu lan. Ne tódô lana se yóm hógów Dwata. ¹¹ Yó he ketngón Pitér du là kemnahen. Ne mon nawahen, “Ni he ketngónu du ktahuhen nim ni. Deng wen hógów Dwata gu bè longit mò lemwà do lem tdok Hirod anì là gmò le du béléu yóm kul kóyô yó kem dumuhu Ju.” ¹² Bè yóm deng ketngónen du yóm kegewaen, tódô hlós ebè gónô Midi, yóm Yê Jan Mark. Olo deng dê tau hemtahu deng sana sbung bè yó. Yó nmò le mni le bè Dwata bè Pitér. ¹³ Bè yóm kkól Pitér bè yó, tódô tmutuk bè bakdo. Ne wen ngà libun ge dók le boluyen Ruda, nen e hnénég yóm muni tmutuk. ¹⁴ Tódô dilóen udé Pitér. Ya tey kehligalen, tódô kendel mlóy mulék elem blóng yó kem dumuhen, là dog mem lenungkaen du yó tum beng, ne monen mò ku, “Pitér koni tum tmutuk tu.” ¹⁵ Deng mem mon le mò du, “Wen ungelem.” “Là,” monen, “yake Pitér tu koni.” Mon le se ku, “Déke yóm hógów Dwata gu bè longit ge munung du.” ¹⁶ Yóm igò le sebólós lem gónô, henlel Pitér se kun temutuk bè gewà. Timbow henas le yóm beng, tódô ton le se Pitér. Ya tey ketnga le du. ¹⁷ Omin Pitér miwel sigelen ebélê le anì là kat le hebnes. Ominen gotu temulón du ku yóm kemò kehewà Dwata du lem blanggù. “Ho tulón ye ke Jim,” mon Pitér, “ne yó kem dumu tekuy hemtahu nim deng kegewau ni.” Ominen temagak kul bè yó, helós ebè dumu benwu ¹⁸ Timbow deng mewas bè yó, ya tey sidek kebulóy nawa yó kem sendalù mentey blanggù yóm là bud keton le ke Pitér. ¹⁹ Tey keheseklab kehfebel Hirod du, okóm là ton le du. Timbow laen dù meton du, gotu tinok Hirod yó kem sendalù tehe mentey ke Pitér, gotu senólóken lu, ne ominen gotu hefatay ku. Kogolen bè yó, lemwót Hirod bè yó bè prubinsya Judiya, mógów ebè syudad Seseriya. Nen hegen udì bè yó. ²⁰ Bè yóm kedaw yó, tolo henubo Hirod yó kem tau lemwut bè syudad Tayal ne Sidon. Yó nemò le, wen kem tau lemwót bè yó kem benwu yó, gotu le sebung, mógów le ebè Hirod anì seton le du. Yóm kekól le bè yó, gena le mit swè bè Blastus, yóm sotu tau kat snalig Hirod bè gónóen anì tnóbóngen lu. Omin le yó helós ebè Hirod anì mit le sefyu béléen, yakà són du bè yóm benwu nogot Hirod yóm gónó le e ge bemli ken. ²¹ Timbow gefet yóm kedaw le mit setulón bè Hirod, deng gotu heget lesek Hirod yóm nes tau ho geta, ne meyón bè yóm bangkù gónóhen ge meyón kemukum, ne ominen mudél ebè yó kem tau sebung. ²² Bè yóm kungol le du, ya tey kehsag le, yó mon le, “Là bud kudé tau du ne nim kudélem ni, ho kudé yóm sotu dwata.” ²³ Tódô sen gengen se wen hógów Dwata gu bè longit, tódô wen des hegenómen ke Hirod, lanen là madat ke Dwata. Tódô gotu ken kuled tenahihen, ne matay. ²⁴ Yó ne yóm udél Dwata, mem misen kbólen, ne tey dê tau hemtahu du. ²⁵ Timbow deng deng ne yóm hemò Barnabas ne Sol bè Jirusalim, omin le bud mulék ebè Antyok. Newit le Jan Mark mò dumu le.