¹ Ó kem dumu me setwoli, bè yóm angat kkól yóm gónó tekuy mogot Jisas Krays, ne yóm kehestifunen tekuy ebéléen, wen hol tulónu kuy. ² Hol bê ye abay kendel hesbeweg kehedem ye, ne bê ye hlangaf ke gungol ye deng gefet kun yóm kdaw kkól yóm gónó tekuy mogot. Déke wen se mon du lemwót bélê me nim tulón ni bè yóm tehe ktugod me ke Dwata, duhen bè yóm tehe ktolok me, duhen ke tehe tulón me bè sulat. ³ Hol ye temgama anì laen dù gemsukat kuy. Abay se là kóen tagad sut he yóm kdaw bud kkól yóm gónó tekuy mogot ke là nan gegna yóm alì kekbê le ke Dwata yó kem tau, ne nan na hegfan he yóm tau alì hulung mò sidek. Yó se yóm tau deng eles golu etahen yóm kógówen elem lanaw ofi. ⁴ Nim tau ni, gotu natuen kdéen dwata kéng kkólen bè yó kem dumu gel hentahu kem tau, ne angat hegetahen knóen senta le. Balù yóm Gónô Dwata, tódô husek elemen, ne tódô myón bè yó, ne tódô monen du kun Dwata. ⁵ Là deng klifót ye du he kô yóm tehe ktulónu du kuy ni kem ni ekni bè yóm tehe knóu dyó bélê ye? ⁶ Okóm tolo wen semgafas du he nim kmoen ni anì là gmoen du yóm tô nmoen, ne tngón ye se kuy yóm semgafas du yó. Okóm ke deng hto yóm buteng fét Dwata, yó he kehegfanen yóm tau alì hulung mò sidek yó. ⁷ Okóm ni kmoen ni, wen se gel nmoen bede là dengen hol gfan he. Yó he kmoen du sok lemwót bè yóm semgafas du. ⁸ Ne yó he kehegfanen yóm tau alì hulung mò sidek yó. Okóm bè yóm kkól yóm gónó tekuy mogot Jisas, angat tódô hnatayen mlan bè kyufen du. Tódô mekto meglà yóm tau yó lemwót bè yóm tey keslinang yóm gónó tekuy mogot. ⁹ Bè yóm angat ksuten yóm tau alì hulung mò sidek yó, Seitan yóm fen hol htulus du. Yó gónóm mon, tey dê hentaw ton nmoen mò gónón smukat tau. ¹⁰ Tódô ket du yóm nmoen mò gónón gemsukat yó kem tau angat hlós elem hatay. Yó gónó le angat hlós elem hatay, abay se deng tehe kenbê le yóm hol ktahuhen mò gónó le gewà. ¹¹ Nelemwótbè yóm kekbê le yóm ktahuhen, yó gónó Dwata hemlus du ebélê le yóm kehedem là tedengen anì hentahu le yóm kéng. ¹² Yó nefeten, angat gotu megtuled yóm kdéen tau là dog hemtahu du yóm ktahuhen, mom hnigal le yóm ksidek nmò le. ¹³ Okóm kuy, kem dumu me setwoli, kem tau kenbong nawa yóm gónó tekuy mogot, là gbek me du ke là gel dóyón me ke Dwata lemwót bélê ye. Abay se tehe yu ekni bè hol kbut yóm benwu, deng eles nélék Dwata yu ne anì lenwaen yu gu lem hatay. Yó kmò kehewaen kuy, hlanen bè kun kfasang yóm Tulusen mò hembaling kuy kun tau hol mólós, ne bud hlanen snéen bè yóm deng kehtahu ye yóm ktahuhen. ¹⁴ Ni se lemen yóm gónó Dwata tmaba kuy ebéléen hlanen bè yóm Tulón Hyu tehe tulón me kuy. Yó gónón tmaba kuy anì gomong ye bè yóm kun kegeta yóm gónó tekuy mogot Jisas Krays. ¹⁵ Duhen yó, kem dumu me setwoli, hol henbegel ye yóm kuy kdà, ne hol nkem ye yóm ktahuhen deng gel tolok me kuy, dalang se yóm tehe gel tulón me kuy bè yóm ksulat me ebélê ye. ¹⁶ - ¹⁷ Yó hem gónó tekuy mogot Jisas Krays ne Dwata, yóm Mà tekuy, hol gemduf kuy ne hol temgel nawa ye anì senflós ye mò du yóm hyu, ne senflósen hyu yóm gel mon ye. Tey kbong nawahen tekuy Dwata. Lemwót bè yóm któbóngen tekuy, yó gónón tendo wen kgel nawa tekuy, ne tendo wen yóm tey hendón nefet nawa tekuy.