¹ Ne ni mò sónu du bélê ye, kem dumu me setwoli, bê ye senkas gel mutóm kum bè yóm gel kni ye bè Dwata, anì tódô senflósen mból yóm Tulón Hyu lemwót bè yóm gónó tekuy mogot, ne anì hol nadat yó kem tau hmungol du snéen, lómón se yóm kuy kadat du. ² Hol gel hni ye mi bè Dwata anì lenwaen mi lem hólól yó kem tau alì sidek balu le, abay se là kô kdéen du tau hemtahu du yóm tulón nwit me. ³ Okóm yóm gónó tekuy mogot, tey gsalig. Tendo ten‑gelen nawa tekuy, ne tendo kenlungen tekuy bè Seitan. ⁴ Lemwót bè yóm gel któbóngen kuy, yó gónón mgel nawa me kuy. Tngón me deng nimón ye yó kem tehe hlolò me kuy, ne tngón me se tódô hlós yóm kimón ye yó. ⁵ Yó hem gónó tekuy mogot hol hetngón du kuy yóm tey kbong nawahen kuy Dwata, ne hetngónen kuy snéen yóm khulung hbala lemwót bè Krays. ⁶ Yu kem dumu me setwoli, nim hlolò me kuy ni, hlan me bè boluy yóm gónó tekuy mogot Jisas Krays. Hol bê ye abay mung bè yó kem dumu ye hemtahu ke mduk le, ne ke kenbê le yóm tehe hlolò me kuy. ⁷ Deng hónô tngón ye se yóm tehe gel kmò me, yó se mò lolò ye. Là kô me hduk yóm tehe knô me lem blóng ye. ⁸ Là kô me mni bélê ye mò lowil me, okóm tódô gel benli me yóm kum gel ken. Tey gel kmò me nmò, lenulus me kdaw ne glakit me kifu anì là glayam ye temdof kum. ⁹ Yó gónó me mò du nim ni, sundu mon ke laen dù kwalis me mni bélê ye bè yóm ktolok me kuy, bede yó gónó me mò du mò gónó ye mton du anì dnalang ye. ¹⁰ Bè yóm tehe knô me bélê ye dyó ekni, wen hlolò me kuy, “Yó se tau là moen nmò, béen dog mken.” ¹¹ Yó gónó me bud mon du nim ni, abay se gungol me wen bélê ye mduk mò nmò kun. Laen kô mdengen nmò le, són tendo snolò le nmò kem dumu tau. ¹² Yóm hlau hetgama me kul ni, hlan me bè boluy yóm gónó tekuy mogot Jisas Krays. Ni kem tau mduk ni, yake hol le heged mò nmò mò gónó le ma yóm kul klowil. ¹³ Okóm bélê ye kuy, kem dumu me setwoli, bê ye abay htakas mò du yóm hyu. ¹⁴ Ke wen tau bè yó là mimón du yóm deng mon me lem nim sulat ni, hol tenngel ye ke tau du, ne bê ye bud slomong béléen anì dilóen là hyuhen yóm kun nmò. ¹⁵ Là kô hnohon ye du dé, okóm lómó kmò ye ebéléen ke mudél ye ebè kem dumu ye hemtahu. ¹⁶ Yó hem gónó tekuy mogot hol tendo henek nawa ye balù kihu sut bélê ye. Du se gónón lemwót yóm kenek nawa. Yó hem gónó tekuy mogot tendo nô bélê ye. ¹⁷ Hol dou lan tdok smulat du nim hol sónen nii: Ou se Pol. Tey kólómu kuy. Ni se kmò kefemahu bè yóm ket sulatu. Ni se dou lan smulat. ¹⁸ Yó hem gónó tekuy mogot Jisas Krays hol tendo tmóbóng kuy.